Proverbios
11 Toj chopol chil Jeova li jloʼlavanej kiloe,
pe jaʼ lek tajek chil mi tsʼakal lek li spʼisobile.+
2 Kʼalal chtal li toyobbaile, te napʼal chtal li kʼexlale,+
pe li pʼijilale jaʼ te oy ta stojolal li buchʼutik bikʼit chakʼ sbaike.+
3 Li buchʼutik tukʼike jaʼ chbeiltasatik yuʼun li stukʼil yoʼontonike,+
pe li jloʼlavanejetike jaʼ chlajesatik yuʼun ti chloʼlavanike.+
4 Li kʼulejale* muʼyuk sbalil li ta yorail skʼakʼal oʼontonale,+
pe jaʼuk li tukʼilale jaʼ chpojvan lokʼel li ta lajelale.+
5 Chtukʼibtasbat sbe yuʼun stukʼilal li buchʼu chʼabal smule,
yan li buchʼu toj chopole ta xyal ta lum ta skoj xchoplejal stuk.+
6 Chpojatik yuʼun stukʼilalik li buchʼutik tukʼike,+
pe li jloʼlavanejetike jaʼ chchukatik-o yuʼun li kʼusi tskʼan yoʼontonike.+
7 Kʼalal chcham li jun vinik ti toj chopole, chlaj skʼoplal li spatobil yoʼontone;
xchiʼuk li kʼusi smalaoj tsta ta skoj yipe chlaj skʼoplal xtok.+
8 Chichʼ pojel lokʼel ta vokolil li buchʼu tukʼe,
yan li buchʼu toj chopole jaʼ ch-och ta xkʼexol.+
9 Tsokes xchiʼil ta skoj ye li jvalopatinvaneje,*
pe ta skoj ti oy yojtikinobil yuʼunik li buchʼutik tukʼike, chichʼik pojel.+
10 Xmuyubaj yuʼun jteklum ta skoj slekil yoʼonton li buchʼu tukʼe
xchiʼuk x-avetik ta muyubajel kʼalal chcham li buchʼutik toj chopolike.+
11 Chichʼ toybel skʼoplal jun jteklum ta skoj ti yichʼojik bendision li buchʼutik tukʼike,+
pe ta skoj li kʼusi chlokʼ ta yeik li buchʼutik toj chopolike, jaʼ ta sjinesik li jteklume.+
12 Buchʼuuk noʼox ti muʼyuk yichʼoj spʼijile* chakʼ ta ilel ti spʼajoj li xchiʼile,
pe li vinik ti oy kʼusi lek snabe skʼoplal ta melele tsʼijil noʼox.+
13 Li jutmulile* xtal xbat noʼox ta yalel batel li kʼusi mu stakʼ alele,+
pe li buchʼu stakʼ jpat koʼontontik ta stojolale muʼyuk chal batel li kʼusi mukule.
14 Kʼalal muʼyuk buchʼu lek chbeiltasvane,* chil svokol li jteklume,
pe kʼalal oy ep jtojobtasvanejetike, lek kʼusi chkʼot ta pasel.*+
15 Buchʼuuk noʼox ti tsvaʼan sba ta chʼom ta stojolal li buchʼu mu xojtikine muʼyuk kʼusi lek chkʼot ta stojolal,+
pe buchʼuuk noʼox ti muʼyuk* chakʼ skʼob sventa tspas jun tratoe jun noʼox yoʼonton.
16 Tsta yutsilal li jun ants ti lek yoʼontone,*+
pe li viniketik ti muʼyuk xkʼuxul yoʼontonike tstsatsal ichʼik li kʼulejale.
17 Li buchʼu oy slekil yoʼontone* tstabe sbalil stuk,+
pe jaʼuk li buchʼu chʼabal xkʼuxul yoʼontone chakʼbe sba svokol stuk.+
18 Li buchʼu toj chopole muʼyuk sbalil li stojol tstae,+
pe li buchʼu tstsʼun kʼusi tukʼe tsta li batsʼi matanale.+
19 Li buchʼu te napʼal-o ta stojolal li tukʼilale tsta kuxlejal,+
pe li buchʼu jaʼ snutsoj batel li choplejale tsta lajelal.
20 Li Jeovae toj chopol chil li buchʼutik chopol yoʼontonike,+
yan li buchʼutik chʼabal xchopolil li sbeike lek tajek chil.+
21 Teuk me ta ajol liʼe: li buchʼu toj chopole persa chichʼ kastigo,+
jaʼuk li xnichʼnab buchʼutik tukʼike kolem chkomik.
22 Li kʼupil sba ants ti mu skʼan xichʼ spʼijile
xkoʼolaj kʼuchaʼal aniyo ta oro ti xojol ta sniʼ chitome.
23 Li kʼusi oy ta yoʼonton li buchʼutik tukʼike lek bu ch-ikʼvan batel,+
pe li buchʼutik toj chopolike jaʼ smalaojik li skʼakʼal yoʼonton Diose.
24 Li buchʼu ta slekil yoʼonton chakʼe* chichʼ akʼbel mas;+
pe li buchʼu mu snaʼ xakʼ kʼusitik yuʼune povre chkom.+
25 Li buchʼu* ta slekil yoʼonton chakʼe ch-epaj kʼusitik yuʼun*+
xchiʼuk buchʼuuk noʼox ti tsikubtasbe yoʼonton* yantike ta xichʼ sikubtasbel yoʼonton ek.+
26 Li krixchanoetike ta xchopol kʼoptaik li buchʼu mu xakʼ sat tsʼunobile,
pe jaʼ tslekil kʼoptaik li buchʼu chchone.
27 Li buchʼu baxbol ta spasel kʼusi leke lek chichʼ ilel,+
yan li buchʼu jaʼ tspas li kʼusi chopole jpʼel skʼoplal ti jaʼ chvul ta stojolale.+
28 Li buchʼu spatoj yoʼonton ta skʼulejale chyal ta lum,+
yan li buchʼutik tukʼike chchʼiik batel kʼuchaʼal kʼob teʼ.+
29 Buchʼuuk noʼox ti chakʼbe svokol yutsʼ yalale jaʼ noʼox chrextoinik* li ikʼe+
xchiʼuk li buchʼu bole chmosoinat yuʼun li buchʼu pʼij yoʼontone.
30 Li kʼusi tspas li buchʼu tukʼe xkoʼolaj kʼuchaʼal jtekʼ teʼ sventa kuxlejal+
xchiʼuk oy spʼijil li buchʼu* tstijbe yoʼonton yantik sventa spasik kʼusi leke.+
31 Teuk me ta ajol ti ta xichʼ smoton li buchʼu tukʼ ta sba balumile,
pe mas to chichʼ smoton li buchʼu toj chopole xchiʼuk li jpasmulile.+