Jeremias
4 Xi chal li Jeovae: «Mi lasut tale, Israel,
mi lasut tal ta jtojolale
xchiʼuk mi la alokʼes batel ta yeloval jsat li ibal sba* lokʼoletik avuʼune,
vaʼun bi, muʼyuk xa chakʼot kʼuchaʼal jun jatvil.+
2 Mi xi jamal chavakʼ avee:
‹¡Jamal chkal ta skoj kuxul Jeova!›, mi melel li kʼusi chavale xchiʼuk mi tukʼ li kʼusi chlokʼ ta avee,
vaʼun bi, li mukʼtik lumetike ta staik bendision ta stojolal*
xchiʼuk ta xmuyubajik ta stojolal».+
3 Yuʼun li Jeovae xi chalbe li viniketik ta Juda xchiʼuk ta Jerusalene:
«Lokik li osil ti bu oy kʼusi xchʼie
xchiʼuk mu teuk-o xatsʼunolajik ti bu oy chʼixetike.+
4 Viniketik ta Juda xchiʼuk jnaklejetik ta Jerusalen,
ichʼik sirkunsision,* vaʼun jech chavakʼ abaik ta stojolal li Jeovae.
Ichʼik sirkunsision ta avoʼontonik+
sventa mu stsan kʼuchaʼal kʼokʼ li skapemal jole
xchiʼuk ti xtil tajek ti muʼyuk xa buchʼu xtupʼ yuʼune,
ta skoj li kʼusitik chopol chapasike».+
5 Alik batel ta Juda xchiʼuk pukik batel ta Jerusalen.
Avananik xchiʼuk jupanik kachu ta sjunul li mukʼta lume.+
Tsots xa-avanik xchiʼuk xi xavalike: «Tsobo abaik
xchiʼuk jatavkutik batel li ta jteklumetik ti lek joybil ta muroe.+
6 Toyik muyel junuk senyail* ti chakʼ ta ilel li sbelel Sione.
Saʼo anakʼobbailik, mu teuk noʼox ameyoj akʼob xakomik»,
yuʼun chkakʼ talel vokolil ta norte,+ jun tsatsal vokolil.
7 Li jkontrainvaneje lokʼ xa talel kʼuchaʼal jkot leon ti te oy ta chʼixtikaltike;+
lokʼ xa talel li buchʼu tslajes mukʼtik lumetike.+
Lokʼ xa talel ta yosilal sventa xibaluk sba xkom yuʼun li ateklumale.
Ta xichʼ jinesel ta j-echʼel li jteklumetik avuʼune, mi junuk jnaklej te chkom.+
8 Jaʼ yuʼun, lapik chʼixal kʼuʼil,*+
okʼanik ta at-oʼonton* xchiʼuk ijetanik,*
yuʼun liʼ oy-o ta jtojolaltik li skʼakʼal yoʼonton Jeova ti xtiltun tajeke.
9 Xi chal li Jeovae: «Li vaʼ kʼakʼale, chlaj stsatsal yoʼonton li ajvalile,+
jech xtok, chlaj stsatsal yoʼonton li bankilaletike;
li paleetike ta xchʼay xchʼulelik ta xiʼel xchiʼuk li j-alkʼopetike chʼayal to yoʼonton chkomik».+
10 Vaʼun, xi laj kale: «¡Ay, Kajval Jeova ti Mukʼul Jpasmantalote! Ta melel, aloʼlaoj ta j-echʼel li jteklum liʼe+ xchiʼuk li Jerusalen kʼalal xi laj avale: ‹Chataik jun oʼontonal›,+ pe tijanbil xa espada li ta jnukʼkutike».
11 Li vaʼ kʼakʼale, xi chichʼ albel li jteklum liʼe xchiʼuk li Jerusalene:
«Chlik talel jchikʼvanej ikʼ ta tʼantʼan bikʼtal vitsetik ta takixokol balumil,
ch-echʼ smes li stseb jteklumale;*
maʼuk chtal sventa chikʼa mi jaʼuk sventa tslokʼesbe li yikʼobale.
12 Li tsatsal ikʼ ti xjumet tajeke chchʼun talel li jmantale.
Vaʼun, voʼon ta jchapanik.
13 ¡Kʼelavilik! Li jkontrainvaneje chtal kʼuchaʼal tok ti xkuchoj talel voʼe,
li skaretatake xkoʼolaj kʼuchaʼal tsatsal ikʼ.+
Li skaʼtake mas to anil xyoletik* kʼuchaʼal aguila.+
¡Toj abol jbatik, yuʼun chkichʼtik lajesel!
14 Jerusalen, pokbo lokʼel xchopolil li avoʼonton sventa xavichʼ koltaele.+
¿Bakʼin to te chanakʼ* li kʼusitik toj chopol chanope?
15 Yuʼun oy jun yechʼomal eil ti chal aʼyejetik te to ta Dane+
xchiʼuk chalbe skʼoplal vokolil te to ta vitstikaltik yuʼun Efrain.
