Deuteronomio

14 »Voʼoxuke jaʼ xnichʼnaboxuk li Jeova Dios avuʼunike. Mu xayayijes abaik+ mi jaʼuk xajux amotsobik ta skoj junuk anima.+ 2 Yuʼun kʼotemot ta xchʼul teklumal+ li Jeova Dios avuʼune, jaʼ stʼujojot li Jeova sventa xakʼot ta steklumal ti stuk xa noʼox jech* ta skotol li yan jteklumetik ta sba balumile.+

3 »Mu xalajes jutebuk li kʼusi toj ibal sbae.*+ 4 Liʼe jaʼ li chonbolometik ti xuʼ xatiʼike:+ li vakaxe, li chije, li tentsune, 5 li jeltos teʼtikalchijetike, li gaselae, li teʼtikal tentsune, li antilope chije, li kolemal chije xchiʼuk li simaron chije. 6 Xuʼ xatiʼik kʼusiuk chonbolomal ti lek chʼakal li chaʼxol* svoyik xchiʼuk ti chchaʼxax sveʼelike. 7 Pe li chonbolometik ti chchaʼxax sveʼelik o ti chaʼxol* svoyik ti mu stakʼ xatiʼike jaʼik liʼe: kameyo, tʼul xchiʼuk daman,* yuʼun chchaʼxax sveʼelik, pe muʼyuk chaʼxol svoyik. Ibaluk sba xavilik.+ 8 Mu stakʼ xatiʼik xtok li chitome, yuʼun chaʼxol* svoy, pe muʼyuk chchaʼxax sveʼel. Ibaluk sba xavilik. Mu stakʼ xatibeik li sbekʼtale xchiʼuk mu stakʼ xapikik mi chamem xae.

9 »Liʼe jaʼ li kʼusitik kuxajtik ta voʼ ti stakʼ xatiʼike: kʼusiuk noʼox ti oy xikʼ xchiʼuk smikʼale* xuʼ xatiʼik.+ 10 Pe mu xuʼ xatiʼik kʼusiuk noʼox ti chʼabal xikʼ xchiʼuk ti chʼabal smikʼale.* Ibaluk sba xavilik.

11 »Xuʼ xatiʼik skotol li lekil mutetike. 12 Pe oy jlom ti mu stakʼ xatiʼike, jaʼik liʼe: li aguilae, li jtsakchoy aguilae, li ikʼal xuleme,+ 13 li tsajal milano mute, li ikʼal milano mute, skotol li jeltos milano mute, 14 skotol li jeltos joj mute, 15 li avestruse, li kuxkuxe,* li gaviota mute, skotol li jeltos xike, 16 li chʼin kuxkuxe,* li kuxkux ti natik xchikine, li sisne mute, 17 li pelikano mute, li xuleme, li xpechʼal nabe, 18 li sigüenya mute, skotol li jeltos ichine, li abubiya mute xchiʼuk li sotsʼe. 19 Ibaluk sba xavilik xtok skotol li bikʼtal chonetik ti oy xikʼike. Mu stakʼ xatiʼik. 20 Skotol li kʼusitik kuxajtik ti chvilik ti lekike xuʼ xatiʼik.

21 »Mu stakʼ xatiʼik jkotuk chonbolom ti chamem xa la ataike.+ Xuʼ xavakʼbeik junuk jyanlum ti te nakal ta ateklumale, jaʼ xuʼ stiʼ. Mi moʼoje, xuʼ xachonbeik li jyanlume. Yuʼun li voʼote jaʼot jun jteklum ti chʼul kʼotemot ta stojolal li Jeova Dios avuʼune.

»Mu me xalakan ta yaʼlel xchuʼ smeʼ li chʼiom tentsune.+

22 »Ta skotol li kʼusitik chlokʼ ta avosil ti la atsʼune, persa skʼan xavakʼ jun ta lajlajuneb* jujun jabil.+ 23 Li jun ta lajlajuneb kʼusitik chlokʼ ta avosile, li achʼ vinoe, li aseitee xchiʼuk li sba yol avakax xchiʼuk achije te chalajes ta yeloval Jeova Dios avuʼun ti bu tstʼuj sventa xichʼ muyubtabel li sbie,+ taje jaʼ sventa jech-o xachan xiʼtael* li Jeova Dios avuʼune.+

24 »Pe mi toj nom ta xanel chavaʼi xchiʼuk mu xuʼ avuʼun xavichʼ batel ti bu tstʼuj sventa xichʼ muyubtabel sbi li Jeova Dios avuʼun+ ta skoj ti toj nom xavile (yuʼun chakʼbot bendision li Jeova Dios avuʼune), 25 xuʼ xajoypʼin ta takʼin, vaʼun takʼin xa chavichʼ batel ti bu tstʼuj li Jeova Dios avuʼune. 26 Te une, xuʼ xaman-o li kʼusi tskʼan avoʼontone, vakax, chij, tentsun, vino, o yan poxetik ti chyakubtasvane xchiʼuk kʼusiuk noʼox ti xal avoʼontone. Te xalajes ta yeloval Jeova Dios avuʼun, jech chamuyubaj xchiʼuk li buchʼutik te oy ta anae.+ 27 Mu me xchʼay ta ajol li jlevi krixchano ti te nakal ta ateklumale,+ yuʼun muʼyuk kʼusi chichʼ xchiʼuk muʼyuk xrexto* jech kʼuchaʼal voʼote.+

28 »Ta ox-ox jabil skʼan lek tsʼakal xavakʼ li jun ta lajlajuneb kʼusitik chlokʼ avuʼun li ta yoxibal jabile, ichʼo batel ta yutil ateklumal.+ 29 Li jlevietik ti muʼyuk kʼusi chichʼike xchiʼuk ti muʼyuk xrextoike,* li jyanlum ti te nakal ta ateklumale, li olol ti chamem stote xchiʼuk li ants ti chamem smalal ti te nakal ta ateklumale jaʼ chtal slajesik jaʼ to mi noj lek xchʼutike.+ Mi jech chapase, chakʼbot bendision Jeova Dios avuʼun ta skotol li kʼusitik chapase.+