Jeremias
51 Xi chal li Jeovae:
«Ta jtak tal ta stojolal Babilonia+ xchiʼuk ta stojolal jnaklejetik ta Leb-Kamai*
li ikʼ ti chmilvane.
2 Ta jtak batel viniketik ta Babilonia sventa chbat yikʼaik,
ta sjipik muyel xchiʼuk xokol ta xiktabeik li yosilale;
ta buyuk noʼox ta xlikik tal sventa stsakik ta kʼop li ta skʼakʼalil vokolile.+
3 Akʼo mu stunes s-arkoik li j-akʼflechaetike.
Muʼyukuk buchʼu xvaʼi kʼalal slapoj li smak sbekʼtale.*
Mu me xkʼuxubaj ta avoʼontonik li keremetik ta jteklume.+
Lajesik ta j-echʼel skotol li soltaroetik tee.
4 Te telajtik chkomik li ta yosilal jkaldeaetike,
tusul chkomik ta kaye, yayijem chkomik ta j-echʼel.+
5 Yuʼun li Israel xchiʼuk Judae muʼyuk iktabil komel yuʼun li Sdiosike, li Jeova ti jaʼ bankilal yuʼun soltaroetike.*+
Yan li slumal jkaldeaetike noj ta mulil ch-ilat yuʼun li Buchʼu chʼul yuʼun Israele.
Mu teuk xalajik ta skoj li smule.
Yuʼun jaʼ xa yorail ti tspak sutel li Jeovae.
Ta stojbe sutel ta skoj li kʼusitik la spase.+
7 Li Babiloniae kʼotem kʼuchaʼal jun kopa ta oro ti te oy ta skʼob li Jeovae;
yakub yuʼun sjunul li balumile.
8 Ta anil noʼox yal ta lum li Babiloniae xchiʼuk lilijem kom.+
¡Okʼanik ta stojolal!+
Saʼik tal balsamo sventa li kʼusi kʼux chaʼie; yikʼaluk van xpoxtaj to».
9 «Laj xa kakʼkutik persa xpoxtael li Babiloniae, pe muʼyuk xpoxtaj.
Iktaik komel, sutkutik batel ta jlumaltik ta jujuntal.+
Yuʼun li smul ti sta-o xichʼ chapanele kʼotem xa kʼalal to ta vinajel;
solel toyol oy kʼuchaʼal li toke.+
10 Tukʼ xa kʼusitik tspas ta jtojolaltik li Jeovae.+
Laʼik, bat kaltik ta Sion li kʼusitik spasoj li Jeova ti jaʼ Jdiostike».+
11 «Juxbeik sniʼ li flechaetike;+ tsakik li set-set eskudoetike.*
Li Jeovae la stijbe yoʼonton li ajvaliletik yuʼun jmediaetike,+
yuʼun oy ta yoʼonton tslajesbe skʼoplal li Babiloniae.
Yuʼun jaʼ tspak sutel li Jeovae, tspakbe skʼoplal li stemploe.
12 Toyik muyel junuk senyail*+ sventa xbat ajinesbeik li smuroal Babiloniae.
Akʼik mas jchabivanejetik, vaʼanik jchabivanejetik.
Chapanik li buchʼutik chmakvanik ta bee.
Yuʼun li Jeovae oy xa kʼusi snopoj tspas
xchiʼuk chkʼot ta pasel yuʼun li kʼusi yaloj tspas ta stojolal li jnaklejetik ta Babiloniae».+
13 «Ants ti nakalot ta sba epal voʼe,+
ti ep akʼulejale,+
vul xa alajeb, liʼ noʼox kʼalal slajeb li akanale.+
14 Li Jeova ti jaʼ bankilal yuʼun soltaroetike xi jamal yaloj ta skoj sbi stuke:
‹Ta jtak tal epal viniketik ta atojolal jech kʼuchaʼal sbuset tajek li kʼulubetike
xchiʼuk ch-avanik ta skoj ti la stsalikote›.+
15 Jaʼ la spas ta sjuʼel li balumile,
jaʼ la snakan ta spʼijil li balumil ti bu lek xchʼi kʼusitike+
16 Kʼalal chakʼ ta aʼiel li yechʼomal yee,
solel xvoʼoʼet li voʼ te ta vinajele
xchiʼuk jaʼ chakʼ toyuk muyel li tok* ti te oy ta spajeb balumile.
17 Skotol li krixchanoetike chakʼik ta ilel ti mu snaʼik snopele xchiʼuk ti chʼabal yojtikinobil yuʼunike.
Skotol li buchʼu chabtelan takʼine ta xichʼik akʼel ta kʼexlal ta skoj li lokʼoletik tspasike;+
yuʼun jecheʼ li lokʼoletik yuʼunik ti pasbil ta unijesbil takʼine
18 Muʼyuk kʼusi xtunik-o,+ jaʼ noʼox pasbilik sventa xichʼik labanel.
Kʼalal mi kʼot yorail chichʼik akʼbel kastigoe, ta xlaj skʼoplalik.
