Esekiel
18 La skʼoponun tal yan velta li Jeovae, xi laj yalbune: 2 «¿Kʼusi smelolal li pʼijil loʼil ti xi chavalik ta yosilal Israele: ‹Li totiletike la sloʼik pajal uva, pe jaʼ tsikʼ stanal yeik li xnichʼnabike›?+
3 »Xi chal li Ajvalil Jeova ti jaʼ Mukʼul Jpasmantale: ‹Jamal chkal ta skoj ti kuxulune, muʼyuk xa chavalilanik ta Israel li pʼijil loʼil taje. 4 ¡Kʼelavilik!, jaʼ kuʼun skotol li kuxlejale.* Jaʼ kuʼun li xkuxlejal totile xchiʼuk li xkuxlejal nichʼonile. Li buchʼu* tsaʼ smule jaʼ chcham stuk.
5 »›Kaltik noʼox ti oy jun tukʼil vinik ti jaʼ tspas li kʼusi tukʼ xchiʼuk li kʼusi leke. 6 Muʼyuk chbat ta vitsetik sventa slajesbe smoton li santoetike;+ muʼyuk tsta ta kʼoponel li ibal sba lokʼoletik* yuʼun jteklum Israele; muʼyuk chchiʼinbe ta vayel yajnil xchiʼil+ xchiʼuk muʼyuk chchiʼin ta vayel jun ants kʼalal jaʼo chil xchamele;+ 7 muʼyuk buchʼu chilbajin,+ yuʼun chakʼbe sutel li kʼusi akʼbat komel ta prental*+ li buchʼu oy yil yuʼune; muʼyuk kʼusi chelkʼanbe yantik,+ yuʼun chakʼbe sveʼel li buchʼu chviʼnaje+ xchiʼuk chakʼbe skʼuʼ spokʼ li buchʼu tʼanale;+ 8 muʼyuk tskʼanbe sjol li kʼusi chakʼ ta chʼome xchiʼuk muʼyuk tspas-o kanal,+ muʼyuk tspas li kʼusi muʼyuk tukʼe;+ tukʼ chchapan kʼalal oy skʼopik chaʼvoʼ viniketike;+ 9 jech-o ta xchʼun batel jmantaltak xchiʼuk kʼusitik chapanbil kuʼun sventa tukʼuk li kʼusitik tspase. Li buchʼu jech taje jaʼ jun tukʼil vinik xchiʼuk jpʼel skʼoplal chkuxi›,+ xi li Ajvalil Jeova ti jaʼ Mukʼul Jpasmantale.
10 »‹Pe kaltik noʼox ti oy jun xnichʼon li vinik taje, ti jaʼ jun j-elekʼe,+ ti jaʼ jun jmilvaneje*+ o ti tspas jtosuk li kʼusitik liʼe: 11 (akʼo mi mu jechuk spasoj jtosuk li totile) chbat slajes li smoton santoetik ta vitsetike, chchiʼinbe ta vayel yajnil xchiʼil, 12 chilbajin li buchʼutik abol sbae xchiʼuk li buchʼu povree,+ ch-elkʼaj, muʼyuk chakʼ sutel li kʼusi akʼbil komel ta prentale,* tsta ta kʼoponel li ibal sba lokʼoletike,+ tspas li kʼusitik toj chopolike,+ 13 tskʼanbe sjol li kʼusi chakʼ ta chʼome xchiʼuk tspas-o kanal.+ Li nichʼonil taje ta xcham. Ta skoj li kʼusitik toj chopolik la spase, jpʼel skʼoplal chichʼ milel. Jaʼ chkom ta sba stuk li xchʼichʼele.
14 »›Pe kaltik noʼox ti oy jun nichʼonil ti chil skotol li kʼusitik chopol tspas li stote. Akʼo mi ta xil li kʼusitik tspas li stote, mu jechuk ta spas li stuke. 15 Muʼyuk chbat ta vitsetik sventa slajesbe smoton li santoetike; muʼyuk tsta ta kʼoponel li ibal sba lokʼoletik yuʼun jteklum Israele; muʼyuk chchiʼinbe ta vayel yajnil xchiʼil, 16 muʼyuk buchʼu chilbajin, chakʼ sutel li kʼusi akʼbil komel ta prentale,* muʼyuk kʼusi chelkʼan, chakʼbe sveʼel li buchʼu chviʼnaje xchiʼuk chakʼbe skʼuʼ spokʼ li buchʼu tʼanale, 17 muʼyuk chilbajin li buchʼu povree, muʼyuk tskʼanbe sjol li kʼusi chakʼ ta chʼome xchiʼuk muʼyuk tspas-o kanal; ta xchʼun li jmantaltake xchiʼuk tspas li kʼusitik chapanbil kuʼune. Li buchʼu jech taje muʼyuk chcham ta skoj smul li stote. Jpʼel skʼoplal chkuxi. 18 Pe jaʼuk li stote chcham ta skoj li smule, yuʼun loʼlavan, oy kʼusi laj yelkʼanbe li xchiʼile xchiʼuk chopol kʼusitik la spas li ta slumale.
