Deuteronomio

7 »Mi laj xa ox stikʼot ochel Jeova Dios avuʼun li ta osil ti poʼot xa x-och avuʼunine,+ tslokʼes batel ta atojolal xtok li mukʼtik lumetik ti mas ojtikinbilike,+ jaʼ li j-etetike, li jguirgaseoetike, li j-amorreoetike,+ li jkanaanetike, li jperisitaetike, li j-eveoetike xchiʼuk li jebusetike.+ Vukub mukʼtik lumetik ti mas ojtikinbilike xchiʼuk ti mas tsots xuʼ yuʼunik ti jaʼ mu sta li voʼote.+ 2 Chakʼbot ta akʼob li Jeova Dios avuʼune, vaʼun chalajesbe skʼoplal.+ Ta persa skʼan xalajesbe stsʼunbal.+ Mu me xapas junuk trato xchiʼukik mi jaʼuk xkʼuxubaj ta avoʼonton jutebuk.+ 3 Mu xavutsʼ avalalin aba xchiʼukik.* Mu xavakʼbe yikʼ atsebetak li skeremike xchiʼuk mu xavakʼbe yikʼ akeremtak li stsebike.+ 4 Yuʼun li tsebetik taje chchʼak batel akeremtak sventa xtunik ta stojolal yan diosetik+ ti jaʼ xa chiktaikun li voʼone. Mi jech la apasike, tstsan-o skʼakʼal yoʼonton ta atojolalik li Jeovae xchiʼuk ta anil noʼox tslajesoxuk.+

5 »Jaʼ lek xi xapasbeike: jinesbeik li skajleb matanaletik yuʼunike, lilinbeik li vaʼanbil chʼul ton yuʼunike,+ kʼasbeik li chʼul posteetik*+ yuʼunike xchiʼuk chikʼik li lokʼoletik spasojike.+ 6 Yuʼun kʼotemot ta xchʼul teklumal li Jeova Dios avuʼune, la stʼujot Jeova Dios avuʼun sventa xakʼot ta steklumal ti stuk xa noʼox jech* ta skotol li yan jteklumetik ta sba balumile.+

7 »Maʼuk ta skoj ti yuʼun mas epoxuk ti lek laj yiloxuk xchiʼuk ti la stʼujoxuk li Jeovae,+ yuʼun mas juteboxuk ta skotol li yan lumetike.+ 8 Ta skoj ti skʼanojoxuk li Jeovae xchiʼuk ti te-o ta sjol li kʼusi laj yakʼ ye ta stojolal li amoltotakike,+ la slokʼesoxuk ta yipal skʼob li Jeovae xchiʼuk la smanoxuk lokʼel li ta snail mosoile,+ jaʼ xkaltik, li ta skʼob ajvalil faraon ta Ejiptoe. 9 Anaʼoj lek ti jaʼ melel Dios li Jeova Dios avuʼune, ti jaʼ Dios ti tukʼ chakʼ sbae, ti chkʼot ta pasel yuʼun li strato xchiʼuk ti chakʼbe ta ilel tukʼil kʼanelal ta smilal noʼox ta kʼol kuxlejal li buchʼu skʼanojik xchiʼuk ti chchʼunbeik smantaltake.+ 10 Pe li buchʼutik chpʼajate chakʼbe stoj smul, tslajesbe skʼoplalik.+ Mu teuk noʼox smeyoj skʼob chkom ta stojolal li buchʼu chpʼajate, chakʼbe stoj smul ta satik. 11 Jaʼ yuʼun, kʼelo me lek ti kʼotuk ta chʼunel avuʼun li mantaletik xchiʼuk li kʼusitik chapanbil ti yakal chkalbot avie.

