Jeremias

52 Li Sedekiase+ 21 jabil yichʼoj kʼalal och ta ajvalile, 11 jabil ajvalilaj li ta Jerusalene. Li smeʼe Amutal+ sbi, jaʼ stseb Jeremias ti likem ta Libnae. 2 Li Sedekiase jaʼ la spas-o li kʼusi chopol chil Jeova jech kʼuchaʼal la spas li Jeoiakime.+ 3 Li kʼusi kʼot ta pasel li ta Jerusalen xchiʼuk ta Judae jaʼ lik-o skʼakʼal yoʼonton li Jeovae, jaʼ yuʼun la sjip lokʼel ta yeloval sat.+ Jech xtok, li Sedekiase la stoy sba ta stojolal li ajvalil ta Babiloniae.+ 4 Kʼalal sbalunebal xa ox jabil yochel ta ajvalil li Sedekiase, jaʼo ta slajunebal kʼakʼal li ta slajunebal ue, li Nabukodonosor* ti jaʼ ajvalil ta Babiloniae te kʼot xchiʼuk skotol yajsoltarotak sventa stsak ta kʼop li Jerusalene. Te la spas skarpanaik xchiʼuk la svaʼanik muro ta sjoyobal li Jerusalene.+ 5 Te setuojik-o jteklum kʼalal 11 jabil xa ox yochel ta ajvalil li Sedekiase.

6 Vaʼun, li ta sbalunebal kʼakʼal li ta xchanibal ue,+ mas to tsatsaj viʼnal li ta jteklume, muʼyuk xa sveʼel skotol li krixchanoetik tee.+ 7 Laje, laj yichʼ jomel li smuroal jteklume, skotol li soltaroetike jatavik lokʼel ta jteklum ta akʼobaltik, te lokʼik batel li ta ochebal ti bu oy chib muro ti te xkom ta stsʼel li nichimaltik yuʼun ajvalile, vaʼun jaʼ la stambeik batel li sbelel Arabae.+ Taje jaʼo kʼot ta pasel kʼalal jaʼo te sjoyobtaojik jteklum li jkaldeaetike. 8 Li soltaroetik yuʼun jkaldeaetike bat snutsik li ajvalile, te la staik ta be ta takixokol balumil ta stenlejaltik yuʼun Jeriko li Sedekiase,+ pe jatav batel skotol li yajsoltarotak te xchiʼuke. 9 Laj une, la stsakik li ajvalile xchiʼuk laj yikʼbeik batel li ajvalil ta Babilonia ti te oy ta Ribla ti jaʼ yosilal Amate, vaʼun te laj yal kʼusi chichʼ pasbel. 10 Li ajvalil ta Babiloniae te ta yeloval sat Sedekias la smilbe li xnichʼnabe xchiʼuk la smil skotol li bankilaletik ta Juda ti te oyik ta Riblae. 11 Vaʼun, li ajvalile la stupʼbe sbekʼ sat li Sedekiase,+ laje la xchuk ta kadena ti pasbil ta kovree, laj yikʼ batel ta Babilonia xchiʼuk la stikʼ ta chukel jaʼ to ti kʼuxi chame.

12 Li ta slajunebal kʼakʼal ta svoʼobal ue, jaʼ xkaltik, kʼalal 19 jabil xa ox yochel ta ajvalil li Nabukodonosor* ti jaʼ ajvalil ta Babiloniae, jaʼo och batel ta Jerusalen li Nebusaradan ti jaʼ bankilal yuʼun jchabivanejetike, jaʼ li yajtunel ajvalil ta Babiloniae.+ 13 La xchikʼbe li sna Jeovae,+ li sna* ajvalile xchiʼuk skotol li naetik ta Jerusalene; jech xtok, la xchikʼ li naetik ti tsotsik skʼoplale. 14 Skotol li soltaroetik yuʼun jkaldeaetik ti jaʼ ventainbilik yuʼun li bankilal yuʼun jchabivanejetike la sjinesik komel li smuroal Jerusalene.+

15 Li Nebusaradan ti jaʼ bankilal yuʼun jchabivanejetike la xchuk batel junantik li ta jteklum ti abol sbaike xchiʼuk li yan buchʼutik te to komemik ta jteklume. Jech xtok, laj yikʼ batel li buchʼutik laj yakʼ sbaik ta skʼob li ajvalil ta Babiloniae xchiʼuk li buchʼutik xtojobik lek spasel kʼusitike.+ 16 Pe li Nebusaradan ti jaʼ bankilal yuʼun jchabivanejetike te laj yikta jlom li buchʼutik mas povreik sventa stsʼunik uva xchiʼuk ti xichʼik sujel ta spasel yan abtelale.+

