Jeremias
48 Li Jeova ti jaʼ bankilal yuʼun soltaroetike,* li Dios yuʼun Israele, xi chal ta sventa li Moabe:+
«¡Abol sba li Neboe,+ yuʼun laj xa yichʼ lajesel!
Li Kiryataime+ laj xa yichʼ akʼel ta kʼexlal xchiʼuk och xa ta kʼabal.
Li lekil nakʼobbaile laj xa yichʼ akʼel ta kʼexlal xchiʼuk laj xa yichʼ lilinel.+
2 Muʼyuk xa tskʼupil kʼoptaik li Moabe.
Te ta Esbon+ la xchapik ti chichʼ lajesele, xi laj yalike:
‹Batik, bat kakʼbetik slajeb sventa maʼukuk xa jun mukʼta lum xkom›.
Li voʼot eke, Madmen, teuk noʼox tsʼijil xakom,
yuʼun yakal ta snutsot li espadae.
3 Oy buchʼutik te x-avetik te to ta Oronaim+
ta skoj ti laj yichʼ lajesel xchiʼuk ti laj yichʼ jinesel ta j-echʼel li jteklume.
4 Laj xa yichʼ lajesel li Moabe.
X-avlajetik li yalabtake.
5 X-okʼoletik kʼalal chmuyik batel li ta Luite.
Kʼalal yakal chyalik tal li ta Oronaime, chaʼiik ti oy buchʼutik x-avetik ta skoj li vokolile.+
6 ¡Jatavanik batel sventa mu xavichʼik milel!
Skʼan jech xakʼotik kʼuchaʼal jtekʼ enebro teʼ te ta takixokol balumil.
7 Ta skoj ti la apat avoʼonton ta stojolal li kʼusitik chapase xchiʼuk li akʼulejale,
cha-och ta kʼabal ek.
Chichʼ chukel batel ek li dios Kemose,+
jmoj chichʼ chukel batel xchiʼuk li paleetik yuʼune xchiʼuk li bankilaletik yuʼune.
8 Li jlajesvaneje ch-och batel ta jujun jteklum,
muʼyuk chkol mi junuk jteklum.+
Chlaj skʼoplal li stenlejale,
chichʼ lajesel li balumil ta pachʼaltike,* jech kʼuchaʼal lokʼem ta ye li Jeovae.
9 Akʼbo junuk senyail sventa snaʼ kʼuxi chbat li Moabe,
yuʼun kʼalal yakal chichʼ lajesele, chjatavik batel li jnaklejetik tee,
li jteklumetik yuʼune xibal sba chkom,
mi junuk jnaklej chkom te.+
10 ¡Chopol kʼoptabiluk li buchʼu muʼyuk lek tspasbe li yabtel Jeovae!
¡Chopol kʼoptabiluk li buchʼu mu skʼan smal chʼichʼ ta s-espadae!
11 Li jmoabetike muʼyuk yiloj-o tal svokolik ta sbikʼtalik,
xkoʼolajik kʼuchaʼal vino ti stsʼanoj sba yalel smatsʼile.
Muʼyuk yichʼoj-o jelbel yavil
xchiʼuk muʼyuk yichʼoj-o chukel batel.
Jaʼ yuʼun, muʼyuk jelem-o li smuile
xchiʼuk muʼyuk jelem-o li yikʼe.
12 »Xi chal li Jeovae: ‹Jaʼ yuʼun, chkʼot skʼakʼalil ti ta jtak batel viniketik sventa slajesike. Ta snujanbeik xchiʼuk ta xokobtasbeik li spʼinike xchiʼuk ta svokʼbeik li smukʼta jarraike. 13 Li jmoabetike ta xkʼexavik ta skoj li Kemose, jech kʼuchaʼal ta kʼexlal komik li jteklum Israel ta skoj li kʼusitik la spasik ta Betel ti jaʼ toʼox spatoj-o yoʼontonike.+
14 ¿Kʼuxi xa noʼox ti xi chavalike: «Lek tsotsunkutik ta paskʼop, lek chapalunkutik sventa xibatkutik ta paskʼop»?›.+
15 Xi chal li Ajvalile, ti jaʼ li Jeova ti bankilal yuʼun soltaroetik sbie:+
‹Laj xa yichʼ lajesel li Moabe,
oy xa buchʼutik ochik ta persa li ta jteklumetik yuʼune+
xchiʼuk laj xa yichʼ milel li keremetik yuʼunik ti lek tsotsike›.+
16 Jutuk xa skʼan xvul svokolik li jmoabetike
xchiʼuk poʼot xa tajek xyalik ta lum.+
17 Ta xkʼuxubaj ta yoʼontonik Moab skotol li buchʼutik te oy ta spat xokone,
skotol li buchʼutik xojtikinbeik sbie.
