Jeremias
38 Vaʼun, li Sefatias ti jaʼ xnichʼon Matane, li Guedalias ti jaʼ xnichʼon Pasjure, li Jukal+ ti jaʼ xnichʼon Selemiase xchiʼuk li Pasjur+ ti jaʼ xnichʼon Malkiyae laj yaʼiik li kʼusi laj yalbe sjunul jteklum li Jeremiase, ti xi laj yalbee: 2 «Xi chal li Jeovae: ‹Li buchʼutik liʼ chkomik ta jteklume ta xlajik ta espada, ta tsatsal chamel+ xchiʼuk ta tsatsal viʼnal. Pe li buchʼu chakʼ sba ta skʼob li jkaldeaetike muʼyuk chlaj ta milel, kuxul chkom, ta xpoj yuʼun li xkuxlejale›.*+ 3 Xi chal li Jeovae: ‹Li jteklum liʼe jpʼel skʼoplal chichʼ akʼel ta skʼob li yajsoltarotak ajvalil ta Babiloniae xchiʼuk ta xuʼunin›».+
4 Xi laj yalbeik ajvalil li bankilaletike: «Avokoluk, akʼo yichʼ milel li vinik liʼe,+ yuʼun kʼalal jech chal taje ta xchibajes li soltaroetik ti liʼ to oyik ta jteklume xchiʼuk skotol li krixchanoetike. Yuʼun maʼuk tsabe slekilal li jteklume, jaʼ noʼox tsabe svokol». 5 Xi la stakʼ li ajvalil Sedekiase: «¡Kʼelavilik! Te oy ta avok ta akʼobik, yuʼun li ajvalile mu kʼusi stakʼ spas sventa spajtsanoxuk».
6 Jaʼ yuʼun, laj yikʼik batel li Jeremiase xchiʼuk la stikʼik ochel li ta sposo Malkiya ti jaʼ xnichʼon ajvalile, ti te oy ta Yamakʼ* Jchabivanejetike.+ La xchukik yalel ta chʼojon li Jeremiase, pe chʼabal yaʼlel li posoe, jaʼ noʼox oy achʼel. Vaʼun, li Jeremiase lik mutʼijuk* yalel ta achʼel.
7 Li Ebed-Melek+ ti jaʼ j-etiopia vinike xchiʼuk ti tsots yabtel yichʼoj* li ta spasob mantal* ajvalile laj yaʼi ti laj yichʼ tikʼel ta poso li Jeremiase. Li ajvalile jaʼo te chotol li ta ochebal ti Benjamin sbie.+ 8 Jaʼ yuʼun, li Ebed-Meleke lokʼ batel li ta sna* ajvalile xchiʼuk bat skʼopon, xi laj yalbee: 9 «Ajvalil kuʼun, li viniketik taje, ¡toj chopol li kʼusi la spasbeik li j-alkʼop Jeremiase! Yuʼun la stikʼik ochel ta poso, vaʼun te chcham ta skoj li tsatsal viʼnale. Yuʼun chʼabal xa pan li ta jteklume».+
10 Vaʼun, li ajvalile xi laj yalbe mantal li Ebed-Melek ti jaʼ j-etiopia vinike: «Ikʼo batel 30 ta voʼ viniketik liʼe xchiʼuk lokʼesik tal ta poso li j-alkʼop Jeremias yoʼ to mu xchame». 11 Jaʼ yuʼun, laj yikʼ batel viniketik li Ebed-Meleke xchiʼuk och batel li ta sna* ajvalile, te bat ta yolon li skʼejobil* kʼulejale,+ vaʼun la stsakik tal jaylikuk pokʼetik ti lajemik xae xchiʼuk jaylikuk xtuchʼulil tela ti lajemik xae xchiʼuk la xchukbeik yalel ta chʼojon li Jeremias ti te oy ta posoe. 12 Vaʼun, li Ebed-Melek ti jaʼ j-etiopia vinike xi laj yalbe li Jeremiase: «Avokoluk, somtao ta pokʼ xchiʼuk ta xtuchʼulil tela li alotsʼop sventa mu syayijesot li chʼojone». Jaʼ jech la spas li Jeremiase. 13 La snitik lokʼel tal ta chʼojon li Jeremiase, vaʼun jaʼ jech la slokʼesik tal li ta posoe. Li Jeremiase te kom-o li ta Yamakʼ* Jchabivanejetike.+
14 Li ajvalil Sedekiase la stak ta ikʼel li j-alkʼop Jeremias sventa xtal kʼelatuk li ta yoxibal ochebal te ta sna Jeovae, vaʼun li ajvalile xi laj yalbe li Jeremiase: «Oy kʼusi ta jakʼbot. Pe jamal me xavalbun un». 15 Li Jeremiase xi laj yalbe li Sedekiase: «Jpʼel skʼoplal chamilun mi laj kalbote. Jech xtok, muʼyuk chachikintabun mi la jtojobtasote». 16 Jaʼ yuʼun, li ajvalil Sedekiase oy kʼusi ta mukul laj yalbe li Jeremiase, xi laj yalbee: «Jamal chkal ta skoj kuxul Jeova, ti jaʼ li buchʼu yakʼoj jkuxlejaltike, ti muʼyuk ta jmilote xchiʼuk ti muʼyuk chkakʼot ta skʼob li viniketik ti tskʼan tsmilikote».
