Esekiel

6 »›Mi laj yil jkʼel-osil ta toyol ti te xa yebil talel li espadae, pe mi muʼyuk ta sjupan li kachu+ sventa spʼijubtas li jnaklejetike xchiʼuk mi oy buchʼu laj ta espadae, chcham ta skoj smul stuk, pe jaʼuk li xchʼichʼele jaʼ chkom ta sba kuʼun li jkʼel-osil ta toyole›.+

7 »Li voʼote, xnichʼon krixchano, laj xa jvaʼanot ta jkʼel-osil ta toyol ta stojolal li jteklum Israele. Kʼalal mi laj avaʼi li kʼusi chlokʼ ta kee, skʼan xavalbe yaʼiik li kʼusi chkale.+ 8 Kʼalal mi xi laj kalbe li buchʼu toj chopole: ‹Jpaschoplejal, ¡jpʼel skʼoplal chacham!›,+ pe mi muʼyuk xapʼijubtas xchiʼuk mi muʼyuk laj avalbe ti xikta li xchopol bee, chcham ta skoj smul stuk,+ jech jpaschoplejal chcham-o. Pe voʼot chkom ta aba kuʼun li xchʼichʼele. 9 Yan mi la apʼijubtas li buchʼu toj chopol sventa xikta li xchopol bee, mi mu xikta li be bu stamoj batele, chcham ta skoj smul stuk,+ pe li voʼote jpʼel skʼoplal kuxul chakom.*+

10 »Li voʼote, xnichʼon krixchano, xi xavalbe yaʼi li jteklum Israele: ‹Li voʼoxuke xi avalojike: «Ol tajek chkaʼitik li jtoyobbailtike xchiʼuk li jmultike, jech oxal chijlaj xa batel yuʼun.+ ¿Kʼuxi xa noʼox ti chijkuxi to jeche?»›.+ 11 Xi xavalbe yaʼiike: ‹Xi chal li Ajvalil Jeova ti jaʼ Mukʼul Jpasmantale: «Jamal chkal ta skoj ti kuxulune, muʼyuk xkuxet xa koʼonton kʼalal chcham li buchʼu toj chopole,+ jaʼ xkuxet koʼonton yuʼun mi laj yikta komel li xchopol bee+ xchiʼuk ti xkuxie.+ Komtsanik, iktaik komel li achopol beike,+ ¿kʼu yuʼun ti te noʼox akʼeloj aba chachamike, jteklum Israel?»›.+

12 »Li voʼote, xnichʼon krixchano, xi xavalbe yaʼi li xnichʼnabtak ateklumale: ‹Li tukʼil krixchanoe mu xkoltaat yuʼun stukʼil kʼalal mi la stoy sbae;+ li buchʼu toj chopole muʼyuk chcham ta skoj xchopolil kʼalal mi laj yikta spasel li kʼusi chopole.+ Jech xtok, mi junuk tukʼil krixchano xuʼ xkuxi-o ta skoj stukʼil mi la saʼ smule.+ 13 Kʼalal mi xi laj kalbe li buchʼu tukʼe: «Jpʼel skʼoplal chakuxi», pe mi lik spat yoʼonton ta sventa ti tukʼ kʼusi tspase xchiʼuk mi lik spas li kʼusi chopole,*+ muʼyuk chichʼ vulesel ta jolil li kʼusi tukʼ spasoje, ta xcham ta skoj li kʼusitik chopol spasoje.+

14 »›Xchiʼuk mi xi laj kalbe li buchʼu toj chopole: «Jpʼel skʼoplal chacham», pe mi chlik skomtsan li smule, mi chlik spas li kʼusi tukʼ xchiʼuk kʼusi leke,+ 15 mi chakʼ sutel li kʼusi yichʼoj ta prentale,*+ mi tsutes li kʼusi yelkʼanoje,+ mi chchʼun li mantaletik ti chakʼ kuxlejal xchiʼuk ti muʼyuk xa tspas li kʼusi chopole, jpʼel skʼoplal chkuxi.+ Muʼyuk ta xcham. 16 Muʼyuk chichʼ tsakbel ta venta* jtosuk li smul la spase.+ Ta skoj ti jaʼ tspas li kʼusi tukʼ xchiʼuk kʼusi leke, jpʼel skʼoplal chkuxi›.+

17 »Pe li ateklumale xi yaloje: ‹Muʼyuk tukʼ li sbe Jeovae›, akʼo mi jaʼ muʼyuk tukʼ li sbe stukike.

18 »Kʼalal chikta spasel kʼusi lek li buchʼu tukʼe xchiʼuk ti jaʼ chlik spas li kʼusi chopole, ta xcham ta skoj ti jech tspase.+ 19 Pe mi la skomtsan spasel kʼusitik toj chopol li jpaschoplejale xchiʼuk mi lik spas li kʼusi tukʼe xchiʼuk li kʼusi leke, muʼyuk ta xcham ta skoj ti jech tspase.+

20 »Pe li voʼoxuke xi avalojike: ‹Muʼyuk tukʼ li sbe Jeovae›.+ Jteklum Israel, voʼon ta jchapanoxuk ta jujuntal ta skoj ti kʼu yelan atalelalike».