19 Li Dios yuʼun* Jakobe mu xkoʼolaj kʼuchaʼal li kʼusitik taje,
yuʼun jaʼ la spas skotol li kʼusitik oye
Li sbie jaʼ Jeova ti bankilal yuʼun soltaroetike».+
20 «Kʼotemot kuʼun kʼuchaʼal jun teʼ sventa paskʼop, kʼotemot ta kabtejeb sventa paskʼop,
yuʼun ta jtunesot sventa ta jlajes li mukʼtik lumetike.
Ta jtunesot sventa ta jlajes li jteklumetike.
21 Ta jtunesot sventa ta jlajes li kaʼe xchiʼuk li buchʼu tskajlebine.
Ta jtunesot sventa ta jlajes li kareta sventa paskʼope xchiʼuk li buchʼu te kajal batele.
22 Ta jtunesot sventa ta jlajes li vinik xchiʼuk li antse.
Ta jtunesot sventa ta jlajes li mol xchiʼuk li chex kereme.
Ta jtunesot sventa ta jlajes li kerem xchiʼuk li tojol tsebe.
23 Ta jtunesot sventa ta jlajes li jchabichije xchiʼuk li xchijtake.
Ta jtunesot sventa ta jlajes li j-abtel ta osile xchiʼuk li xchonbolomtak ti tslokik balumile.
Ta jtunesot sventa ta jlajes li ajvaliletik xchiʼuk li itsʼinal jpasmantaletike.
24 Ta jtojbe sutel li Babilonia xchiʼuk skotol li jnaklejetik ta Kaldea
ta skoj li kʼusi chopol la spasik ta Sion ta yeloval asatike»,+ xi li Jeovae.
Ta jyeʼ talel jkʼob sventa ta jkontrainot xchiʼuk ta jbalalinot yalel ta tayal tontik
xchiʼuk chakʼot kuʼun ta kʼakʼemal vits».
26 Xi chal li Jeovae: «Li krixchanoetike muʼyuk xa te tsaʼik ta atojolal li ton sventa chikin nae mi jaʼuk li ton sventa snakleb nae,
yuʼun xokol chakom ta sbatel osil».+
27 «Toyik muyel junuk senyail* li ta jteklume.+
Jupanik kachu li ta mukʼtik lumetike.
Tʼujik* mukʼtik lumetik sventa xbat stsakik ta kʼop li Babiloniae.
Takik ta ikʼel jteklumetik ta Ararat,+ ta Mini xchiʼuk ta Askenas+ sventa skontrainik.
Vaʼanik bankilal soltaro sventa xbat skontrain.
Akʼo muyikuk tal kaʼetik ti xkʼuletik tal ta anil kʼuchaʼal li kʼulubetike.
28 Tʼujik* li mukʼtik lumetike,
li ajvaliletik ta Mediae,+ li itsʼinal ajvaliletike xchiʼuk skotol li itsʼinal jpasmantaletik yuʼune
xchiʼuk skotol li jteklumetik ti sventainojik sventa skontrainik li Babiloniae.
29 Li balumile ta xnik xchiʼuk ta xbakʼ,
yuʼun chkʼot ta pasel li kʼusi snopoj Jeova ta stojolal li Babiloniae,
sventa xibaluk sba xkom li yosilal Babiloniae xchiʼuk sventa mi junuk jnaklej xkom.+
30 Li yajsoltarotak Babiloniae muʼyuk xa tspasik kʼop.
Te chotolik ta stsatsal pojobbailik.
Chʼabal xa yipik,+
xkoʼolajik xa kʼuchaʼal antsetik.+
Li naetik tee laj xa yichʼ tsanbel skʼakʼal.
Laj xa yichʼ lilinbel li stakʼinaltak ochebal yuʼune.+
31 Xkʼot xkʼot noʼox j-almantaletik
xchiʼuk xkʼot xkʼot noʼox j-ichʼ-aʼyejetik
sventa xalbe ajvalil ta Babilonia ti laj xa yichʼ tsalel ta buyuk noʼox li steklumale,+
32 ti smakojbeik xa yoktak li voʼe,+
ti laj xa yichʼ chikʼel li varkoetik ti pasbil ta papiroe*
xchiʼuk ti solel xiʼemik ta jyalel li soltaroetike».
33 Yuʼun xi chal li Jeova ti jaʼ bankilal yuʼun soltaroetike, li Dios yuʼun Israele:
«Li stseb Babiloniae xkoʼolaj kʼuchaʼal yikʼaobil tsʼunobil.
Jaʼ xa yorail chichʼ pechʼilanel ta tekʼel sventa tsinil xkom.
