Deuteronomio

22 »Mi oy laj avil ti chʼayem stot xvakax o xchij li avermanoe, mu me xapas aba ti muʼyuk laj avil yilele.+ Persa skʼan xavikʼbe batel li avermanoe. 2 Pe mi muʼyuk te nopol nakal li avermanoe o mi mu xavojtikin li avermanoe, ikʼo batel ta ana li chonbolome, te komuk ta ana jaʼ to mi kʼot saʼ li avermanoe. Vaʼun, skʼan xasutesbe.+ 3 Jaʼ me jech skʼan xapas mi oy la atabe jkotuk svuro, jlikuk skʼuʼ spokʼ o kʼusiuk noʼox ti chʼay yuʼun li avermanoe. Mu me teuk noʼox akʼeloj.

4 »Mi laj avil balchʼuj ta be svuro o stot xvakax li avermanoe, mu me xapas aba ti muʼyuk laj avil yilele. Persa skʼan xakolta ta stoyel.+

5 »Li antse mu me stakʼ slapbe skʼuʼ spokʼ li vinike, jech li vinik eke mu me stakʼ slapbe skʼuʼ spokʼ li antse. Yuʼun toj chopol chil Jeova Dios avuʼun li buchʼu jech tspase.

6 »Mi oy la ata junuk tas mut ta be ti oy sneneʼ mutal o stone, mi ta teʼ la ata o mi ta lumtik xchiʼuk mi te slutsʼoj yol o ston li meʼ mute, mu stakʼ xatsak batel xchiʼuk yol li meʼ mute.+ 7 Koltao batel li meʼ mute, jaʼ xuʼ xatsak batel li neneʼ mutetike. Lek chbat akuxlejal xchiʼuk jal chakuxi mi jech chapase.

8 »Mi chavaʼan jpʼejuk anae, pasbo smak ta sjoyobal li sjol anae+ sventa maʼuk ta smul chkom avutsʼ avalal mi mal chʼichʼ ta skoj ti oy buchʼu pʼaj* yalele.

9 »Mu me xakap ta tsʼunel chaʼtos sbekʼ tsʼunobil ti bu atsʼunoj a-uvae.+ Mi jech la apase, skotol li sat chakʼ li kʼusi la atsʼune persa chichʼ ichʼel batel ti bu chʼule xchiʼuk chichʼ ichʼel batel li sat a-uva eke.

10 »Mu me jmojuk xavakʼ slokik lum li jkot vakax xchiʼuk li jkot vuroe.+

11 »Mu me xalap jlikuk kʼuʼil mi kapbil yichʼoj pasel ta stsotsil chij xchiʼuk ta linoe.+

12 »Skʼan xapasbe sputsilal* ta xchanjotal xchikin li kʼuʼil pokʼil chatunese.+

13 »Mi oy jun vinik la saʼ yajnil ti lik spʼaj kʼalal laj xa ox xchiʼin ta vayele, 14 vaʼun ti tstikʼbe smul ti muʼyuk lek stalelale xchiʼuk ti muʼyuk lek skʼoplal chbat yuʼun ta skoj ti xi chale: ‹Laj kikʼ li ants liʼe, pe kʼalal la jchiʼin ta vayele, muʼyuk laj kilbe sprevail ti tojol tseb toe›. 15 Li stot smeʼ tsebe skʼan xichʼbeik batel moletik ta yochebal jteklum li sprevail ti tojol tseb toʼox li stsebike. 16 Li stot tsebe xi skʼan xalbe li moletike: ‹Laj kakʼbe yikʼ jtseb li vinik liʼe, pe li stuke laj xa spʼaj li jtsebe. 17 Tstikʼbe smul ti muʼyuk lek stalelale, xi chale: «Muʼyuk laj kilbe sprevail ti tojol tseb to li atsebe». Pe kʼelavilik, liʼ oy li sprevail ti tojol tseb toʼox kʼalal laj kakʼe›. Te une, tskʼiik ta yeloval moletik ta yochebal jteklum li sprevaile. 18 Laje, li moletike+ chikʼik batel li vinike xchiʼuk chakʼbeik kastigo.+ 19 Skʼan xakʼ sien siklo* plata multa, jaʼ chichʼ akʼbel li stot tsebe, yuʼun li vinike jecheʼ la sjutbe* smul jun tojol tseb ta Israel+ xchiʼuk jaʼ chkom-o ta yajnil. Mu stakʼ sutes ti kʼu sjalil kuxul li vinike.

20 »Pe mi melel li smule xchiʼuk mi muʼyuk sprevail ti jaʼ toʼox tojol tsebe, 21 skʼan xjochik batel ta stiʼ sna stot li tsebe, vaʼun li viniketik ta steklumale akʼo yakʼbeik ton jaʼ to mi chame, yuʼun toj kʼexlal sba ta stojolal Israel ti mulivaj*+ ta sna stote.+ Jaʼ jech chalokʼes ta atojolal li kʼusi chopole.+

22 »Mi oy jun vinik chchiʼin ta vayel jun ants ti oy xa smalale, persa skʼan xcham xchaʼvoʼalik, skʼan xcham li vinik ti la xchiʼin ta vayel li antse xchiʼuk skʼan xcham li ants eke.+ Jaʼ jech chalokʼes ta stojolal Israel li kʼusi chopole.

23 »Mi oy jun tojol tseb ti makbil xa yuʼun jun kerem ti taat yuʼun jun vinik li ta jteklume xchiʼuk mi chiʼinat ta vayele, 24 xchaʼvoʼalik skʼan xajochik batel ta yochebal jteklum sventa xichʼik akʼbel ton jaʼ to mi chamike, li tsebe chcham ta skoj ti muʼyuk x-avan li ta jteklume, li vinike chcham ta skoj ti laj yakʼbe ta kʼexlal li yajnil xchiʼile.+ Jaʼ jech chalokʼes ta atojolal li kʼusi chopole.

25 »Pe mi te la sta ta osiltik li tseb ti makbil xa xchiʼuk ti la suj sventa xchiʼin ta vayele, jaʼ noʼox akʼo yichʼ milel li vinik ti chiʼinvan ta vayele. 26 Pe mu kʼusi xapasbe li tsebe. Li tsebe muʼyuk smul ti sta-o xchame. Taje jaʼ jech chichʼ pasel jech kʼuchaʼal chichʼ pasbel li vinik ti tstsak ta majel xchiʼil ta krixchanoal* ti chcham-o yuʼune.+ 27 Yuʼun li vinike ta osiltik la sta li tseb ti makbil xae. Akʼo mi avan li tsebe, pe muʼyuk buchʼu te oy sventa xkoltaat.

28 »Mi oy jun vinik ti te la sta ta osiltik jun tojol tseb ti muʼyuk to makbile, ti la stsatsal tsak sventa xchiʼin ta vayel xchiʼuk mi ilatike,+ 29 li vinik ti la xchiʼin ta vayel li tsebe skʼan xakʼbe 50 siklo plata li stot tsebe.+ Li vinike jaʼ xa chikʼ-o li tsebe. Ta skoj ti laj yakʼ ta kʼexlale, mu xa stakʼ sutes ti kʼu sjalil kuxul li vinike.

30 »Sventa mu xakʼ ta kʼexlal stot li jun vinike, mu me stakʼ xikʼbe li yajnil stote.+