19 »›Pe xi chlik avalike: «¿Kʼu yuʼun muʼyuk chkuchbe smul stot li nichʼonile?». Ta skoj ti tukʼ xchiʼuk lek kʼusi spasoj li nichʼonile, ti xchʼunoj skotol li jmantaltake xchiʼuk ti kʼotem ta pasel yuʼune, jpʼel skʼoplal chkuxi.+ 20 Li buchʼu tsaʼ smule jaʼ chcham stuk.+ Li nichʼonile muʼyuk chkuchbe smul li stote, jech li totil eke muʼyuk chkuchbe smul li xnichʼone. Li buchʼu tukʼe chichʼ smoton ta skoj ti tukʼ kʼusitik spasoje, jaʼuk li buchʼu toj chopole chichʼ kastigo ta skoj li kʼusitik chopol spasoje.+
21 »›Pe mi chlik skomtsan skotol smul li buchʼu toj chopole, mi chlik xchʼun li jmantaltake, mi tspas li kʼusi tukʼe xchiʼuk li kʼusi leke, jpʼel skʼoplal chkuxi. Muʼyuk ta xcham.+ 22 Muʼyuk chkakʼbe kastigo ta skoj* li kʼusitik chopol spasoje.+ Muʼyuk chcham ta skoj ti tukʼ kʼusitik tspase›.+
23 »Xi chal li Ajvalil Jeova ti jaʼ Mukʼul Jpasmantale: ‹¿Mi yuʼun xkuxet xa koʼonton kʼalal chcham li buchʼu toj chopole?+ ¿Mi mu jaʼuk lek chkaʼi ti xikta komel li kʼusi chopol tspase xchiʼuk ti xkuxie?›.+
24 »‹Pe mi oy buchʼu tukʼ ti chikta spasel li kʼusi tukʼe, ti jaʼ chbat spas li kʼusi chopole* xchiʼuk ti chlik spas li kʼusitik ibalik sba jech kʼuchaʼal tspas li buchʼutik toj chopole, ¿mi muʼyuk van chcham? Muʼyuk xa chichʼ vulesel ta jolil jtosuk li kʼusitik tukʼ la spase.+ Ta xcham ta skoj ti muʼyuk tukʼ laj yakʼ sbae xchiʼuk ta skoj ti la saʼ smule.+
25 »›Pe xi chlik avalike: «Muʼyuk tukʼ li sbe Jeovae».+ Jteklum Israel, ¡chikintao avokoluk! ¿Mi jaʼ muʼyuk tukʼ li jbee?+ ¿Mi mu jaʼuk muʼyuk tukʼ li abeike?+
26 »›Mi oy buchʼu tukʼ ti chikta spasel li kʼusi tukʼe, mi jaʼ chbat spas li kʼusi chopole xchiʼuk mi chame, ta xcham ta skoj li kʼusitik chopol tspase.
27 »›Mi la skomtsan spasel kʼusitik toj chopol li jpaschoplejale xchiʼuk mi lik spas li kʼusi tukʼe xchiʼuk li kʼusi leke, muʼyuk ta xcham.+ 28 Mi laj yakʼ venta skotol li kʼusitik chopol la spase xchiʼuk mi laj yikta spasele, jpʼel skʼoplal chkuxi. Muʼyuk ta xcham.
29 »›Pe xi chlik yal li jteklum Israele: «Muʼyuk tukʼ li sbe Jeovae». Jteklum Israel, ¿mi ta melel jaʼ muʼyuk tukʼ li jbee?+ ¿Mi mu jaʼuk muʼyuk tukʼ li abeike?›.
30 »‹Jaʼ yuʼun, jteklum Israel, jech ta jchapanoxuk ta jujuntal ti kʼu yelan atalelalike›,*+ xi li Ajvalil Jeova ti jaʼ Mukʼul Jpasmantale. ‹Iktaik, iktaik komel ta j-echʼel skotol li kʼusitik chopol chapasik sventa mu smak* yakan avuʼunik li yantike xchiʼuk ti voʼoxuk xkom ta abaike. 31 Komtsanik skotol li kʼusitik chopol chapasike,+ jelo* li avoʼontonike xchiʼuk jelo li anopbenike.+ Jteklum Israel, ¿kʼu yuʼun ti te noʼox akʼeloj aba chachamike?›.+
32 »‹Muʼyuk bu xkuxet xa koʼonton kʼalal oy buchʼu chchame,+ jaʼ yuʼun sutanik tal ta jtojolal sventa mu xachamik›,+ xi li Ajvalil Jeova ti jaʼ Mukʼul Jpasmantale».