Jeremias
50 Li j-alkʼop Jeremiase oy kʼusi albat yuʼun Jeova ta sventa li Babiloniae,+ ta sventa li yosilal jkaldeaetike, xi albate:
2 «Alik batel li ta mukʼtik lumetike xchiʼuk pukbeik batel skʼoplal.
Vaʼanbeik jun senyail* xchiʼuk pukbeik batel skʼoplal.
¡Mu xamukik jutebuk!
Xi xavalike: ‹Och xa ta kʼabal li Babiloniae.+
Laj xa yichʼ akʼel ta kʼexlal li dios Bele.+
Nik xa ta xiʼel li dios Merodake.
Laj xa yichʼ akʼel ta kʼexlal li lokʼoletik yuʼune.
Tʼelik* xa ta xiʼel li ibal sba santoetik* yuʼune›.
3 Yuʼun lik xa tal jun mukʼta lum ta norte sventa xkontrainat.+
Toj xibal sba chiktabe li slumale.
Muʼyuk xa buchʼu te nakal.
Jatavik xa batel li krixchanoetike xchiʼuk li chonbolometike;
lokʼik xa batel».
4 Xi chal li Jeovae: «Li vaʼ orae xchiʼuk li vaʼ kʼakʼale, jmoj tsutik tal li j-israeletik xchiʼuk judaetike.+ X-okʼoletik kʼalal chanavik tale+ xchiʼuk jmoj tsaʼik li Jeova ti jaʼ Sdiosike.+ 5 Ta sjakʼbeik batel sbelel li Sione, te xa skʼelojik batel+ kʼalal xi chalike: ‹Laʼik xchiʼuk bat jpastik jun trato xchiʼuk li Jeovae, ti muʼyuk chichʼ chʼayel ta jolile›.+ 6 Li jteklumale kʼot xa kʼuchaʼal jtsop chij ti chʼayemike.+ Jaʼ kʼejpʼunatik* yuʼun li jchabichij yuʼunike.+ Kʼejpʼunatik batel ta vitsetik, xyal xmuyik ta vits xchiʼuk ta bikʼtal vitsetik. Chʼay xa ta sjolik ti bu chkux yoʼontonike. 7 Kʼalal taatik yuʼun li yajkontraike,+ lilinatik ta tiʼel xchiʼuk xi laj yalike: ‹Maʼuk ta jmultik, yuʼun la saʼ smulik ta stojolal li Jeovae, ti te oy ta stojolal li tukʼilale xchiʼuk li spatobil yoʼonton smoltotakike, ti jaʼ li Jeovae›».
8 «Jatavanik lokʼel li ta Babiloniae,
lokʼanik li ta yosilal jkaldeaetike+
xchiʼuk jechuk xakʼotik kʼuchaʼal li chonbolometik ti jbabe chbat yuʼunik li jtsop chijetike.
9 Yuʼun ta jvaʼan xchiʼuk chkikʼ tal ta stojolal Babilonia
epal mukʼtik lumetik ti chlik talel ta yosilal nortee.+
Xcholoj sbaik sventa xtal stsakik ta kʼop,
vaʼun ch-och ta skʼobik.
Li sflechaike xkoʼolaj kʼuchaʼal sflecha jun jpaskʼop
ti tsmilbe yalab xnichʼnab li totil meʼiletike,+
mi jsetʼuk* tstselpʼuj yuʼunik.
10 Chpojbatik batel kʼusitik yuʼunik li jkaldeaetike.+
Jun yoʼonton chkomik skotol li buchʼutik tspojik batele»,+ xi li Jeovae.
Yuʼun xatekʼomajik noʼox kʼuchaʼal tsebal meʼ vakax ta yaxaltik
12 Laj xa yichʼ akʼel ta kʼexlal li ameʼike.+
Chopol xa chaʼi sba li buchʼu la svokʼesoxuke.
¡Kʼelavil! Jaʼ mukil kʼotem yuʼun li yantik mukʼtik lumetike,
jun takixokol balumil ti chʼabal yaʼlele xchiʼuk jun stenlejaltik ti takin tajeke.+
Skotol li buchʼutik te ch-echʼik ta Babiloniae chchʼay xchʼulelik ta xiʼel kʼalal chilike
14 Akotolik ti xatojobik lek stunesel li arkoe,
laʼ tsakik ta kʼop li Babiloniae, ta buyuk noʼox cholo abaik tal sventa xtal atsakik ta kʼop.
Tʼilesbeik batel li flechae, tunesik ti bu kʼalal chtun avuʼunike,+
yuʼun laj xa saʼ smul ta stojolal li Jeovae.+
15 Tsots xa-avanik sventa xatsakik ta kʼop, avananik tal ta spat xokon.
Laj xa yakʼ sba ta kʼabal.*
Jin xa yalel li oyetik yuʼune xchiʼuk lilij xa li smuroaltake,+
yuʼun jaʼ spakobil sutel yuʼun li Jeovae.+
Pakbeik sutel.
