Jeremias
14 Xi albat yuʼun Jeova li Jeremias ta sventa li kʼepelaltike:+
2 Chat yoʼonton li Judae,+ li ochebaletik yuʼune lilijemik xa yalel.
Jinemik yalel ta lumtik ta skoj at-oʼonton
xchiʼuk ti kʼu yelan x-avetik ta at-oʼonton li jnaklejetik ta Jerusalene kʼot xa kʼalal to ta vinajel.
3 Li buchʼutik tsots skʼoplalike tstak batel yajtunelik* sventa xbat saʼik tal voʼ.
Te chbat saʼik tal ti bu jomajtik yavile,* pe muʼyuk tstaik tal voʼ.
Jecheʼ xokol tsut tal yuʼunik li yave.
Chkʼexavik xchiʼuk chopol chaʼi sbaik,
vaʼun chpix li sjolike.
4 Ta skoj ti muʼyuk chakʼ voʼe,
tʼajemik xa li balumile,+
jech oxal mu xa aʼibaj kʼusi tspasik li j-abteletik ta osile xchiʼuk chpix li sjolike.
5 Li meʼ teʼtikalchij ti oy ta osiltik eke chikta komel li yol ti jaʼ to vokʼe,
yuʼun chʼabal xa yaxaltik.
6 Li teʼtikal vuroetike te kotajtik ta sba tʼantʼan bikʼtal vitsetik.
7 Kajval Jeova, akʼo mi chakʼ ta ilel ti oy jmulkutik li kʼusitik chopol ta jpaskutike,
oyuk kʼusi xapas ta skoj li abie.+
Yuʼun ep tajek li kʼusitik muʼyuk tukʼ ta jpaskutike+
xchiʼuk jsaʼoj jmulkutik ta atojolal.
8 Voʼot ti chapatbe yoʼonton Israele, ti voʼot Jkoltavanejot+ yuʼun kʼalal oy svokole,
¿kʼu yuʼun ti xakoʼolaj kʼuchaʼal yan krixchano li ta jteklume?
¿Kʼu yuʼun ti xakoʼolaj kʼuchaʼal jun jxanvil ti jaʼ noʼox te chpaj sventa te chvaye?
9 ¿Kʼu yuʼun ti xakoʼolaj kʼuchaʼal jun vinik ti oy kʼusi labal sba chile?
¿Kʼu yuʼun ti xakoʼolaj kʼuchaʼal jun tsatsal vinik ti mu xuʼ yuʼun xpojvane?
Mu xaviktaunkutik komel.
10 Xi chal li Jeova ta stojolal li jteklum taje: «Jaʼ xlajik-o ti xyal xmuyik noʼoxe;+ mu spajes li yakanike.+ Jaʼ yuʼun, muʼyuk ximuyubaj ta stojolalik voʼon li Jeovaune.+ Avi une, ta jvules ta jol li spaltailike* xchiʼuk chkakʼbe kastigo ta skoj li smulike».+
11 Vaʼun, xi laj yalbun li Jeovae: «Mu xapas orasion sventa sta slekilal li jteklum taje.+ 12 Kʼalal tspasik ayunoe,* muʼyuk ta jchikintabeik mi xvokoletike;+ kʼalal chakʼik skotlej chikʼbil matanale xchiʼuk kʼalal chakʼik sat tsʼunobiletik ta matanale, muʼyuk lek chkil,+ yuʼun ta jlajesbe skʼoplalik ta espada, ta tsatsal viʼnal xchiʼuk ta tsatsal chamel».+
13 Jaʼ yuʼun, xi laj kale: «¡Ay, Kajval Jeova ti Mukʼul Jpasmantalote! Aʼio avaʼi ti xi chal li j-alkʼopetike: ‹Muʼyuk chavilik paskʼop xchiʼuk tsatsal viʼnal, yuʼun chkakʼboxuk melel jun oʼontonal li ta jteklum liʼe›».+
14 Vaʼun, xi laj yalbun li Jeovae: «Li j-alkʼopetike yakal chalik ta jbi albil kʼopetik ti mu meleluke.+ Muʼyuk la jtakik batel, muʼyuk laj kalbeik mantal xchiʼuk mi jaʼuk la jkʼoponik.+ Kʼalal chalboxuk albil kʼopetike, jaʼ chalik li kʼusi mu meleluk akʼbil yilike, li kʼusi jecheʼ chilik ta tʼunole* xchiʼuk li loʼlavanej oy ta yoʼontonike.+ 15 Jaʼ yuʼun, oy kʼusi chal Jeova ta stojolal li j-alkʼopetik ti chalik albil kʼopetik ta jbie, akʼo mi muʼyuk la jtakik batel kʼalal laj yalik ti muʼyuk chilik paskʼop mi jaʼuk tsatsal viʼnal li jteklum liʼe, xi chale: ‹Li vaʼ j-alkʼopetike ta xlajik ta espada xchiʼuk ta tsatsal viʼnal.+ 16 Li krixchanoetik ti yakal ch-albatik albil kʼopetike ta xichʼik jipel lokʼel ta skayealtak Jerusalen ta skoj li tsatsal viʼnale xchiʼuk ta skoj li paskʼope, mi junuk ta xichʼik mukel,+ mi jaʼuk li stukike, li yajnilike, li skeremtakike o li stsebetakike, yuʼun chkakʼbeik talel li vokolil ti staik-oe›.+
17 »Xi skʼan xavalbe yaʼiike:
‹Akʼo lokʼuk yaʼlel jsat ta kʼakʼal akʼobal, muuk xpaj li yaʼlel jsate,+
yuʼun li stojol tseb jteklumale laj xa yichʼ lilinel xchiʼuk lajesel ta j-echʼel,+
solel tsots tajek yayijem kom.
18 Mi lilokʼ batel ta osiltike,
¡te chkil li buchʼutik lajemik ta espadae!+
Jech xtok, mi li-och batel ta jteklume,
¡jaʼ noʼox ta xkil li buchʼutik ipik ta skoj tsatsal viʼnale!+
Yuʼun li j-alkʼopetik xchiʼuk li paleetike xyal xmuyik noʼox li ta balumil ti mu xojtikinike›».+
19 ¿Mi laj xa apʼaj ta j-echʼel li Judae o mi toj chopol xa chavil li Sione?+
¿Kʼu yuʼun la ayayijesunkutik ti mu xa stakʼ poxtael li jyayijemalkutike?+
Jmalaojkutik ox ti xtal jun oʼontonale, pe muʼyuk kʼusi lek tal;
jmalaojkutik ox ti xkichʼkutik poxtaele, ¡pe naka xiʼel vul ta jtojolalkutik!+
20 Kajval Jeova, jnaʼojkutik lek ti jpasojkutik li kʼusitik toj chopole
xchiʼuk ti la saʼ smulik li jmoltotakutike,
la jsaʼ jmulkutik ta atojolal.+
21 Ta skoj li abie, mu xaviktaunkutik;+
mu xapʼaj li achotleb sventa ajvalil ti kʼupil sbae.
Vuleso ta ajol li trato la apas xchiʼuk voʼonkutike, mu xachʼaybe sbalil.+
22 ¿Mi xuʼ xakʼ tal voʼ li jecheʼ diosetik yuʼun mukʼtik lumetike?
¿O mi xuʼ van xakʼ talel tsatsal voʼ stuk li vinajele?+
Kajval Jeova ti voʼot Jdiosotkutike, ¿mi mu voʼotuk noʼox ti spas avuʼun taje?
Jpatoj koʼontonkutik ta atojolal,
yuʼun voʼot apasoj skotol li kʼusitik taje.