Jeremias
16 La skʼoponun tal yan velta li Jeovae, xi laj yalbune: 2 «Mu me xasaʼ avajnil xchiʼuk mu me x-ayan akerem atseb li ta lum liʼe. 3 Yuʼun xi chal Jeova ta stojolal li keremetik xchiʼuk tsebetik ti liʼ chvokʼik ta jteklume xchiʼuk ta stojolal li smeʼik ti jaʼ chvokʼesatike xchiʼuk ta stojolal li stotike: 4 ‹Chchamik ta skoj tsatsal chamel,+ pe muʼyuk buchʼu chat yoʼonton ta stojolalik xchiʼuk muʼyuk buchʼu chmukatik; ta xkʼotik kʼuchaʼal ikʼobal* ta lumtik.+ Chlajik ta espada xchiʼuk ta tsatsal viʼnal,+ li sbekʼtalike chkʼot ta sveʼel mutetik xchiʼuk ta sveʼel chonbolometik ta balumil›.
5 Yuʼun xi chal li Jeovae:
‹Mu xa-och batel ta jpʼejuk na ti bu chokʼita yanimaike
xchiʼuk mu xbat okʼan te xchiʼuk mu kʼuxuk xavaʼibe li svokolike›.+
Xi chal li Jeovae: ‹Yuʼun muʼyuk xa chkakʼbe jun oʼontonal li jteklum liʼe,
muʼyuk xa chkakʼ ta ilel tukʼil kʼanelal ta stojolalik xchiʼuk muʼyuk xa ta jkʼuxubinik.+
6 Ta bikʼit ta mukʼ chchamik li ta jteklum liʼe.
Muʼyuk ta xichʼik mukel,
muʼyuk buchʼu ch-okʼ ta stojolalik,
muʼyuk buchʼu chtuchʼ sbekʼtal xchiʼuk muʼyuk buchʼu tslokʼ sjol ta stojolalik.*
7 Muʼyuk ch-ichʼbat batel sveʼelik sventa xpatbat yoʼontonik
li buchʼutik chokʼita yanimaike;
jech xtok, muʼyuk chbat akʼbatikuk junuk kopa vino ti tspat oʼontonal
sventa xuchʼik ta skoj ti cham stotik o smeʼike.
8 Mu xa-och batel ta jpʼejuk na ti bu tspasik kʼine,
ti te xa jmoj chotoloxuk chaveʼik xchiʼuk cha-uchʼbolajike›.
9 »Yuʼun xi chal li Jeova ti jaʼ bankilal yuʼun soltaroetike,* li Dios yuʼun Israele: ‹Yoʼ to kuxuloxuke chavil ta asat atukik liʼ ta jteklum ti ta jlajesbe skʼoplal li xkuxetel oʼontonale xchiʼuk li muyubajele, li yechʼomal ye jnupunel kereme xchiʼuk li yechʼomal ye jnupunel tsebe›.+
10 »Kʼalal mi laj avalbe jteklum skotol li kʼusi laj kalbote, xi tsjakʼbeikote: ‹¿Kʼu yuʼun laj yal Jeova ti chvul ta jtojolalkutik li tsatsal vokolil taje? ¿Kʼusi chopol la jpaskutik xchiʼuk kʼusi mulil la jpaskutik ta stojolal li Jeova ti jaʼ Jdiostike?›.+ 11 Xi skʼan xatakʼbe yaʼiike: ‹Xi chal li Jeovae: «Jaʼ ta skoj ti laj yiktaikun li amoltotakike,+ ti la stsʼakliik batel yan diosetike, ti tunik ta stojolale xchiʼuk ti la snijan sbaik ta stojolale.+ Jaʼuk li voʼone laj yiktaikun komel xchiʼuk muʼyuk la xchʼunik li jmantale.+ 12 Pe li voʼoxuke mas to toj chopol li kʼusi la apasike, jaʼ xkom to li amoltotakike,+ jaʼ la apasik li kʼusi toj chopol oy ta avoʼontonik ta skoj ti toj pimoxuk ta mantale, jaʼ muʼyuk la achʼunik li jmantale.+ 13 Jaʼ yuʼun, ta jipoxuk lokʼel li ta jteklum liʼe, ta jipoxuk batel ta jun lum ti mu xavojtikinike xchiʼuk ti muʼyuk bu laj yojtikinik li amoltotakike,+ jech xtok, te chlik tunanik ta stojolal yan diosetik ta kʼakʼal akʼobal,+ yuʼun muʼyuk bu chkakʼ ta ilel xkʼuxul koʼonton ta atojolalik»›.
14 »Xi chal li Jeovae: ‹Pe chkʼot skʼakʼalil ti muʼyuk xa xi chalike: «¡Jamal chkal ta skoj kuxul Jeova ti jaʼ li buchʼu la slokʼes tal ta yosilal Ejipto li jteklum Israele!»,+ 15 yuʼun xi xa chalike: «¡Jamal chkal ta skoj kuxul Jeova ti jaʼ li buchʼu la slokʼes tal jteklum Israel li ta yosilal nortee xchiʼuk ta skotol li jteklumetik ti bu toʼox spukoj batele!», ta xkikʼik sutel tal li ta yosilalik ti laj kakʼbe li smoltotakike›.+
16 Xi chal li Jeovae: ‹Ta jtak tal ta ikʼel epal jtsakchoyetik,
vaʼun ta xichʼik tael ta tsakel li jteklumale.
Ta tsʼakale, ta jtak tal ta ikʼel epal jnutsoletik,
vaʼun ta xichʼik tael ta nutsel ta vitstikaltik, ta bikʼtal vitstikaltik
xchiʼuk ta sjavbenaltak tayal tonetik.
17 Yuʼun te oy jsat ta skotol li kʼusi tspasike.*
Muʼyuk kʼusi makal ta jsat
xchiʼuk mi jaʼuk stakʼ smukik ta jtojolal li spaltailike.*
18 Pe yoʼ to mu xkikʼik sutel tal li ta yosilalike, baʼyel lek tsʼakal chkakʼbe stojik li spaltailik*+ xchiʼuk smulike,
yuʼun laj xa sokesik kosil ta skoj li slokʼol sdiostakik ti muʼyuk kuxulike xchiʼuk ti ibalik sbae*
xchiʼuk li jrexto* osile laj xa snojesik li ta kʼusitik ibalik sba yuʼunike›».+
19 Kajval Jeova, voʼot kipalot xchiʼuk voʼot jtsatsal pojobbailot,
voʼot noʼox te chital ta atojolal kʼalal oy jvokole,+
chtalik ta atojolal li mukʼtik lumetik kʼalal to ta spajeb balumile,
xi chalike: «Li jmoltotakutike jaʼ la xrextoinik* li jecheʼ diosetike,
li kʼusitik muʼyuk stue xchiʼuk li kʼusitik jecheʼ ti muʼyuk sbalile».+
20 ¿Mi spas yuʼun diosetik li jun krixchanoe?
Li kʼusi tspase maʼuk melel diosetik.+
21 «Jaʼ yuʼun, chkakʼbe snaʼik,
chkakʼbe yilik ta j-echʼel li juʼel xchiʼuk kipale,
vaʼun persa tsnaʼik ti jaʼ Jeova li jbie».