Xi xavalbeike: ‹¡Kʼuxi xa noʼox ti kʼas li tsatsal teʼe, li vaxton ti kʼupil sbae!›.
18 Iktao komel li amukʼulale
xchiʼuk takinuk avoʼonton* xachoti, tseb ti te nakalot ta Dibone,+
yuʼun tal xa skontrainot ti buchʼu chakʼbe slajeb li Moabe
xchiʼuk tslilin komel ti butik joyajtik ta muro avuʼune.+
19 Jnaklej ta Aroer,+ vaʼano aba ta xokon be xchiʼuk kʼelo batel.
Xi xajakʼbe li vinik ti yakal ta xjatave xchiʼuk li ants ti yakal chjatave: ‹¿Kʼusi kʼot ta pasel?›.
20 Laj xa yichʼ akʼel ta kʼexlal li Moabe xchiʼuk laj xa yichʼ sibtasel.
Okʼanik xchiʼuk avananik.
Alik batel ta Arnon+ ti laj xa yichʼ lajesel li Moabe.
21 »Yakal xa chichʼik kastigo li balumil ta pachʼaltike,*+ li Olone, li Jaase,+ li Mefaate,+ 22 li Dibone,+ li Neboe,+ li Bet-Diblataime, 23 li Kiryataime,+ li Bet-Gamule, li Bet-Meone,+ 24 li Keriyote,+ li Bosrae xchiʼuk skotol li jteklumetik ti nom xchiʼuk nopol xil li yosilal Moabe.
25 ‹Laj xa yichʼ lajesbel yip* li Moabe;
laj xa yichʼ kʼasbel li skʼobe›, xi li Jeovae.
26 ‹Yakubtasik,+ yuʼun laj xa stoy sba ta stojolal li Jeovae.+
Li Moabe te tsbalalin sba ta xet*
xchiʼuk chichʼ labanel.
27 ¿Mi mu lajuk alaban li Israele?+
¿Mi yuʼun te xchiʼuk j-elekʼetik la ata,
ti la ajimulan ajol xchiʼuk ti chopol lakʼopoj ta stojolale?
28 Jnaklejetik ta Moab, iktaik komel li jteklumetike xchiʼuk bat naklanik ta tayal tontik,
jechuk xakʼotik kʼuchaʼal paloma ti tspas stas ta kʼal tonetike›».
29 «Kʼotem ta jchikintik li stoyobbail Moabe... li stuke toj echʼ xa noʼox jtoyba,
kʼotem ta jchikintik ti stuk xa noʼox chaʼi sbae, ti jpʼel xale, ti mukʼ skʼoplal chaʼi sbae xchiʼuk ti jtoyba li yoʼontone».+
30 «Xi chal li Jeovae: ‹Xkojtikinbe li skapemal sjole,
pe li kʼusi jecheʼ chlokʼ ta yee muʼyuk sbalil.
Muʼyuk kʼusi tspasik jsetʼuk.*
31 Jaʼ yuʼun, chopol chkaʼi jba ta stojolal li Moabe,
chi-avan ta stojolal sjunul li jteklum Moabe
xchiʼuk chi-okʼ ta stojolal li viniketik ta Kir-Erese.+
32 Steʼel uva ta Sibma,+ chi-okʼ ta atojolal,
mas to chi-okʼ ta atojolal, jaʼ mu sta ti kʼu yelan li-okʼ ta stojolal li Jasere.+
Li akʼobkʼobtak ti lek yoxike jelav xa batel kʼalal to ta jot nab.
Kʼot kʼalal to ta nab, kʼot kʼalal to ta Jaser.
Pe vul xa jlajesvanej ta stojolal
li asat ti chlokʼ ta veranoe*+ xchiʼuk ti kʼu yepal chichʼ tsobel li asate.
33 Laj xa skʼoplal li xkuxetel oʼontonal xchiʼuk li muyubajel ta tsʼunobaltik
xchiʼuk li ta Moabe.+
Muʼyuk xa chkakʼ lokʼuk vino li ta spitsʼobile.