16 Albeik batel li mukʼtik lumetike.
Albeik li Jerusalene».
«Ta xtal jpaʼivanejetik* ta namal lum
xchiʼuk chlik stoy yechʼomal yeik ta stojolal li jteklumetik ta Judae.
17 Chvul setuik li Jerusalen jech kʼuchaʼal jchabivanejetik ti setelik ta xchabiel tsʼunobiletik li ta jamal osiltike,+
yuʼun laj xa stoy sba ta jtojolal»,+ xi li Jeovae.
18 «Ti kʼu yelan atalelale xchiʼuk li kʼusitik chapase chvul ta aba atuk.+
¡Toj echʼ xa noʼox kʼux li vokolil chvul ta atojolale,
yuʼun yakʼoj xa yibel ta avoʼonton li atoyobbaile!».
19 ¡Ti xkʼuxul xa noʼox li jvokole, ti xkʼuxul xa noʼox li jvokole!
Chkʼot kʼalal to ta koʼonton li xkʼuxule.
Solel xpʼitpʼun li koʼontone.
20 Xvul-o xvul-o* yaʼyejal li vokoliletike,
yuʼun laj xa yichʼ lajesel sjunul li mukʼta lume.
Yuʼun ta anil noʼox laj yichʼ lajesel li jkarpanatake,
ta anil noʼox laj yichʼ lajesel li spokʼal jkarpanae.+
21 ¿Kʼu to van sjalil ta jkʼel li senyail* ti chakʼ ta ilel li sbelel Sione,
ti ta xkaʼi chbakʼ li yechʼomal kachue?+
22 «Yuʼun bol li jteklumale.+
Muʼyuk tstsakikun ta venta.
Bol nichʼoniletik, mu xaʼibeik smelolal.
Lek xtojobik* spasel li kʼusi chopole,
pe jaʼ mu snaʼik kʼuxi ta pasel li kʼusi leke».
23 Kʼalal la jkʼel li balumile, laj kil ti xokol xchiʼuk ti muʼyuk kʼusi x-ayane.+
La jkʼel muyel li vinajele, vaʼun muʼyuk xa kʼusi chojobinaj.+
24 Kʼalal la jkʼel li vitsetike, laj kil ti chnikike
xchiʼuk ti xniknun li bikʼtal vitsetike.+
25 Kʼalal la jkʼel batele, laj kil ti chʼabal mi junuk krixchanoe
xchiʼuk ti jatavem batel skotol li mutetike.+
26 Kʼalal la jkʼel batele, laj kil ti kʼatajem xa ox ta takixokol balumil ti bu toʼox tsʼunobaltike
xchiʼuk ti laj xa ox yichʼ jinesel skotol li jteklumetik yuʼune.+
Taje jaʼ ta skoj li Jeovae,
jaʼ ta skoj ti xtiltun li skʼakʼal yoʼontone.
27 Yuʼun xi chal li Jeovae: «Xokol ta xkom sjunul li jteklume,+
pe muʼyuk ta jlajesbe skʼoplal ta j-echʼel.
Yuʼun jech kaloj, jech kʼotem ta nopel kuʼun,
muʼyuk ta jel* li kʼusi kʼotem ta nopel kuʼune, mi jaʼuk ta jsutes ke.+
29 Kʼalal xvochetik* li viniketik ti kajajtik ta kaʼe xchiʼuk li j-akʼflechaetike,
chjatavik batel sjunul li jteklume.+
Ch-ochik batel li ta chʼixtikaltike
xchiʼuk chmuyik batel li ta mukʼta tonetike.+
Muʼyuk xa yajval ta xkom li jteklumetike
xchiʼuk mi junuk krixchano te chkom nakiuk».
30 Li avi ti avichʼoj xa lajesel ta j-echʼele, ¿kʼusi van chapas?
Kuxul tsoj toʼox li akʼuʼ apokʼ chalape,
chakʼupiltas toʼox aba ta natsʼiletik* ti pasbil ta oroe
xchiʼuk chabon toʼox ta ikʼal pintura* li stiʼiltak asat sventa kʼupiluk sbae.
Pe jecheʼ noʼox ti la akʼupiltas abae,+
yuʼun li buchʼutik xtijetik* toʼox ta apat ti tskʼan chchiʼinikot ta vayele spʼajojikot xa;
avie, tskʼan xa tsmilikot.+
31 Yuʼun laj xa kaʼi yechʼomal eil ti xkoʼolaj kʼuchaʼal jun ants ti ipe,
ti oy buchʼu x-avet ta svokol ti xkoʼolaj kʼuchaʼal jun ants ti jaʼ to chvokʼ li sba yole,
jaʼ li yechʼomal ye stseb Sion ti vokol xa tajek chichʼ ikʼe.
Xi chal kʼalal jaʼo syeʼoj muyel skʼobe:+
«¡Abol jba, yuʼun solel lilub xa tajek ta skoj li buchʼutik chmilvanike!».