Jech xapasbeik jech kʼuchaʼal la spas eke.+
16 Tupʼbeik skʼoplal ta Babilonia li jtsʼunolajele
xchiʼuk li buchʼu tstunes jos* kʼalal chichʼ tsobel li tsʼunobile.+
Ta skoj li jmilvanej espadae, ta jujuntal tsut batel ta slumalik,
ta jujuntal chjatavik batel ti bu likemik tale.+
17 »Li jteklum Israele jaʼik li chijetik ti tanpuk batemike.+ Tanpuk batik ta skoj li leonetike.+ Baʼyele, lilinatik ta tiʼel yuʼun li ajvalil ta Asiriae;+ laje jechʼbat sbakilik yuʼun li Nabukodonosor* ti jaʼ ajvalil ta Babiloniae.+ 18 Yuʼun xi chal li Jeova ti jaʼ bankilal yuʼun soltaroetike,* li Dios yuʼun Israele: ‹Chkakʼbe kastigo li ajvalil ta Babiloniae xchiʼuk li steklumale, jech kʼuchaʼal laj kakʼbe kastigo li ajvalil ta Asiriae.+ 19 Jech xtok, chkikʼ sutel tal ta sveʼeb li Israele,+ vaʼun te chveʼ li ta Karmeloe xchiʼuk li ta Basane,+ te chetʼes yoʼonton li ta vitstikaltik yuʼun Efraine+ xchiʼuk li ta Galaade›».+
20 Xi chal li Jeovae: «Li vaʼ orae xchiʼuk li vaʼ kʼakʼale,
chichʼ sabel smul li Israele,
pe muʼyuk kʼusi chichʼ tabel
xchiʼuk muʼyuk chichʼ tabel smul li Judae,
yuʼun ta jchʼaybe smulik li buchʼutik kuxul chkiktae».+
21 Xi chal li Jeovae: «Muyan batel, bat tsako ta kʼop li yosilal Merataime xchiʼuk li jnaklejetik ta Pekode.+
Akʼo yichʼik milel xchiʼuk akʼo yichʼik lajesel ta j-echʼel.
Jech xapas skotol li kʼusi laj kalbot xae.
22 Chichʼ aʼiel paskʼop li ta jteklume
xchiʼuk oy jun mukʼta vokolil.
23 ¡Laj xa yichʼ vokʼel xchiʼuk lilinel li martiyo ti tsten skotol li mukʼta lumetik ta balumile!+
¡Toj echʼ noʼox xibal sba kom ta stojolal mukʼtik lumetik li Babiloniae!+
24 Babilonia, la jtimanbot chʼojon xchiʼuk chukbil lakʼot,
pe muʼyuk laj avakʼ venta.
Laj avichʼ tael xchiʼuk la-och ta kʼabal,+
yuʼun la akontrain li Jeovae.
25 Li Jeovae sjamoj xa li snail abtejebal sventa paskʼop yuʼune
xchiʼuk tslokʼes tal li abtejebaletik sventa chakʼ ta ilel li skʼakʼal yoʼontone.+
Yuʼun li Ajvalil ti jaʼ Mukʼul Jpasmantale, li Jeova ti jaʼ bankilal yuʼun soltaroetike, oy kʼusi tspas
li ta yosilal jkaldeaetike.
26 Voʼoxuk ti nom likemoxuk tale, ochanik ta skontrainel.+
Jambeik li snail stsʼunobe.+
Tokanik lokʼel li kʼusitik spojoj jech kʼuchaʼal chichʼ tokanel sat tsʼunobile.
Tupʼbeik skʼoplal ta j-echʼel li jteklume.+
Muʼyukuk buchʼu te xkom.
27 Milbeik skotol li chʼiom tot vakaxetik tee;+
akʼo yichʼik ikʼel batel sventa xichʼik milel.
¡Abol sbaik, yuʼun kʼot xa li skʼakʼalilike,
li yorail ti ch-akʼbatik kastigoe!
28 Chichʼ aʼibel yechʼomal ye li buchʼutik chjatavik batele,
li buchʼutik chjatavik lokʼel ta yosilal Babiloniae,
sventa chalik ta Sion ti tspak sutel li Jeova Dios kuʼuntike,
ti tspakbe skʼoplal li stemploe.+
29 Takik ta ikʼel j-akʼflechaetik sventa skontrainik li Babiloniae,
takik ta ikʼel li buchʼutik xtojobik lek stunesel li arkoe.+
Te xapas akarpanaik ta spat xokon; muʼyukuk buchʼu xjatav avuʼunik.
Jech xatojbeik sutel ti kʼu yelan yabtele.+
Jech xapasbeik jech kʼuchaʼal la spas eke.+
Yuʼun xtoyet tajek la skontrain li Jeovae,
la skontrain li Buchʼu chʼul yuʼun Israele.+
30 Li vaʼ kʼakʼale, te lamal chkomik ta skayealtak* jteklum li keremetike+
xchiʼuk chlaj* skotol li soltaroetik ta jteklume», xi li Jeovae.
31 Li Ajvalil ti jaʼ Mukʼul Jpasmantale, li Jeova ti jaʼ bankilal yuʼun soltaroetike, xi chale: «¡Kʼelavil! Voʼot ti chasaʼvan ta kʼope,+ ta jkontrainot.+
Yuʼun ta persa chvul li akʼakʼalile, li yorail ti chkakʼbot kastigoe.