17 Vaʼun, li Jeremiase xi laj yalbe li Sedekiase: «Xi chal li Jeova Dios ti jaʼ bankilal yuʼun soltaroetike,* li Dios yuʼun Israele: ‹Mi laj avakʼ aba ta skʼob li bankilaletik yuʼun ajvalil ta Babiloniae, muʼyuk chavichʼ milel, muʼyuk chichʼ chikʼel ta kʼokʼ li jteklum liʼe, kuxul chakom xchiʼuk li avutsʼ avalale.*+ 18 Pe mi muʼyuk laj avakʼ aba ta skʼob li bankilaletik yuʼun ajvalil ta Babiloniae, chichʼ akʼel ta skʼob jkaldeaetik li jteklum liʼe xchiʼuk ta xchikʼik ta kʼokʼ,+ persa cha-och ta skʼobik ek›».+
19 Vaʼun, li ajvalil Sedekiase xi laj yalbe li Jeremiase: «Chixiʼ yuʼun li judaetik ti iktavanemik xa komel ti bat xchiʼinik li jkaldeaetike, yuʼun mi laj kichʼ akʼel ta skʼobike, xuʼ xilbajinikun». 20 Pe xi laj yal li Jeremiase: «Muʼyuk chavichʼ akʼel ta skʼobik. Avokoluk, chʼuno li kʼusi chal Jeova ti yakal chkalbot avie, vaʼun lek kʼusi chkʼot ta atojolal xchiʼuk kuxul chakom. 21 Pe mi mu xakʼan xavakʼ aba ta skʼobike, xi yakʼoj kil Jeova ti kʼusi chkʼot ta pasele: 22 ¡Kʼelavil!, skotol li antsetik ti te chkomik ta sna* li ajvalil ta Judae chichʼik akʼel ta skʼob li bankilaletik yuʼun ajvalil ta Babiloniae+ xchiʼuk xi chalike:
‹Laj xa sloʼlaot xchiʼuk laj xa stsalot li viniketik ti laj toʼox apat avoʼonton ta stojolalike.*+
Laj xa yakʼik matsʼiuk yalel ta achʼel li avakane.
Laj xa yiktaikot komel›.
23 Skotol li avajniltak xchiʼuk anichʼnabtake chichʼik akʼel ta skʼob li jkaldeaetike, li voʼot eke jpʼel skʼoplal cha-och ta skʼobik, yuʼun chchukot batel li ajvalil ta Babiloniae+ xchiʼuk voʼot ta amul ti chichʼ chikʼel ta kʼokʼ li jteklum liʼe».+
24 Vaʼun, li Sedekiase xi laj yalbe li Jeremiase: «Mu me buchʼu xavalbe li kʼusitik laj avalbun sventa mu xavichʼ milele. 25 Mi laj yaʼiik bankilaletik ti lijloʼilaje xchiʼuk mi xi tal yalboxuke: ‹Avokoluk, albunkutik kʼusi laj avalbe li ajvalile. Albunkutik skotol, vaʼun muʼyuk ta jmilotkutik.+ ¿Kʼusi laj yalbot li ajvalile?› mi xiike, 26 xi skʼan xavalbe yaʼiike: ‹Jaʼ noʼox la jkʼanbe vokol li ajvalil ti mu stakun sutel ta sna li Jeonatan sventa mu teuk xichame›».+
27 Ta tsʼakal une, skotol li bankilaletike tal skʼelik li Jeremiase xchiʼuk oy kʼusi lik sjakʼilanbeik. Li Jeremiase jech laj yal skotol jech kʼuchaʼal albat yuʼun li ajvalile. Jaʼ yuʼun, muʼyuk xa yan kʼusi laj yalbeik, yuʼun muʼyuk buchʼu laj yaʼi yuʼunik kʼalal loʼilaj xchiʼuk li ajvalile. 28 Li Jeremiase te kom-o ta Yamakʼ* Jchabivanejetik jaʼ to ti kʼuxi och ta kʼabal li Jerusalene;+ yuʼun te toʼox oy kʼalal laj yichʼ uʼuninel li Jerusalene.+