12 »Mi jech-o chachikinta li kʼusitik chapanbile, mi jech-o chavakʼ ta akuxlejal xchiʼuk mi jech-o chachʼune, li Jeova Dios avuʼune mu xchʼay-o ta yoʼonton li stratoe xchiʼuk li tukʼil kʼanelal ti laj yalbe ta jamal chakʼbe ta ilel li amoltotake. 13 Ta skʼanot, ta xakʼbot bendision xchiʼuk chakʼ epajan. Ta melel, li bendision chakʼbote jaʼ ti chakʼ epajuk li avalab anichʼnabtake*+ xchiʼuk ti chakʼ ep sat li kʼusitik chatsʼune, li atrigoe, li achʼ vinoe, li aseitee,+ li chʼiom tot vakaxetike xchiʼuk li chʼiom chijetike. Taje jech chkʼot ta pasel li ta balumil ti laj yalbe ta jamal amoltotak ti chakʼbote.+ 14 Ta skotol li jteklumetike, voʼot ti mas to ep bendision chavichʼe;+ muʼyuk chavil mi junuk vinik xchiʼuk mi junuk ants ti mu snaʼ x-alaj xnichʼnaje xchiʼuk mi jkotuk chonbolom ti mu snaʼ x-alaje.+ 15 Li Jeovae tslokʼes ta atojolal skotol li chamele xchiʼuk muʼyuk chakʼ taluk ta atojolal jtosuk tsatsal chamel jech kʼuchaʼal laj avil kʼot ta pasel ta Ejiptoe.+ Jaʼ noʼox chakʼ taluk ta stojolal li buchʼutik tspʼajote. 16 Skʼan xalajesbe skʼoplal skotol li jteklumetik chakʼbot ta akʼob li Jeova Dios avuʼune.+ Mu me aboluk sba xavil*+ xchiʼuk mu me xatun ta stojolal li sdiosike,+ yuʼun chkʼot kʼuchaʼal chʼojon ta atojolal.+

17 »Mi xi chlik loʼilajuk avoʼontone: ‹Mas toj epik li jujun jteklum leʼe, ¿kʼuxi xa noʼox xuʼ kuʼun ta jnutsik lokʼel?›,+ 18 mu me xaxiʼ yuʼun.+ Vuleso ta ajol kʼusi la spasbe faraon xchiʼuk sjunul Ejipto li Jeova Dios avuʼune.+ 19 Vuleso ta ajol ti yan to sba kʼutik yelan chapanvan* ti laj avil ta asate, li senyailtake, li skʼelobiltak juʼelale,+ li stsatsal skʼobe xchiʼuk ti ta sjuʼel la slokʼesot li Jeova Dios avuʼune.+ Li Jeova Dios avuʼune jaʼ jech tspasbe xtok skotol li jteklumetik ti chaxiʼ yuʼune.+ 20 Li Jeova Dios avuʼune tstak tal mukʼta at-oʼonton* ta stojolalik jaʼ to ti kʼuxi chlaj skʼoplalik li buchʼutik kuxul to komik+ ti tsnakʼ* toʼox sbaik ta atojolale. 21 Mu me xnik avoʼonton yuʼunik, yuʼun te xchiʼukot li Jeova Dios avuʼun+ ti jaʼ jun Dios ti xuʼ yuʼune xchiʼuk ti toj labal xa noʼox sba tajek li kʼusitik tspase.+

22 »Li Jeova Dios avuʼune ta kʼunkʼun tslokʼes batel ta atojolal li jteklumetike.+ Muʼyuk chakʼbot permiso ti ta anil chalajesbe skʼoplale sventa mu x-epaj ta atojolal li jtiʼvanej chonbolometike. 23 Li Jeova Dios avuʼune chakʼbot ta akʼob xchiʼuk tslajesbe skʼoplal jaʼ to mi chʼay stsʼunbal yuʼune.+ 24 Chakʼbot ta akʼob li ajvaliletik yuʼunike+ xchiʼuk chatupʼbe skʼoplal sbiik li ta yolon vinajele.+ Muʼyuk buchʼu chtal stsakot ta kʼop+ jaʼ to mi la atupʼbe skʼoplalike.+ 25 Skʼan xachikʼbe li slokʼol sdiosik spasojike.+ Mu me xpichʼ avoʼonton yuʼun li plata xchiʼuk li oro ti yichʼojan li slokʼol sdiosike,+ mu me xatsak sventa mu xapʼaj* yuʼun ta petsʼ, yuʼun toj chopol chil li Jeova Dios avuʼune.+ 26 Mu xavichʼ ochel ta yut ana li kʼusi toj ibal sba* ti jaʼ xa chavichʼ-o lajesel eke. Skʼan xakʼbot tajek ib oʼonton, skʼan ibal sba tajek xavil ta skoj ti chichʼ lajesbel skʼoplale.