42 Vaʼun, skotol li bankilal soltaroetike, li Joanan+ ti jaʼ xnichʼon Kareae, li Jesanias ti jaʼ xnichʼon Osayae xchiʼuk skotol li krixchanoetike, li buchʼutik tsots skʼoplalike xchiʼuk li buchʼutik muʼyuke, nopajik batel ta stojolal li j-alkʼop Jeremiase 2 xchiʼuk xi laj yalbeike: «Avokoluk, chikintao li kʼusi xivokoletkutik skʼanele, kʼopono ta jtojolalkutik li Jeova ti jaʼ Adiose, ta jtojolalkutik ti jayvoʼ liʼ to oyunkutike, yuʼun laj xa avil ti jutebunkutike akʼo mi epunkutik toʼox.+