17 Jech xtok, li jkaldeaetike la slilinik li oyetik pasbil ta kovre+ ti te oy ta sna Jeovae, la slilinik li karetiyaetike+ xchiʼuk li Nab ta kovre+ ti te oy ta sna Jeovae. Laj yichʼik batel ta Babilonia skotol li kovree.+ 18 Laj yichʼik batel xtok li xchʼamobiltak kʼusitike, li palaetike, li stupʼobiltak mechae, li bochetike,+ li kopaetike+ xchiʼuk skotol li kʼusitik pasbil ta kovre ti tstunesik kʼalal tspasik abtelal ta temploe. 19 Li bankilal yuʼun jchabivanejetike laj yichʼ batel li lechlech bochetike,+ li yavtak akʼale, li bochetik sventa milbil matanale, li yavtak tane, li kandeleroetike,+ li kopaetike, li yan bochetik ti pasbilik ta batsʼi oro xchiʼuk ta batsʼi platae.+ 20 Li chib oye, li Nabe, li 12 ta kot tot vakaxetik+ ti pasbil ta kovre ti te oy ta yolon li Nabe, li karetiyaetik ti jaʼ spasoj li ajvalil Salomon sventa stunesik li ta sna Jeovae, skotol li kʼusitik taje mu xa noʼox stakʼ pʼisel.

21 Ta sventa li oyetike, li ta jujun oye 18 xukʼubil* staylej. Sventa stakʼ pʼisel kʼu syijil li jujun oye, skʼan jlik chʼojon ti 12 xukʼubil snatile.+ Ti kʼu spimile jaʼ chanib kʼob* xchiʼuk pujul* li yute. 22 Li xlechlechul sjole ta kovre pasbil xchiʼuk voʼob xukʼubil staylej.+ Ta kovre pasbil li slujoal ti xkoʼolaj ta mayae xchiʼuk li slokʼol granadaetik* ti oy ta sjoyobal li xlechlechul sjole. Li ta xchibal oye jech pasbil ek xchiʼuk te oy li slokʼol granadaetike. 23 Li ta jujujot xokone oy 96 slokʼol granadaetik;* ta skotole oy sien slokʼol granadaetik li ta sba slujoal ti xkoʼolaj ta mayae.+

24 Li bankilal yuʼun jchabivanejetike laj yikʼ batel xtok li Seraya+ ti jaʼ bankilal palee, laj yikʼ batel li Sofonias+ ti kʼotem ta xchibal palee xchiʼuk li oxvoʼ jchabitiʼnaetike.+ 25 Li ta jteklume laj yikʼ batel jun bankilal j-abtel ta pasob mantal ti jaʼ sbainoj li soltaroetike, laj yikʼ batel vukvoʼ li buchʼutik lek skʼopon ajvalile, laj yikʼ batel li yajsekretario bankilal soltaroe, jaʼ li buchʼu tstsob soltaroetik sventa xbatik ta paskʼope xchiʼuk laj yikʼ batel 60 ta voʼ yan viniketik ti te oyik ta jteklume. 26 Li Nebusaradan ti jaʼ bankilal yuʼun jchabivanejetike laj yikʼbe batel li ajvalil ta Babilonia ti te oy ta Riblae. 27 Li ajvalil ta Babiloniae te la smilan ta Ribla+ ta yosilal Amat. Jaʼ jech laj yichʼ chukel lokʼel ta slumal li Judae.+

28 Liʼe jaʼ li krixchanoetik ti la xchuk batel li Nabukodonosore:* li ta svukubal jabil yochel ta ajvalile laj yikʼ batel 3,023 judaetik.+

29 Kʼalal 18 jabil xa ox yochel ta ajvalil li Nabukodonosore,*+ laj yichʼ ikʼel lokʼel 832 krixchanoetik* ta Jerusalen.

30 Kʼalal 23 jabil xa ox yochel ta ajvalil li Nabukodonosore,* li Nebusaradan ti jaʼ bankilal yuʼun jchabivanejetike la xchuk batel 745 judaetik.+

Ta skotole laj yichʼ chukel batel 4,600 krixchanoetik.

31 Kʼalal 37 jabil xa ox xchukel batel li Joakin+ ti jaʼ ajvalil ta Judae, li ta skʼakʼalil 25 ta yuilal 12, li Evil-Merodak ti jaʼ ajvalil ta Babiloniae la slokʼes ta chukel*+ li Joakin ti jaʼ ajvalil ta Judae. Li vaʼ jabile, jaʼo och ta ajvalil li Evil-Merodake. 32 Laj yakʼ ta ilel slekil yoʼonton ta stojolal xchiʼuk jaʼ mas laj yichʼ ta mukʼ ti jaʼ mu sta li yan ajvaliletik te xchiʼukan ta Babiloniae. 33 Li Joakine la slokʼ li skʼuʼ spokʼ slapoj toʼox ta chukinabe xchiʼuk te la xchiʼin ta veʼel jujun kʼakʼal li ajvalile jaʼ to ti kʼuxi chame. 34 Ti kʼu sjalil kuxule jujun kʼakʼal akʼbat sveʼel yuʼun li ajvalil ta Babiloniae, jaʼ to ti kʼuxi chame.