Chʼabal xa buchʼu chpechʼilanik ta tekʼel uva ti x-avet ta muyubajele.
X-avlajetik, pe maʼuk xa ta skoj muyubajel›».+
34 «‹Oy buchʼu x-avet ta Esbon+ kʼalal to ta Eleale.+
Te tsots ch-avanik ta Jaas,+
x-avetik ta Soar kʼalal to ta Oronaim+ xchiʼuk kʼalal to ta Eglat-Selisiya.
Jech xtok, ta xtakij li ukʼumetik ta Nimrime.+
35 Ta jlajesbe skʼoplal ta Moab
li buchʼu chichʼ batel milbil matanal ta tayal kʼopojebaletike*
xchiʼuk li buchʼu chakʼbe chikʼbil matanaletik li sdiose›, xi li Jeovae.
36 ‹Jaʼ yuʼun, solel chi-okʼ ta stojolal Moab kʼuchaʼal jun ama*+
xchiʼuk chi-okʼ ta stojolal li viniketik ta Kir-Eres kʼuchaʼal jun amae.*
Yuʼun chlaj skʼoplal li skʼulejal stsoboje.
37 Yuʼun tʼaxjol kom skotolik+
xchiʼuk xjuxoj yisim skotolik.
38 «Xi chal li Jeovae: ‹Naka okʼel noʼox chichʼ aʼiel
li ta jol naetik ta Moabe
xchiʼuk li ta chʼivitetik* tee.
Yuʼun li Moabe la jlilin
jech kʼuchaʼal chichʼ lilinel jpʼej pʼin ti muʼyuk kʼusi xtun-oe.
39 ¡Avananik jnaklejetik ta Moab! ¡Solel xiʼem xa tajek li Moabe!
¡Joyij xa batel ta skoj ti kʼexave!
Laj xa yichʼ labanel,
solel xibal sba chilik li buchʼutik te oyik ta spat xokone›».
40 «Yuʼun xi chal li Jeovae:
‹¡Kʼelavil! Li jkontrainvaneje xkoʼolaj kʼuchaʼal jkot aguila ti xjipet yalele,+
jech chlichʼ batel xikʼ ta stojolal li Moabe.+
41 Ta x-och ta kʼabal li jteklumetike
xchiʼuk ch-uʼuninbatik
li snakʼobbailike.
Li vaʼ kʼakʼale, mu xa x-aʼibaj kʼusi tspasik li yajsoltarotak Moabe,
jech kʼuchaʼal jun ants ti mu xa x-aʼibaj kʼusi tspas kʼalal chvokʼ yole›».
42 «‹Li Moabe chichʼ lajesel sventa maʼukuk xa jun jteklum xkom,+
yuʼun la stoy sba ta stojolal li Jeovae.+
43 Jnaklejetik ta Moab,
te oy ta avelovalik li kʼusi chakʼ xiʼele, li chʼene xchiʼuk li petsʼe›, xi li Jeovae.
44 ‹Buchʼuuk noʼox ti chjatav ta skoj li kʼusi xibal sbae chpʼaj* yalel ta chʼen
xchiʼuk buchʼuuk noʼox ti chlokʼ tal ta chʼene yakbil chkʼot ta petsʼ›.
‹Yuʼun li kʼusitik taje chkakʼ tal ta stojolal Moab mi kʼot li sjabilal ti chkakʼbe kastigoe›, xi li Jeovae.
45 ‹Chʼabal xa yipik te vaʼalik ta yaxinal* Esbon li buchʼutik chjatavike.
Vaʼun, chlokʼ tal kʼokʼ li ta Esbone
xchiʼuk chlokʼ tal leb kʼokʼ li ta Seone.+
Chchikʼbe stiba li Moabe
xchiʼuk chchikʼbe sbakil sjol li jsaʼkʼopetike›.+
46 ‹¡Abol aba, Moab!
Laj xa skʼoplal li steklumal Kemose.+
Yuʼun laj xa yichʼ chukel batel li akeremtake
xchiʼuk laj xa yichʼ ikʼel batel li atsebetake.+
47 Pe li ta slajebaltik batel kʼakʼale, voʼon ta jtsob sutel tal li jmoabetik ti chukbilik batele.
Taje jaʼ li kastigo ti laj yichʼ alel ti chichʼ li Moabe›,+ xi li Jeovae».