3 Li Aarone skʼan tsanaluk-o yuʼun li kantiletik ti te oy ta spat kortina ti bu nopol xil li xkaxail Mantal ti te oy li ta karpana sventa tsobobbaile. Skʼan tsanaluk-o yuʼun ta yeloval Jeova kʼalal chʼayem xa ox batel kʼakʼal kʼalal to ta sob yokʼomal. Jaʼ jun mantal sbatel osil avuʼunik xchiʼuk skotol li jaykʼol kuxlejal chtal avuʼunik ta tsʼakale. 4 Skʼan jechuk-o xchol ta yeloval Jeova li skantilaltak kandelero+ ti pasbil ta batsʼi oroe.