Jeremias
11 Liʼe jaʼ li kʼusi albat yuʼun Jeova li Jeremiase, xi albate: 2 «¡Jnaklejetik ta jteklum, chikintaik li trato la jpase!».
«Albo yaʼiik* li viniketik ta Judae xchiʼuk li jnaklejetik ta Jerusalene, 3 xi xavalbe yaʼiike: ‹Xi chal li Jeova ti jaʼ li Dios yuʼun Israele: «Akʼo yichʼ chopol kʼoptael li vinik mi muʼyuk chchʼun li trato la jpase,+ 4 ti jaʼ laj kalbeik li amoltotakik kʼalal la jlokʼesik tal li ta yosilal Ejiptoe,+ li orno ti chunijes takʼine,+ xi laj kalbeike: ‹Chʼunik li kʼusi chkale xchiʼuk pasik skotol li kʼusi chkalboxuke; vaʼun chakʼotik ta jteklumal xchiʼuk voʼon chikʼot ta Adiosik,+ 5 sventa xkʼot ta pasel kuʼun li kʼusi jamal laj kalbe li amoltotakike, ti chkakʼbeik li balumil ti bu oy lek leche xchiʼuk pome,+ ti jaʼ li bu nakaloxuk-o li avie›»›».
Vaʼun, xi la jtakʼe: «Jechuk,* Kajval Jeova».
6 Vaʼun, xi laj yalbun li Jeovae: «Xi xaval batel li ta jteklumetik yuʼun Juda xchiʼuk ta skayealtak Jerusalen li kʼusi laj kalbote: ‹Chikintaik li trato la jpase xchiʼuk kʼotuk me ta pasel avuʼunik. 7 Yuʼun ti kʼuxi la jlokʼesik tal ta yosilal Ejipto li amoltotakik kʼalal to avie, jech-o tsots laj kalbeik tal mantal, ep ta velta xi laj kalbeik mantale:* «Chʼunik li kʼusi chkale».+ 8 Pe muʼyuk bu laj yaʼiik xchiʼuk muʼyuk la stsʼet chikintaik, yuʼun ta skoj ti pimik ta mantale, jaʼ noʼox la spasik li kʼusi tskʼan yoʼonton stukik ti toj chopole.+ Jech oxal, laj kakʼ taluk ta stojolalik li kʼusi kaloj li ta trato la jpase, yuʼun muʼyuk la xchʼunik li kʼusi laj kalbeike›».
9 Vaʼun, xi laj yalbun li Jeovae: «Spasoj ta jmoj sjolik li viniketik ta Juda xchiʼuk li jnaklejetik ta Jerusalene. 10 Lik spasik li kʼusitik chopol la spasik li smoltotakik ta voʼnee, ti muʼyuk la skʼan la xchʼunik li kʼusi laj kale.+ Li stukik eke la stsʼakliik batel yan diosetik xchiʼuk tunik ta stojolal.+ Li jteklum Israele xchiʼuk li jteklum Judae laj xa sokesbeik skʼoplal li trato la jpas xchiʼuk smoltotakike.+ 11 Jaʼ yuʼun, xi chal li Jeovae: ‹Kʼelavil, ta xkakʼ talel vokolil+ ta stojolalik ti mu xuʼ spoj sbaik lokʼele. Kʼalal xvokoletik tskʼanbeikun koltaele, muʼyuk ta jchikintabeik.+ 12 Vaʼun, li jteklumetik ta Judae xchiʼuk li jnaklejetik ta Jerusalene, chbatik ta stojolal li diosetik ti chakʼbeik milbil matanale* xchiʼuk ti xvokolet tskʼanbeik koltaele,+ pe mi jsetʼuk* ta xkoltaatik kʼalal jaʼo chil svokolike. 13 Yuʼun li Judae epajem tajek sdiostak jech kʼuchaʼal ep tajek li jteklumetik yuʼune xchiʼuk solel ep svaʼanojbe skajleb smoton li kʼusi kʼexlal sba* jech kʼuchaʼal ep tajek li skayeal Jerusalene, jaʼ li skajleb matanaletik sventa te chichʼ akʼbel milbil matanaletik li Baale›.+
14 »Li voʼot eke,* mu xapas orasion ta stojolal li jteklum liʼe. Mu xakʼanbun vokol ta orasion ta skojik+ xchiʼuk mi jaʼuk xavokoletuk xa ta stojolalik, yuʼun muʼyuk ta jchikintabeik kʼalal mi xvokolet tskʼanbeikun koltael ta skoj li svokolike.
15 ¿Mi yuʼun oy sderecho sventa teuk ta jna li buchʼutik jkʼanoj
ti ep buchʼutik spasojik kʼusi chopole?
¿Mi yuʼun jaʼ tspojoxuk li milbil matanal* kʼalal mi tal li avokolike?
¿Mi ta van xamuyubaj li vaʼ kʼakʼale?
16 Li Jeovae la sbiiltasot toʼox ta mukʼta teʼel oliva
ti kʼupil sba xvinaj xchiʼuk li sat ti lekike.
Pe oy kʼusi tsots bakʼ, vaʼun la xchikʼ
xchiʼuk laj yichʼ kʼasbel li skʼobtake.
17 »Li Jeova ti jaʼ bankilal yuʼun soltaroetike,* ti jaʼ Jtsʼunvanej avuʼune,+ yaloj ti chtal vokolil ta atojolal ta skoj li kʼusitik chopol spasoj li jteklum Israele xchiʼuk li jteklum Judae, ti saʼojbeikun jol ta skoj ti chakʼbeik milbil matanal li Baale».+
18 Li Jeovae laj yalbun sventa jnabe skʼoplal;
li vaʼ kʼakʼale, laj avakʼbun kil li kʼusi yakal tspasike.
19 Li voʼone xikoʼolaj toʼox kʼuchaʼal manxo chʼiom chij, ti chichʼ ikʼel batel sventa chichʼ milele.
Mu toʼox jnaʼ ti oy kʼusi chopol tsnop tspasbeikune,+ xi chalike:
«Jtsʼetik lokʼel xchiʼuk sat li teʼe,
jlajesbetik skʼoplal ta balumil ti bu oy kʼusitik kuxajtike,
vaʼun jech mu xa xichʼ tael ta naʼel li sbie».
20 Pe tukʼ chchapanvan li Jeova ti jaʼ bankilal yuʼun soltaroetike,
chchaj ta kʼelel li koʼontontike xchiʼuk li kʼusi oy ta yutil to jnopbentike.*+
Akʼbun kil ti kʼu yelan chapakbe sutele,
yuʼun kakʼoj xa ta akʼob sventa voʼot xapakbun jkʼoplal.
21 Jaʼ yuʼun, xi chal Jeova ta stojolal li viniketik ta Anatot+ ti tskʼan tsmilikote xchiʼuk ti xi chalike: «Mu xaval albil kʼop ta sbi li Jeovae,+ o mi moʼoje, ta jmilotkutik»; 22 jaʼ yuʼun xi chal li Jeova ti jaʼ bankilal yuʼun soltaroetike: «Kʼelavil, chkakʼbeik kastigo. Chichʼik milel ta espada li keremetike,+ li skerem stsebike chchamik ta tsatsal viʼnal.+ 23 Mi junuk buchʼu kuxul chkom yuʼunik, yuʼun chkakʼ taluk vokolil ta stojolal li viniketik ta Anatote,+ li ta sjabilal kʼalal chichʼik akʼbel kastigoe».