Jeremias
24 Li Nabukodonosor* ti jaʼ ajvalil ta Babiloniae la xchuk batel li Jekonias*+ ti jaʼ xnichʼon Jeoiakim+ xchiʼuk ti jaʼ ajvalil ta Judae, laj yikʼ batel xtok li bankilaletik ta Judae, li buchʼutik xtojobik spasel kʼusitike xchiʼuk li buchʼutik chabtelanik takʼine.* Lokʼesatik batel ta Jerusalen sventa x-ikʼatik batel ta Babilonia.+ Laj une, li Jeovae laj yakʼbun kil chib moch igo ti te lechajtik ta yeloval stemplo Jeovae. 2 Li ta jun moche te oy lekil igoetik, xkoʼolaj kʼuchaʼal li sba sat igoe, pe li ta yan moche te oy chopol igoetik, mu xa stakʼ loʼel ta skoj ti toj chopolike.
3 Vaʼun, xi la sjakʼbun li Jeovae: «¿Kʼusi te chavil, Jeremias?». Xi la jtakʼbee: «Te chkil igoetik; li lekil igoetike toj echʼ xa noʼox lekik, pe li chopol igoetike toj echʼ xa noʼox chopolik, mu xa stakʼ loʼel ta skoj ti toj chopolike».+
4 Vaʼun, la skʼoponun tal li Jeovae, xi laj yalbune: 5 «Xi chal li Jeovae, li Dios yuʼun Israele: ‹Jech kʼuchaʼal li lekil igoe jaʼ jech lek chkil li jnaklejetik ta Juda ti chukbilik batele, ti la jlokʼesik batel sventa jtakik batel li ta yosilal jkaldeaetike. 6 Chkakʼ batel jsat ta stojolalik sventa lekuk oyik xchiʼuk chkakʼ sutikuk tal li ta lum liʼe.+ Ta jvaʼanik, pe muʼyuk ta jinesik; ta jtsʼunik, pe muʼyuk ta jbulik lokʼel.+ 7 Ta jtijbe yoʼontonik sventa xojtikinikun ti voʼon Jeovaune.+ Vaʼun, chkʼotik ta jteklumal xchiʼuk voʼon chikʼot ta Sdiosik,+ yuʼun ta sjunul yoʼonton tsutik talel ta jtojolal.+
8 »›Pe xi chal Jeova ta sventa li chopol igoetik ti mu xa stakʼ loʼel+ ta skoj ti toj chopolike: «Jaʼ jech ta xkil li Sedekias+ ti jaʼ ajvalil ta Judae, li bankilaletik yuʼune, li buchʼutik kuxul komik ta Jerusalen ti te komik ta Judae xchiʼuk ti te batik ta Ejiptoe.+ 9 Toj echʼ xa noʼox chopol li vokolil chkakʼ tal ta stojolalike. Kʼalal ta xilik li krixchanoetik ta skotol jteklumetik ta balumile,+ ta xiʼik ta skoj li kʼusi chkʼot ta stojolalike, ta xchopol kʼoptaik, jaʼ skʼelobil chkʼotik ti chopol skʼoplalike, ta xichʼik labanel xchiʼuk ta xichʼik chopol kʼoptael+ ti butik ta jpukik batele.+ 10 Ta xkakʼ ti xlajik ta espadae,+ ta tsatsal viʼnal xchiʼuk ta tsatsal chamel,+ jaʼ to mi tupʼ skʼoplalik li ta balumil ti laj kakʼbeike xchiʼuk ti laj kakʼbeik li smoltotakike»›».