Jeremias

39 Kʼalal sbalunebal xa ox jabil yochel ta ajvalil ta Juda li Sedekiase, jaʼo li ta slajunebal ue, li Nabukodonosor* ti jaʼ ajvalil ta Babiloniae xchiʼuk skotol li yajsoltarotake talik ta Jerusalen xchiʼuk la setuik.+

2 Kʼalal 11 jabil xa ox yochel ta ajvalil li Sedekiase, jaʼo li ta sbalunebal kʼakʼal ta xchanibal ue, la svokʼik ochel li smuroal jteklume.+ 3 Skotol li bankilaletik yuʼun ajvalil ta Babiloniae ochik batel xchiʼuk te bat chotiikuk li ta ochebal ta Oʼlole,+ jaʼik li Nergal-Sareser ti jaʼ samgare, li Nebo-Sarsekim ti jaʼ rabsarise,* li Nergal-Sareser ti jaʼ rabmague* xchiʼuk skotol li yan bankilaletik yuʼun ajvalil ta Babiloniae.

4 Li Sedekias ti jaʼ ajvalil ta Judae xchiʼuk skotol li soltaroetike laj yilik, vaʼun jatavik batel.+ Ta akʼobaltik lokʼik batel li ta jteklume, te jelavik batel li ta nichimaltik yuʼun ajvalile, te lokʼik batel li ta ochebal ti bu oy chib muroe xchiʼuk jaʼ la stambeik batel li sbelel Arabae.+ 5 Pe li yajsoltarotak jkaldeaetike la snutsik batel li Sedekiase, te la staik ta takixokol balumil ta stenlejaltik yuʼun Jeriko.+ La stsakik xchiʼuk laj yikʼik batel ta stojolal li Nabukodonosor* ti jaʼ ajvalil ta Babiloniae, jaʼo te oy li ta Ribla+ ti jaʼ yosilal Amate,+ vaʼun te laj yal kʼusi chichʼ pasbel. 6 Li Sedekiase te skʼeloj kʼalal laj yichʼ milbel li xnichʼnab te ta Riblae xchiʼuk laj yichʼik milel skotol li bankilaletik ta Judae. Yuʼun jech laj yal mantal li ajvalil ta Babiloniae.+ 7 Vaʼun, li ajvalile la spitsbe lokʼel sbekʼ sat li Sedekiase, laje la xchuk ta kadena ti pasbil ta kovre sventa xichʼ ikʼel batel ta Babiloniae.+

8 Vaʼun, li jkaldeaetike la xchikʼbeik li sna* ajvalile xchiʼuk li naetik ta jteklume,+ la sjinesik li smuroaltak Jerusalene.+ 9 Li Nebusaradan+ ti jaʼ bankilal yuʼun jchabivanejetike la xchuk batel ta Babilonia li yan buchʼutik te to komemik ta jteklume, li buchʼutik laj yakʼ sbaik ta skʼob li jkaldeaetike xchiʼuk skotol li buchʼutik te to oyike.

10 Pe li Nebusaradan ti jaʼ bankilal yuʼun jchabivanejetike te laj yikta ta yosilal Juda li buchʼutik povreik tajeke, jaʼ li buchʼutik muʼyuk kʼusi x-ayan yuʼunike. Li vaʼ kʼakʼal xtoke, laj yakʼanbe ti bu tsʼunajtik uvae xchiʼuk osiletik sventa xabtelanik.*+

11 Vaʼun, li Nabukodonosor* ti jaʼ ajvalil ta Babiloniae laj yalbe kʼusi skʼan spas ta stojolal Jeremias li Nebusaradan ti jaʼ bankilal yuʼun jchabivanejetike, xi laj yalbee: 12 «Ikʼo batel xchiʼuk chabio; mu me kʼusi chopol xapasbe jsetʼuk* xchiʼuk akʼbo me skotol ti kʼusi tskʼanbote».+

13 Jaʼ yuʼun, li Nebusaradan ti jaʼ bankilal yuʼun jchabivanejetike, li Nebusasban ti jaʼ rabsarise,* li Nergal-Sareser ti jaʼ rabmague* xchiʼuk skotol li bankilaletik yuʼun ajvalil ta Babiloniae la stakik batel viniketik 14 sventa xikʼik lokʼel tal Jeremias li ta Yamakʼ* Jchabivanejetike+ xchiʼuk ti xakʼbeik batel li Guedalias+ ti jaʼ xnichʼon Aikam+ xchiʼuk ti jaʼ smom Safane+ sventa xikʼ batel ta sna. Jaʼ yuʼun, te xa la xchiʼin ta naklej li xchiʼiltak ta jteklume.

15 Kʼalal te toʼox chukul ta Yamakʼ* Jchabivanejetik+ li Jeremiase, kʼoponat tal yuʼun Jeova, xi albate: 16 «Batan, xi xbat avalbe li Ebed-Melek+ ti jaʼ j-etiopia vinike: ‹Xi chal li Jeova ti jaʼ bankilal yuʼun soltaroetike,* li Dios yuʼun Israele: «Chkʼot ta pasel kuʼun li kʼusi kaloj ta stojolal li jteklum liʼe, jaʼ sventa svokolik, maʼuk sventa slekilalik. Li vaʼ kʼakʼale, chavil ti jech chkʼot ta pasele»›.

17 »‹Pe li vaʼ kʼakʼale, voʼon ta jpojot, muʼyuk chavichʼ akʼel ta skʼob li viniketik ti chaxiʼ yuʼune›, xi li Jeovae.

18 »‹Yuʼun jpʼel skʼoplal ta jkoltaot xchiʼuk muʼyuk chalaj ta espada. Ta xpoj avuʼun li akuxlejale,*+ yuʼun la apat avoʼonton ta jtojolal›,+ xi li Jeovae».