Salmos
Sventa bankilal jtijson sventa guitit.* Skʼejimol David.
8 Jeova, voʼot ti Kajvalotkutike, ¡toj echʼ xa noʼox mukʼ skʼoplal li abi ta spʼejel balumile!
¡Mas toj toyol avakʼoj li amukʼulale, jaʼ xkom to li vinajele!*+
2 Ta skoj li avajkontratake,
ta ye ololetik xchiʼuk ta ye buchʼutik ta to xchuʼunik+ avakʼoj akʼo yalik li atsatsale
sventa tsʼijil xkom avuʼun li jkontrainvaneje xchiʼuk li buchʼu tspak skʼoplale.
3 Kʼalal ta jkʼel li vinajele, li yabteltak sniʼ akʼobe,
li lunae* xchiʼuk li kʼanaletik ti voʼot apasoje,+
4 ¿mi yuʼun tsots skʼoplal li vinik ti te oy ta ajole
xchiʼuk mi yuʼun tsots skʼoplal li xnichʼon krixchano sventa xachabie?+
5 Mas bikʼit jutuk skʼoplal la apas li stuke, jaʼ mas mukʼ skʼoplal jutuk li buchʼutik xkoʼolajik xchiʼuk Diose*
xchiʼuk laj avakʼbe skorona ta sventa smukʼulal xchiʼuk ta sventa yutsilal.
6 Laj avakʼbe sventain li yabteltak akʼobe;+
avakʼojbe skotol ta yok skʼob:
7 skotol li chijetike xchiʼuk li vakaxetike
xchiʼuk li jtiʼvanej chonbolometike,*+
8 li mutetik xvilet ta vinajele xchiʼuk li choyetik ta nabe,
skotol li kʼusi chnuxinaj ta yut nabe.
9 Jeova, voʼot ti Kajvalotkutike, ¡toj echʼ xa noʼox mukʼ skʼoplal li abi ta spʼejel balumile!