Jutuk xa skʼan xkʼot yorail ti chichʼ tsobel kʼuchaʼal tsʼunobile».
34 «Laj xa slilinun ta tiʼel li Nabukodonosor* ti jaʼ ajvalil ta Babiloniae;+
mu xa jnaʼ kʼusi ta jpas yuʼun.
Jecheʼ xa te vuchul laj yiktaun kʼuchaʼal jpʼej pʼin ti chʼabal xa sbele.
Laj xa sbikʼun kʼuchaʼal chbikʼvan jkot mukʼta kiletel chon;+
noj-o xa lek xchʼut li kʼusitik lekik kuʼune.
Laj xa sjipun lokʼel li ta kavile.
35 Xi chal li jnaklej ta Sione: ‹¡Akʼo kʼotuk ta sba Babilonia li kʼusi chopol laj kichʼ pasbele!›.+
Xi chal li Jerusalene: ‹¡Akʼo kʼotuk ta sba jkaldeaetik li jchʼichʼele!›».
36 Jaʼ yuʼun, xi chal li Jeovae:
Ta jtakijes li nab tee xchiʼuk ta xkules li posoetik
tee.+
37 Li Babiloniae jaʼ xa noʼox te tokol chkom slilijemal,+
chkʼot ta sna teʼtikal tsʼiʼetik,+
xibal sba chkom xchiʼuk chichʼ labanel,*
mi junuk jnaklej chkom.+
38 Skotolik xloket snukʼik* kʼuchaʼal chʼiom leonetik.*
X-avlajetik kʼuchaʼal kʼox leonetik».
39 Xi chal li Jeovae: «Kʼalal jaʼo oy kʼusi tskʼan tajek yoʼontonike, chkakʼbe sveʼelik xchiʼuk yuchʼbolik,
vaʼun chyakubik kuʼun sventa xkuxetuk yoʼontonik;+
laje jal tajek ta xvayik,
muʼyuk xa chjulavik-o».+
40 «Chkakʼ ti akʼo yichʼik ikʼel batel sventa xichʼik milel kʼuchaʼal chʼiom chijetike,
kʼuchaʼal tot chijetik ti jmoj chbatik xchiʼuk li tentsunetike».
41 «¡Solel och xa ta kʼabal li Sesake,*+
laj xa yichʼ uʼuninel li jteklum ti chkʼupil kʼoptaat toʼox yuʼun skotol li krixchanoetike!+
¡Solel chiʼik-o mukʼtik lumetik kʼalal chilik li Babiloniae!
42 Muyem xa talel nab ta stojolal li Babiloniae.
Mutʼij* xa ta skoj ti xyukʼlajet tajeke.
43 Xibal sba kom li jteklumetik yuʼune, xkoʼolaj kʼuchaʼal takixokol balumil xchiʼuk stenlejaltik ti takin tajeke.
Muʼyuk buchʼu te chnaki xchiʼuk muʼyuk buchʼu te chjelav batel.+
44 Ta xkakʼ batel jsat ta stojolal li dios Bel+ ta Babiloniae
xchiʼuk ta jlokʼesbe ta ye li kʼusi laj xa sbikʼe.+
Muʼyuk xa chtal ta stojolal li mukʼtik lumetike
xchiʼuk ta xjin yalel li smuroal Babiloniae.+
45 ¡Jteklumal,+ lokʼanik tal te!
¡Jatavanik batel sventa mu xachamik+ li ta skʼakʼal yoʼonton Jeovae!+
46 Mu me xnik li avoʼontonike, mu me xaxiʼik ta skoj li kʼusi chavaʼiik ta jteklume.
Leʼ batel ta jun jabile, chtal jun aʼyej,
li ta yan jabile, chtal yan aʼyej
ti oy paskʼop li ta balumile xchiʼuk ti tskontrain sbaik li ajvaliletike.
47 Jaʼ yuʼun, chkʼot skʼakʼalil
ti chkakʼ batel jsat ta stojolal li lokʼoletik ta Babiloniae.
Chichʼ akʼel ta kʼexlal sjunul li slumale
xchiʼuk te lamal chkom li jnaklejetik yuʼun ti chlajik ta milele.+
48 Li vinajel xchiʼuk balumil xchiʼuk skotol li kʼusitik oy tee
ch-avanik ta muyubajel kʼalal mi laj yichʼ tsalel li Babiloniae,+
yuʼun chlik talel ta norte li buchʼutik tslajesate»,+ xi li Jeovae.
49 «Li Babiloniae maʼuk noʼox la smil li j-israeletike,+
yuʼun ep buchʼutik te chamik ta Babilonia ti likemik tal ta spʼejel balumile.
