Jeremias

37 Li ajvalil Sedekias+ ti jaʼ xnichʼon Josiase jaʼ och ajvalilajuk ta xkʼexol li Konias*+ ti jaʼ xnichʼon Jeoiakime, yuʼun li Nabukodonosor* ti jaʼ ajvalil ta Babiloniae la svaʼan ta ajvalil ta yosilal Juda.+ 2 Pe li ajvalil Sedekiase, li yajtuneltake xchiʼuk li krixchanoetik ta jteklume muʼyuk la xchikintaik li kʼusi laj yal Jeova ta stojolal li j-alkʼop Jeremiase.

3 Li ajvalil Sedekiase la stak batel li Jeukal+ ti jaʼ xnichʼon Selemiase xchiʼuk li Sofonias+ ti jaʼ xnichʼon li pale Maaseyae, takatik batel sventa xi xbat yalbeik li j-alkʼop Jeremiase: «Avokoluk, paso orasion ta jtojolaltik, kʼopono li Jeova ti jaʼ Jdiostike». 4 Li Jeremiase buyuk toʼox xuʼ xbat li ta jteklume, yuʼun muʼyuk toʼox stikʼojik ta chukel.+ 5 Vaʼun, li yajsoltarotak faraone lokʼik tal ta Ejipto,+ pe li jkaldeaetik ti te toʼox setuojik Jerusalene laj yaʼiik ti talik xae. Jaʼ yuʼun, laj yiktaik ta skontrainel li Jerusalene.+ 6 Laje, kʼoponat tal yuʼun Jeova li j-alkʼop Jeremiase, xi albate: 7 «Xi chal li Jeova ti jaʼ Dios yuʼun Israele: ‹Xi skʼan xavalbeik li ajvalil ta Juda ti jaʼ la stakoxuk tal sventa xtal akʼanbeikun vokole: «¡Kʼelavilik! Li yajsoltarotak faraon ti chtal skoltaoxuke persa tsut batel ta slumalik, ta Ejipto.+ 8 Ta sutik tal li jkaldeaetike, ta stsakik ta kʼop li jteklum liʼe, ta xuʼuninik xchiʼuk ta xchikʼik ta kʼokʼ».+ 9 Xi chal li Jeovae: «Mu xaloʼla abaik kʼalal xi chavalike: ‹Jpʼel skʼoplal muʼyuk xa tsut tal li jkaldeaetike›, yuʼun persa tsutik tal. 10 Akʼo onoʼox mi stsal avuʼunik skotol li yajsoltarotak jkaldeaetik ti yakal tstsakoxuk ta kʼope xchiʼuk ti kʼajomal xa noʼox te chkom li sviniktakik ti yayijemike, akʼo mi jech, ta onoʼox xtotsik lokʼel tal li ta skarpanaike xchiʼuk chchikʼik ta kʼokʼ li jteklum liʼe»›».+

11 Kʼalal lokʼik xa ox batel ta Jerusalen li yajsoltarotak jkaldeaetik ta skoj ti talik li yajsoltarotak faraone,+ 12 li Jeremiase lokʼ batel ta Jerusalen, bat ta yosilal Benjamin+ sventa xichʼ sparte osil ti bu oy li xchiʼiltake. 13 Pe kʼalal kʼot li ta ochebal ti Benjamin sbie, li bankilal jchabiej ochebal Iriya ti jaʼ xnichʼon Selemiase xchiʼuk ti jaʼ smom li Ananiase la stsak li j-alkʼop Jeremiase xchiʼuk xi laj yalbee: «¿Mi yuʼun chajipunkutik komel sventa xabat xchiʼuk li jkaldeaetike?». 14 Xi la stakʼ li Jeremiase: «¡Mu meleluk maʼ taje! Muʼyuk chkiktaoxuk sventa xibat xchiʼuk li jkaldeaetike». Pe muʼyuk la xchikinta li Iriyae. Jaʼ yuʼun, la xchuk batel li Jeremiase xchiʼuk laj yikʼ batel ta stojolal li bankilaletike. 15 Solel kapem tajek sjolik ta stojolal Jeremias li bankilaletike,+ la smajik xchiʼuk te la sbajik+ ta sna li Jeonatan ti jaʼ sekretarioe, yuʼun spasojik xa onoʼox ta chukinab. 16 Li Jeremiase laj yichʼ tikʼel ta jun chukinab ti ta yut balumil oye xchiʼuk epal kʼakʼal te laj yichʼ chukel.

17 Vaʼun, li ajvalil Sedekiase la stak ta ikʼel li Jeremiase xchiʼuk oy kʼusi la sjakʼbe ta mukul te ta sna.*+ Xi la sjakʼbee: «¿Mi oy kʼusi yaloj li Jeovae?». Xi la stakʼ li Jeremiase: «Oy». Xchiʼuk xi to laj yale: «¡Chavichʼ akʼel ta skʼob li ajvalil ta Babiloniae!».+

18 Li Jeremias eke xi la sjakʼbe li ajvalil Sedekiase: «¿Kʼusi xa noʼox chopol la jpas ta atojolal, ta stojolal avajtuneltak xchiʼuk ta stojolal li jteklum ti la atikʼikun ta chukele? 19 Avi une, ¿bu oy li j-alkʼopetik avuʼunik ti xi laj yalboxuke: ‹Li ajvalil ta Babiloniae muʼyuk chtal stsakoxuk ta kʼop xchiʼuk li alumalike›?+ 20 Avi une, kajval, chikintao li kʼusi chkale. Avokoluk, ajvalil kuʼun, akʼbun li kʼusi xivokolet ta jkʼane. Mu xatakun sutel ta sna li Jeonatan+ ti jaʼ sekretarioe, yuʼun mi la atakun sutele, te chicham».+ 21 Jaʼ yuʼun, li ajvalil Sedekiase laj yal mantal ti akʼo te xichʼ chukel ta Yamakʼ* Jchabivanejetik+ li Jeremiase xchiʼuk jujun kʼakʼal chichʼ akʼbel jun set-set pan ti te chlik tal li ta kaye ti bu tspasik pane,+ jaʼ to ti laj skotol li pan ta jteklume.+ Li Jeremias une te kom-o li ta Yamakʼ Jchabivanejetike.