Jech xtok, ta jtsanbe skʼakʼal li jteklumetik avuʼune,
chchikʼ skotol li kʼusitik oy ta apat axokone».
33 Xi chal li Jeova ti jaʼ bankilal yuʼun soltaroetike:
«Li jteklum Israel xchiʼuk Judae chichʼik ilbajinel
xchiʼuk skotol li buchʼutik laj yichʼik chukel batele te xa ikʼatik-o komel.+
Mi jutebuk koltaatik sutel tal.+
34 Pe lek tsots li Jchaʼmanvanej yuʼunike.+
Li sbie jaʼ Jeova ti bankilal yuʼun soltaroetike.+
Jpʼel skʼoplal chpakbat skʼoplalik ta chapanobbail+
sventa xakʼbe xkux li slumal Israele+
xchiʼuk ti xakʼbe svokol li jnaklejetik ta Babiloniae».+
35 Xi chal li Jeovae: «Yebil xa s-espadail li jkaldeaetike,
li jnaklejetik ta Babiloniae, li bankilaletik yuʼune xchiʼuk li pʼijil viniketik yuʼune.+
36 Yebil xa s-espadail li jecheʼ j-alkʼopetike, vaʼun mu xa snaʼ kʼusi tspasik.
Yebil xa s-espadail li soltaroetik yuʼune, vaʼun chnikik ta xiʼel.+
37 Yebil xa s-espadail li skaʼike, li skaretaik sventa paskʼope
xchiʼuk skotol li buchʼutik jeltos slumalik ti te nakalike,
ta xkʼotik kʼuchaʼal antsetik ti ta xiʼike.+
Yebil xa s-espadail li skʼulejale, vaʼun tspojik batel.+
38 Chichʼ lajesbel li yaʼalike xchiʼuk ch-ulesbatik.+
Yuʼun li Babiloniae noj ta lokʼoletik+
xchiʼuk chlik xchuvajik ta skoj ti chilik kʼusitik xibalik sbae.
39 Jaʼ yuʼun, li chonbolometik ta takixokol balumile koʼol chnakiik xchiʼuk li chonbolometik ti ch-avanike
xchiʼuk te chnakiik li avestrusetike.+
Muʼyuk xa chichʼ naklebinel-o
xchiʼuk muʼyuk te chbat nakiikuk li jaykʼol kuxlejal chjelave».+
40 «Jech kʼuchaʼal laj yichʼ lajesel yuʼun Dios li Sodoma, Gomorra+ xchiʼuk li jteklumetik ti te noʼox nopolike,+ jaʼ jech chkʼot ta stojolal ek, muʼyuk buchʼu te chnaki xchiʼuk mi junuk krixchano te tspas sna»,+ xi li Jeovae.
41 «¡Kʼelavilik! Chlik talel jun jteklum ta norte;
chichʼ biiltasel jun mukʼta lum xchiʼuk mukʼul ajvaliletik+
ti chlikik tal ta namal balumile.+
42 Xtojobik stunesel li arko xchiʼuk javalinae.*+
Toj chopolik xchiʼuk muʼyuk xkʼuxul yoʼontonik.+
Kʼalal kajalik tal ta skaʼike,
xkoʼolajik kʼuchaʼal nab ti xvoʼoʼet ta jyalele.+
Xkoʼolajik kʼuchaʼal jun noʼox vinik ti kʼu yelan lek xcholoj sbaik tal sventa xtal stsakikot ta kʼope, voʼot ti stsebot Babiloniae.+
Solel chat yoʼonton ta jyalel,+
kʼux tajek chaʼi, xkoʼolaj kʼuchaʼal jun ants kʼalal chvokʼ yole.
44 »¡Kʼelavilik! Oy buchʼu chlokʼ talel kʼuchaʼal jkot leon te ta pimil chʼixtikaltik ta xokon Jordan sventa te chbat ti butik jun yoʼonton chaʼi sbaik li chijetike, pe ta anil noʼox ta jnutsik* lokʼel li ta yosilalike. Te ta jvaʼan li buchʼu tʼujbile.+ Yuʼun ¿buchʼu xikoʼolaj xchiʼuk? ¿Buchʼu xuʼ yuʼun stsalun? ¿Mi oy junuk jchabichij ti xuʼ vaʼal xkom ta kelovale?+ 45 Jaʼ yuʼun, viniketik, chikintaik li kʼusi snopoj tspas* Jeova ta stojolal li Babiloniae+ xchiʼuk li kʼusi snopoj tspas ta stojolal li yosilal jkaldeaetike:
jpʼel skʼoplal chichʼik jochel batel li chʼiom chijetike.
Xokol chkom yuʼun ti bu toʼox nakalike, jech chkʼot ta pasel ta skoj smul stukik.+
46 Solel xvoʼoʼet ta jyalel kʼalal ch-och ta kʼabal li Babiloniae, chnik yuʼun sjunul li balumile
xchiʼuk ti kʼu yelan x-avetike chichʼ aʼiel kʼalal to ta mukʼtik lumetik».+