Isaias
45 Voʼon li Jeovaune xi chkalbe li buchʼu jtʼujoje, li Siroe,+
ti jtsakojbe lek li sbatsʼikʼobe,+
sventa ta jchapan mukʼtik lumetik ta yeloval,+
sventa ta jlajesbe stsatsal* li ajvaliletike,
sventa ta jam xchaʼpechal tiʼ naetik ta yeloval
xchiʼuk sventa mu makaluk li tiʼ naetike:
Ta jlilin li tiʼ naetik ti pasbil ta kovree
xchiʼuk ta jtuchʼbe li stakʼinaltak ti kʼatajtike.+
3 Ta xkakʼbot li kʼulejaletik ti te oy ta ikʼal osile
xchiʼuk li kʼulejaletik ti lek nakʼajtik* ta snakʼobile,+
sventa xanaʼ ti voʼon Jeovaune,
li Dios yuʼun Israele, ti la stakot ta ikʼel ta abie.+
4 Ta skoj li kajtunel Jakob xchiʼuk li Israel ti jaʼ jtʼujoje,
yakal ta jtakot ta ikʼel ta abi.
Yakal chkakʼbot jun abi ti jaʼ chavichʼ-o ichʼel ta mukʼe akʼo mi mu toʼox xavojtikinun.
5 Voʼon Jeovaun, muʼyuk buchʼu yan.
Muʼyuk yan Dios jech kʼuchaʼal voʼone.+
Voʼon ta jtsatsubtasot* akʼo mi mu toʼox xavojtikinun,
6 sventa snaʼik krixchanoetik
kʼalal to slokʼeb kʼakʼal xchiʼuk kʼalal to smaleb kʼakʼal,
ti chʼabal buchʼu yan jech kʼuchaʼal voʼone.+
Voʼon Jeovaun, muʼyuk buchʼu yan.+
7 Voʼon chkakʼ ayanuk li sakil osile+ xchiʼuk li ikʼal osile,+
voʼon chkakʼ li jun oʼontonale+ xchiʼuk li vokolile;+
voʼon Jeovaun, voʼon ta jpas skotol li kʼusitik taje.
8 Vinajel, akʼo yaluk tal voʼ;+
akʼo smal yalel tal tukʼilal li toke.
Akʼo chʼiuk kʼuchaʼal sbekʼ tsʼunobil ta balumil li kolebal xchiʼuk tukʼilale
xchiʼuk akʼo pʼolikuk batel.+
Voʼon Jeovaun, voʼon kaloj ti jech chkʼot ta pasel taje».
9 ¡Abol sba li buchʼu tstsak ta kʼop li Jpasvanej yuʼune,*
yuʼun xkoʼolaj kʼuchaʼal sjepelul lumal pʼin
ti te pechel ti bu lamal li yantik sjepelul lumal pʼine!
¿Mi xi van chalbe Jpatpʼin* li achʼele: «¿Kʼusi yakal chapas?»?+
O ¿mi xi van chal li yabtel akʼobe: «Muʼyuk skʼob»?*
10 Abol sba li buchʼu xi chalbe stote: «¿Kʼu yuʼun ti lakʼot ta jtote?»
xchiʼuk li buchʼu xi chalbe smeʼe: «¿Kʼu yuʼun ti la avokʼesune?».
11 Xi chal li Jeovae, li Buchʼu chʼul yuʼun Israele,+ ti jaʼ li Jpasvanej yuʼune:
«¿Mi yuʼun chachibal kʼoptaikun ta sventa li kʼusi chtal ta mas jelavele
xchiʼuk mi yuʼun chavalbeikun kʼusi skʼan jpas ta stojolal li jnichʼnabe+ xchiʼuk ta sventa li yabteltak jkʼobe?
12 Voʼon la jpas li balumile+ xchiʼuk voʼon la jmeltsan li krixchanoetik ti te oyike.+
Voʼon la jlichʼan batel ta jkʼob jtuk li vinajele+
xchiʼuk laj kalbe mantal li kʼanaletike xchiʼuk skotol li kʼusitik te oye».+
13 Xi chal li Jeova ti jaʼ bankilal yuʼun soltaroetike:* «Ta skoj ti tukʼune, jvaʼanoj jun vinik+
xchiʼuk voʼon ta jtukʼibtasbe skotol li sbetake.
