Jeremias
8 Xi chal li Jeovae: «Li vaʼ kʼakʼale, chichʼ lokʼesel ta smukinalik li sbakil ajvaliletik ta Judae, li sbakil bankilaletik yuʼunike, li sbakil paleetike, li sbakil j-alkʼopetike xchiʼuk li sbakil jnaklejetik ta Jerusalene. 2 Chichʼik kʼiel ta yeloval kʼakʼal, ta yeloval luna* xchiʼuk ta yeloval skotol li kʼanaletik ta vinajele,* yuʼun jaʼ la skʼanik, jaʼ tunik ta stojolal, jaʼ la stsʼakliik, jaʼ la saʼik xchiʼuk jaʼ la snijan sbaik ta stojolal.+ Muʼyuk ta xichʼik tsobel xchiʼuk mi jaʼuk chichʼik mukel. Ta xkʼotik kʼuchaʼal ikʼobal* ta sba balumil».+
3 Xi chal li Jeova ti jaʼ bankilal yuʼun soltaroetike:* «Ta skotol ti butik ta jpukik batel ti kʼu yepal kuxul chkomik li chopol utsʼ alalil taje, jaʼ tstʼujik li lajelale maʼuk li kuxlejale».
4 «Skʼan xi xavalanbee: ‹Xi chal li Jeovae:
«¿Mi muʼyuk xa van chtotsik mi yalik ta lume?
Mi sut talel junuke, ¿mi mu tauk sut talel li yan eke?
5 ¿Kʼu yuʼun jech-o muʼyuk tukʼ chakʼ sba ta jtojolal li jteklum liʼe, li Jerusalene?
Jaʼ noʼox batem ta yoʼontonik li loʼlavaneje;
mu skʼan xjelik.+
6 La jtsʼetan lek jchikin xchiʼuk te laj kaʼi-o, pe laj kaʼi ti muʼyuk tukʼ chkʼopojike.
Mi junuk vinik la sutes yoʼonton ta skoj li xchoplejale xchiʼuk mi jaʼuk xi tsjakʼbe sbae: ‹¿Kʼusi ti la jpase?›.+
Ta jujuntal jaʼ tstsʼakliik spasel li kʼusi tspasik yantike, xkoʼolajik kʼuchaʼal kaʼ ti xjipet batel ta anil ta paskʼope.
7 Li sigüenya mut ta vinajele snaʼoj lek kʼusi ora chvil batel ta yan lum;
li tortolae,* li vensejo mute xchiʼuk li sorsal* mute snaʼojik lek kʼusi ora tsutik talel.
Pe jaʼuk li jteklumale mu xaʼibeik smelolal bakʼin ta jchapanik, voʼon li Jeovaune»›.+
8 ‹¿Kʼuxi xa noʼox ti xi chavalike: «Pʼijunkutik xchiʼuk liʼ oy ta jkʼobkutik li smantal* Jeovae»?
Yuʼun li sekretarioetike* jaʼ noʼox tstunes slapisik sventa tstsʼibaik jutbil kʼopetik.*+
9 Laj xa yichʼik akʼel ta kʼexlal li buchʼutik pʼijike.+
Chʼay xa xchʼulelik ta xiʼel xchiʼuk laj xa yichʼik chukel ta chʼojon.
¡Kʼelavilik! Laj xa spʼajik li skʼop Jeovae,
jaʼ yuʼun, ¿mi oy van spʼijilik?
10 Jech oxal, chkakʼbe yan viniketik li yajnilike,
li yosilike chjel yajval kuʼun;+
yuʼun ta bikʼit ta mukʼ ta xloʼlavanik sventa spasik kanal takʼin;+
kʼalal ta j-alkʼop xchiʼuk ta pale chopol ti kʼu yelan tspasik kanal takʼine.+
11 Chakʼik persa yalojik chpoxtabeik syayijemal* li jteklumale, xi chalbeike:
«¡Oy jun oʼontonal! ¡Oy jun oʼontonal!»,
pe chʼabal jun oʼontonal.+
12 ¿Mi ta van xkʼexavik ta skoj li kʼusitik toj chopol spasojike?
¡Mi jsetʼuk* chkʼexavik!
¡Mi jaʼuk snaʼik kʼu yelan li kʼexlale!+
Jaʼ yuʼun, te chyalik ta lum ti bu yalemik ta lum li yantike.
Kʼalal mi laj kakʼbeik talel kastigoe, ta smak* yakanik›,+ xi li Jeovae.
13 Xi chal li Jeovae: ‹Kʼalal mi la jtsobike, chkakʼbe slajebik.
Chʼabal xa chkom sat li steʼel uvae, chʼabal xa chkom sat li steʼel igoe xchiʼuk chtakij li yanale.
Xchiʼuk chchʼay batel yuʼunik li kʼusitik laj kakʼbeike›».
14 «¿Kʼu yuʼun ti liʼ chotolutike?
Jtsob jbatik xchiʼuk ochkutik batel li ta jteklumetik ti lek joyol ta muroe+ xchiʼuk te chamkutik.
Yuʼun li Jeova ti jaʼ Jdiostike tstupʼ batel jkʼoplaltik
xchiʼuk chakʼ kuchʼtik voʼ ti oy svenenoale,+
yuʼun laj xa jsaʼ jmultik ta stojolal li Jeovae.
15 Jmalaojtik ox ti xtal jun oʼontonale, pe muʼyuk kʼusi lek tal;
jmalaojtik ox ti xkichʼtik poxtaele, ¡pe naka xiʼel vul ta jtojolaltik!+
16 Te to ta Dan chichʼ aʼiel ti tsvusilan sniʼ li skaʼike.
Ch-ochik xchiʼuk tslilinik li mukʼta lume xchiʼuk skotol li kʼusitik te oye,
li jteklume xchiʼuk li jnaklejetik tee».
17 «¡Kʼelavilik!, ta jtak talel ta atojolalik kiletel chonetik,
chonetik ti oy svenenoal ti mu stakʼ vovijesbel sjolike
xchiʼuk jpʼel skʼoplal ta stiʼoxuk», xi li Jeovae.
18 Muʼyuk xa noʼox xpoxil ti kʼu yelan chkat koʼontone.
Ip li koʼontone.
19 Te to ta namal balumil chichʼ aʼiel ti x-avet tskʼan koltael
li stseb jteklumale:
«¿Mi mu teuk oy ta Sion li Jeovae?
¿Mi mu teuk oy li ajvalil yuʼune?».
«¿Kʼu yuʼun la sabeikun skʼakʼal koʼonton ta skoj li lokʼoletik yuʼunike,
li yan diosetik* yuʼunik ti muʼyuk sbalilike?».
20 «¡Echʼ xa yorail li stsobbel sat tsʼunobile, laj xa yorail li veranoe,*
pe li voʼotike muʼyuk kichʼojtik-o pojel!».
21 Solel lilijem chkaʼi jba ta skoj ti yal xa ta lum li stseb jteklumale;+
solel chkat tajek koʼonton.
Vul xa ta jtojolal li xiʼele.
22 ¿Mi yuʼun chʼabal balsamo* li ta Galaade?+
¿Mi yuʼun chʼabal jpoxtavanej* te?+
¿Kʼu yuʼun muʼyuk poxtajem-o li stseb jteklumale?+