Jeremias

43 Kʼalal laj yoʼonton Jeremias ta yalbel sjunul jteklum skotol li kʼusitik laj yal Jeova ti jaʼ Sdiosike, ta jujupʼel li kʼusitik laj yal mantal Jeova ti akʼo xichʼik albele, 2 li Asarias ti jaʼ xnichʼon Osayae, li Joanan+ ti jaʼ xnichʼon Kareae xchiʼuk skotol li jtoyba viniketike xi laj yalbeik li Jeremiase: «¡Mu meleluk li kʼusi chavale! Li Jeova ti jaʼ Jdioskutike muʼyuk la stakot tal sventa xi xavalbunkutike: ‹Mu xabatik ta naklej ta Ejipto›. 3 Yuʼun jaʼ tstij avoʼonton li Baruk+ ti jaʼ xnichʼon Nerias sventa jech xavalbunkutik taje, yuʼun tskʼan ti xi-ochkutik ta skʼob li jkaldeaetike, ti xkichʼkutik milele o ti xkichʼkutik chukel batel ta Babiloniae».+

4 Jaʼ yuʼun, li Joanan ti jaʼ xnichʼon Kareae, skotol li bankilal soltaroetike xchiʼuk skotol li krixchanoetike muʼyuk la xchʼunbeik li smantal Jeova ti skʼan xkomik li ta yosilal Judae. 5 Jech oxal, li Joanan ti jaʼ xnichʼon Kareae xchiʼuk skotol li bankilal soltaroetike la stsobik batel skotol li skomenal* Juda ti sutemik xa ox tal ta naklej ta yosilal Judae, jaʼik li buchʼutik tanpuk toʼox batemik ta mukʼta lumetike.+ 6 Laj yikʼik batel li viniketike, li antsetike, li ololetike, li stsebetak ajvalile xchiʼuk skotol li buchʼutik* la sbain skʼelel li Guedalias+ ti jaʼ xnichʼon Aikam+ xchiʼuk ti jaʼ smom Safane,+ ti jaʼ vaʼanat yuʼun li Nebusaradan+ ti jaʼ bankilal yuʼun jchabivanejetike. Jech xtok, li j-alkʼop Jeremiase xchiʼuk li Baruk ti jaʼ xnichʼon Neriase ikʼatik batel ek. 7 Vaʼun, ochik batel li ta yosilal Ejiptoe, yuʼun muʼyuk la xchʼunbeik li smantal Jeovae xchiʼuk batik kʼalal to ta Tapanes.+

8 Laj une, li Jeremiase kʼoponat tal yuʼun Jeova te ta Tapanes, xi albate: 9 «Peto tal jaypʼejuk mukʼta tonetik xchiʼuk te xamuk li ta skoriyolal* yochebal sna faraon ti pasbil ta ladriyoe, ti te oy ta Tapanese. Teuk skʼeloj judaetik kʼalal jech chapase. 10 Vaʼun, xi xavalbe yaʼiike: ‹Xi chal li Jeova ti jaʼ bankilal yuʼun soltaroetike,* li Dios yuʼun Israele: «Ta jtak tal ta ikʼel li kajtunel Nabukodonosor* ti jaʼ ajvalil ta Babiloniae,+ liʼ ta jnakanbe xchotleb sventa ajvalil ta sba li tonetik la jmuke xchiʼuk liʼ chvul xlichʼan li skarpanae.+ 11 Ta xtal xchiʼuk ta stsak ta kʼop li yosilal Ejiptoe.+ Oy jlom ti chchamik ta skoj tsatsal chamele, oy jlom ti chichʼik chukel batele xchiʼuk oy jlom ti chichʼik milel ta espadae.+ 12 Jech xtok, ta jtsanbe skʼakʼal li sna* sdiosik ta Ejiptoe,+ li ajvalil eke ta xchikʼbe li sna diosetike xchiʼuk ta xchuk batel li diosetike. Jech kʼuchaʼal muʼyuk tsots chaʼi ta slapel skʼuʼ spokʼ li jchabichije, jaʼ jech muʼyuk tsots chaʼi ta stsalel sjunul Ejipto li ajvalile xchiʼuk jun yoʼonton* chlokʼ batel te. 13 Ta slilin komel li oyetik ta Bet-Semes* ti te oy ta yosilal Ejiptoe xchiʼuk ta xchikʼbe ta kʼokʼ li sna* diosetik ta Ejiptoe»›».