21 Vaʼun, kʼalal 12 jabil xa ox kichʼojkutik chukel batele, kʼalal ta svoʼobal xa ox kʼakʼal yochel li slajunebal ue, tal skʼelun jun vinik ti jatav lokʼel talel ta Jerusalene,+ xi laj yalbune: «¡Laj xa yichʼ jinesel li jteklume!».+

22 Pe kʼalal jun toʼox akʼobal skʼan xvul li vinik ti jatav lokʼel tale, vul ta jtojolal li s-espiritu* Jeovae, vaʼun sjamojbun xa onoʼox ke kʼalal muʼyuk toʼox talem skʼelun ta sob li vinike. Jaʼ jech jam li kee xchiʼuk lik kʼopojkun yan velta.+

23 Vaʼun, la skʼoponun tal li Jeovae, xi laj yalbune: 24 «Xnichʼon krixchano, li jnaklejetik ta jteklumetik ti jinemike+ xi chalik ta stojolal li yosilal Israele: ‹Li Abraane stuk noʼox, pe laj yuʼunin li osile.+ Yan li voʼotike eputik tajek, jech oxal laj kichʼtik akʼbel ta jpartetik li osile›.

25 »Jaʼ yuʼun, xi xavalbe yaʼiike: ‹Xi chal li Ajvalil Jeova ti jaʼ Mukʼul Jpasmantale: «Li voʼoxuke kapal ta xchʼichʼel li bekʼet chatiʼike,+ chatoy batel asatik ta stojolal li ibal sba santoetik* avuʼunike xchiʼuk jech-o yakal chamalik chʼichʼ.+ Jaʼ yuʼun, ¿mi xkʼot-o to van ti xavuʼuninik li osile? 26 Apatoj avoʼontonik yuʼun li a-espadaike,+ chapasik li kʼusitik toj chopole xchiʼuk achiʼinojbeik ta vayel li yajnil achiʼilike.+ Jaʼ yuʼun, ¿mi xkʼot-o to van ti xavuʼuninik li osile?»›.+

27 »Xi skʼan xavalbe yaʼiike: ‹Xi chal li Ajvalil Jeova ti jaʼ Mukʼul Jpasmantale: «Jamal chkal ta skoj ti kuxulune, chlajik ta espada li buchʼutik te to nakalik ta lumetik ti jinemik xae; chkakʼ ti xkʼotik ta sveʼel jtiʼvanej chonbolometik li buchʼutik nakalik ta jamal osiltike; jech xtok, chlajik ta skoj chamel+ li buchʼutik te oyik ta tsatsal pojobbailetik xchiʼuk ta chʼenetike. 28 Xokol chkom kuʼun ta j-echʼel li yosilalike+ xchiʼuk ta jlajesbe skʼoplal li stoyobbailike xchiʼuk ti jpʼel xalike. Stsʼijlan* ta xkom li vitsetik yuʼun Israele,+ muʼyuk buchʼu te chjelav batel. 29 Kʼalal mi xokol laj kikta ta j-echʼel li yosilalik+ ta skoj li kʼusitik toj chopol la spasike,+ jech tsnaʼik ti voʼon Jeovaune»›.

30 »Xnichʼon krixchano, li ateklumale oy kʼusi chalik ta atojolal te ta xokon muroetik xchiʼuk ta tiʼ naetik.+ Xi chalbe sbaik ta jujuntale, xi chalbe li xchiʼiltakike: ‹Laʼik, bat kaʼitik li aʼyej likem tal ta stojolal Jeovae›. 31 Ep tstsob sbaik sventa xtal chotiikuk ta aveloval jech kʼuchaʼal tspas li jteklumale; chchikintaik li kʼusi chavale, pe muʼyuk chakʼ ta xkuxlejalik.+ Yuʼun akʼo mi jun xa yutsil kʼusi chalbeikot yilel, oy tajek ta yoʼontonik tspasik kanal takʼin ta loʼlavanej. 32 ¡Kʼelavil! Xakoʼolaj chilik kʼuchaʼal jun jkʼejimol ti kʼupil sba yechʼomal yee, ti xtojob lek stijel li stijobil son ti oy yakʼiltake xchiʼuk ti tskʼejinta jun kʼejimol sventa kʼanbaile. Chchikintaik li kʼusi chavale, pe muʼyuk buchʼu chakʼ ta xkuxlejal. 33 Kʼalal mi kʼot ta pasel taje, tsnaʼik ti oy echʼ jun j-alkʼop ta stojolalike,+ yuʼun jpʼel skʼoplal chkʼot ta pasel».