Jeremias

34 Li Nabukodonosor* ti jaʼ ajvalil ta Babilonia xchiʼuk skotol li yajsoltarotake yakal tstsakik ta kʼop li Jerusalen xchiʼuk skotol li jteklumetik ta spat xokone. Te xchiʼuk tal skotol li mukʼtik lumetik ta balumil ti sventainoje xchiʼuk skotol li jteklumetike. Vaʼun, jaʼo kʼoponat tal yuʼun Jeova li Jeremiase, xi albate:+

2 «Xi chal li Jeova ti jaʼ Dios yuʼun Israele: ‹Batan, bat kʼopono li Sedekias+ ti jaʼ ajvalil ta Judae, xi xavalbee: «Xi chal li Jeovae: ‹Ta xkakʼbe ta skʼob ajvalil ta Babilonia li jteklum liʼe, vaʼun ta xchikʼ ta kʼokʼ.+ 3 Li voʼot eke muʼyuk chakol ta skʼob li ajvalile, yuʼun jpʼel skʼoplal chavichʼ tael ta tsakel xchiʼuk chavichʼ akʼel ta stojolal.+ Chbat avaʼan aba ta yeloval li ajvalil ta Babiloniae, te akʼelojbe lek sat kʼalal chchiʼinot ta loʼile, persa chabat ta Babilonia›.+ 4 Akʼo mi jech chkʼot ta atojolal, Sedekias, ajvalil ta Juda, chikintao li kʼusi chal Jeovae: ‹Xi chal li Jeova ta atojolale: «Li voʼote muʼyuk chavichʼ milel ta espada. 5 Jun avoʼonton chacham+ xchiʼuk ta xchikʼboxuk muil poxiletik kʼalal chavichʼ mukel jech kʼuchaʼal la spasbeik li amoltotake, jaʼ li ajvaliletik ti baʼyel echʼik avuʼune, ta xat yoʼontonik ta atojolal, xi chalike: ‹¡Ay, ajvalil kuʼunkutik!›, yuʼun ‹jech lokʼem ta ke›, xi li Jeovae»›»›».

6 Vaʼun, li j-alkʼop Jeremiase la skʼopon li Sedekias ti jaʼ ajvalil yuʼun Juda ti te oy ta Jerusalene, 7 jaʼo kʼalal yakal tstsakik ta kʼop Jerusalen li yajsoltarotak ajvalil ta Babiloniae. Jaʼo yakal tstsakik ta kʼop xtok skotol li jteklumetik ta Juda ti muʼyuk to lajemik ta tsalele,+ jaʼ li Lakis+ xchiʼuk Asekae,+ yuʼun jaʼ xa noʼox stukik ti lek joyolik ta muro li ta jteklumetik ta Judae.

8 Li Jeremiase oy kʼusi albat yuʼun Jeova kʼalal spasojik xa ox jun trato li ajvalil Sedekias xchiʼuk sjunul li jteklum Jerusalen sventa skoltaik lokʼel li smosoike,+ 9 ti skotolik skʼan skoltaik lokʼel li smosoik ti jaʼik j-ebreoetike, ta vinik ta ants, sventa mu teuk smosoinik-o li xchiʼilik ti jaʼ judaetik eke. 10 Jech oxal, jech la spasik skotol li bankilaletike xchiʼuk skotol li krixchanoetike. Yuʼun te tsakal skʼoplalik li ta trato la spasik ti skʼan skoltaik lokʼel li smosoike xchiʼuk li skiaraike, ti mu teuk xkom-o ta smosoike. Jaʼ yuʼun, la xchʼunik mantal, la skoltaik batel. 11 Akʼo mi jech, laj yikʼik sutel tal li mosoiletik xchiʼuk kiaraetik ti laj toʼox skoltaik batele, vaʼun la sujik ti xkʼotik ta smosoik yan veltae. 12 Jaʼ yuʼun, kʼoponat tal yan velta yuʼun Jeova li Jeremiase, xi laj yal li Jeovae:

13 «Xi chal li Jeova ti jaʼ Dios yuʼun Israele: ‹La jpas jun trato xchiʼuk li amoltotakik+ kʼalal la jlokʼesik tal li ta yosilal Ejiptoe, ti bu mosoinbilik toʼoxe,+ xi laj kale: 14 «Mi oy junuk avermano ti jaʼ j-ebreo ti amanoje xchiʼuk mi vakib xa jabil tun ta atojolale, skʼan xakolta batel li ta svukubal jabile».+ Pe muʼyuk bu laj yaʼibeikun xchiʼuk muʼyuk la stsʼet chikintabeikun li amoltotakike. 15 Pe achʼtik toe,* la ajel li anopbenike xchiʼuk jaʼ la apasik li kʼusi lek chkil kʼalal la akoltaik lokʼel ta mosoil li achiʼiltakike, la apasik jun trato ta keloval li ta na ti yichʼoj jbie. 16 Ta tsʼakale, la ajel anobpenik yan velta xchiʼuk la asokesbeik skʼoplal jbi+ kʼalal laj avikʼik tal yan velta li amosoike xchiʼuk li akiaraike, ti laj toʼox akoltaik lokʼel jech kʼuchaʼal la skʼanike, vaʼun la asujik ti xkʼotik ta amosoik yan veltae›.

17 »Jaʼ yuʼun, xi chal li Jeovae: ‹Li voʼoxuke muʼyuk la achʼunbeikun ti skʼan xakoltaik batel li amosoike, ti xakoltaik batel li achiʼilik ta jujuntale xchiʼuk li avermanoike.+ Jaʼ yuʼun, jaʼ to kolem chakomik kuʼun mi lalajik ta espada, ta tsatsal chamel xchiʼuk ta tsatsal viʼnale,+ jech xtok, xibal aba chakomik kuʼun ta sba sat skotol li mukʼtik lumetik ta balumile›,+ xi li Jeovae. 18 ‹Liʼe jaʼ jech chkʼot ta stojolal li viniketik ti muʼyuk la spasik jech kʼuchaʼal chal li jtratoe, ti muʼyuk kʼot ta pasel yuʼunik li trato la spasik ta keloval kʼalal la xtuchʼik ta oʼlol li chʼiom tot vakaxe xchiʼuk ti te jelavik ta oʼlol ti bu xetʼajtik* yuʼunike,+ 19 li viniketik taje jaʼik li bankilaletik ta Judae, li bankilaletik ta Jerusalene, li bankilal j-abteletik ta pasob mantale, li paleetike xchiʼuk skotol li krixchanoetik ta jteklum ti te jelavik ta oʼlol ti bu xetʼajtik* yuʼunik li chʼiom tot vakaxe: 20 chkakʼik ta skʼob li yajkontraike xchiʼuk li buchʼutik tskʼan chmilatike, vaʼun ta xkʼot ta sveʼel mutetik ta vinajel li sbekʼtalike xchiʼuk ta sveʼel li chonbolometik ta balumile.+ 21 Li Sedekias ti jaʼ ajvalil ta Judae xchiʼuk li bankilaletik yuʼune chkakʼik ta skʼob li yajkontraike, li buchʼutik tskʼan chmilatike xchiʼuk li yajsoltarotak ajvalil ta Babiloniae,+ ti yakal xa chlokʼik batel li ta alumalike›.+

22 »Xi chal li Jeovae: ‹Ta xkal mantal, ta xkikʼik sutel tal li ta jteklume xchiʼuk chtal stsakik ta kʼop yan velta, ta xuʼuninik, ta xchikʼik ta kʼokʼ+ xchiʼuk xokol chkom kuʼun li jteklumetik ta Judae, mi junuk jnaklej te chkom›».+