50 Voʼoxuk ti muʼyuk xalajik ta espadae, ¡lokʼanik batel, mu teuk vaʼal xakomik!+
Te to ta nom xavules ta ajolik li Jeovae
xchiʼuk teuk ta ajolik li Jerusalene».+
51 «Ta kʼexlal likomkutik, yuʼun laj kaʼikutik ti chlabanvanike.
Solel chkʼexav li jsatkutike,
yuʼun li jyanlumetike* ochik xa ti butik chʼul ta sna Jeovae».+
52 «Jaʼ yuʼun, chkʼot skʼakʼalil
ti chkakʼ batel jsat ta stojolal li lokʼoletik yuʼune,
ta skoj taje, ta sjunul yosilal x-avetik ta okʼel li buchʼutik yayijemike»,+ xi li Jeovae.
53 «Akʼo mi xmuy batel kʼalal to ta vinajel li Babiloniae+
xchiʼuk akʼo mi stsatsubtas to mas li tayal kʼelob osil yuʼune,
ta jtak talel jlajesvanejetik ta stojolal»,+ xi li Jeovae.
54 «¡Chikintaik! Oy buchʼutik x-avetik te to ta Babilonia,+
chichʼ aʼiel ti oy tsatsal vokolil li ta yosilal jkaldeaetike,+
55 yuʼun yakal tslajes Babilonia li Jeovae,
chakʼbe slajeb li yechʼomal ye ti tsots chbakʼe.
Ti kʼu yelan xvochetik* kʼotel li yajkontraike xkoʼolaj kʼuchaʼal ti kʼu yelan xvoʼoʼet li nabe.
Chichʼ aʼiel li yechʼomal yeike.
56 Yuʼun chtal ta stojolal Babilonia li jlajesvaneje;+
li yajsoltarotake ta x-ochik ta kʼabal,+
chichʼ lilinbel li s-arkoike,
yuʼun li Jeovae jaʼ jun Dios ti tspak sutele.+
Jpʼel skʼoplal ta stojbe sutel.+
57 Ta jyakubtas li bankilaletik yuʼune xchiʼuk li buchʼutik pʼijik yuʼune,+
li ajvaliletik yuʼune xchiʼuk skotol li itsʼinal jpasmantaletik yuʼune xchiʼuk li yajsoltarotake,
laje jal tajek ta xvayik,
muʼyuk xa chjulavik-o»,+ xi li Ajvalile, jaʼ li Jeova ti bankilal yuʼun soltaroetik sbie.
58 Xi chal li Jeova ti jaʼ bankilal yuʼun soltaroetike:
«Akʼo mi lek pim pasbil li smuroal Babiloniae, ta xichʼ lilinel ta j-echʼel,+
akʼo mi lek toyol li ochebaletike, chichʼ chikʼel ta
kʼokʼ.
Li jteklumetike jecheʼ noʼox laj yakʼ svokolik ti tsots abtejike,
li mukʼtik lumetike jecheʼ noʼox la slubtsan sbaik sventa xichʼ chikʼel ta kʼokʼ».+
59 Li j-alkʼop Jeremiase jech laj yalbe batel mantal li Seraya ti jaʼ xnichʼon Nerias+ xchiʼuk ti jaʼ smom Maseya kʼalal bat ta Babilonia xchiʼuk li Sedekias ti jaʼ ajvalil ta Judae, taje jaʼo kʼalal xchanibal xa ox jabil yochel ta ajvalile; li Serayae jaʼ sbainoj li kʼusitik oy yuʼun ajvalile. 60 Li Jeremiase ta jlik noʼox livro la stsʼiba skotol li vokolil ti chvul ta stojolal Babiloniae, taje jaʼ skotol li kʼusitik laj yichʼ tsʼibael ta stojolal li Babiloniae. 61 Jech xtok, li Jeremiase xi laj yalbe li Serayae: «Kʼalal mi lakʼot ta Babiloniae xchiʼuk mi laj avil ta asate, skʼan tsots xavapta skotol li kʼusitik liʼ tsʼibabile. 62 Vaʼun, xi xavale: ‹Kajval Jeova, avaloj xa onoʼox ti chichʼ lajesel li jteklum liʼe xchiʼuk ti mi junuk jnaklej chkome, mi jaʼuk krixchano xchiʼuk mi jaʼuk chonbolom xchiʼuk ti xokol chkom ta sbatel osile›.+ 63 Kʼalal mi tsuts avuʼun yaptael li livro liʼe, chukbo jpʼejuk ton, vaʼun jipo ochel ta ukʼum Eufrates. 64 Laje, xi xavale: ‹Jaʼ jech ta xmutʼij* yalel li Babiloniae, muʼyuk xa chtots tal yan velta+ ta skoj li vokolil chkakʼ talel ta stojolale, vaʼun ta xlubtsajik li jnaklejetik tee›».+
Liʼ vul ta tsutsel li kʼusi laj yal Jeremiase.