Jaʼ ta xchaʼvaʼan li jteklumale+
xchiʼuk ta skolta lokʼel tal li buchʼutik ikʼbilik batel kuʼune,+ muʼyuk tskʼan stojol xchiʼuk muʼyuk tstsak takʼin».*+
14 Xi chal li Jeovae:
«Li skanal* Ejiptoe xchiʼuk li spʼolmal* Etiopia xchiʼuk jsebaetik ti jaʼik natil viniketike
chtalik ta atojolal xchiʼuk chavuʼuninan.
Chukajtik ta kadena tijil chtalik ta apat.
Chtalik xchiʼuk tsnijan sbaik ta atojolal.+
Chichʼoxuk ta mukʼ kʼalal xi tskʼoponoxuke: ‹Ta melel, te xchiʼukot li Diose+
xchiʼuk muʼyuk buchʼu yan te xchiʼukot; muʼyuk yan Dios›».
16 Skotolik ta xichʼik akʼel ta kʼexlal xchiʼuk chichʼik bikʼtajesbel skʼoplalik;
li buchʼutik tspasik lokʼoletike xnijetik xa batel ta kʼexlal.+
17 Pe li Jeovae ta skolta Israel sventa sbatel osil.+
Muʼyuk chavichʼik akʼel ta kʼexlal xchiʼuk muʼyuk chavichʼik bikʼtajesbel akʼoplalik ta sbatel osil.+
18 Yuʼun li Jeova
ti jaʼ Jpasvanej yuʼun vinajele,+ ti jaʼ melel Diose,
ti jaʼ li buchʼu la spas li balumile, ti buchʼu la smeltsan ti la snakan leke,+
ti mu jecheʼuk noʼox la smeltsane,* ti la smeltsan sventa xichʼ naklebinele,+ xi chale:
«Voʼon Jeovaun, muʼyuk buchʼu yan.
19 Muʼyuk bu bat jnakʼ* jba kʼalal likʼopoje,+ muʼyuk bat kʼopojkun li ta yosilal ikʼal osile;
muʼyuk xi laj kalbe li snitilulal Jakobe:
‹Saʼikun, pe jecheʼ noʼox chavakʼ avokolik›.
Voʼon Jeovaun ti tukʼ kʼusi chkale xchiʼuk ti melel li kʼusi chlokʼ ta kee.+
20 Tsobo abaik xchiʼuk laʼik.
Jmoj xanopajik tal, voʼoxuk ti jatavemoxuk lokʼel tal li ta mukʼtik lumetike.+
Muʼyuk kʼusi snaʼik li buchʼutik yichʼojik batel lokʼoletike
xchiʼuk ti tskʼoponik jun dios ti mu xuʼ xkoltaatike.+
21 Alik tal li kʼusi kʼot ta pasele, alik tal kʼusi ti akʼopike.
Jmojuk xachap aloʼilik.
¿Buchʼu ti voʼne xa onoʼox laj yal taje
xchiʼuk ti laj yakʼ ta aʼiel ta voʼnee?
¿Mi mu voʼonuk laj kal ti Jeovaune?
Muʼyuk yan Dios kʼuchaʼal voʼon;
jun Dios ti tukʼ kʼusitik tspase xchiʼuk ti Jkoltavaneje,+ muʼyuk buchʼu yan kʼuchaʼal voʼone.+
22 Akotolik kʼalal to ta spajeb balumil, laʼik ta jtojolal, vaʼun chakolik,+
yuʼun voʼon Diosun, muʼyuk buchʼu yan.+
23 Laj kakʼ ke ta skoj li jbie;
oy xa kʼusi lokʼem ta ke ti jaʼ melele,
jaʼ yuʼun persa chkʼot ta pasel:+
tskejan sba skotolik ta jtojolal
xchiʼuk skotolik chalbeikun ta jamal ti tukʼ chakʼ sbaike+
24 xchiʼuk xi chalike: ‹Ta melel, oy melel tukʼilal xchiʼuk juʼelal ta stojolal li Jeovae.
Skotol li buchʼutik chkap sjolik ta stojolale xnijetik xa ta kʼexlal chtalik ta stojolal.
25 Skotol li snitilulal Israele chakʼik venta ti oy srasonik ti chtunik ta stojolal Jeovae+
xchiʼuk chmuyubajik ta stojolal›».