Jeremias
19 Xi laj yal li Jeovae: «Batan ti bu oy li jpatpʼine,+ vaʼun manbo jpʼejuk slumal pʼin. Tako ta ikʼel jayvoʼuk bankilaletik ta jteklum xchiʼuk jayvoʼuk bankilal paleetik, 2 vaʼun batan li ta stenlejaltik Inone,+ ta stiʼ li Ochebal yuʼun Jpatpʼinetik sbie. Te xaval skotol li kʼusi chkalbote. 3 Xi chavale: ‹Ajvaliletik ta Juda xchiʼuk jnaklejetik ta Jerusalen, chikintaik li kʼusi chal Jeovae. Xi chal li Jeova ti jaʼ bankilal yuʼun soltaroetike,* li Dios yuʼun Israele:
»›«Jutuk xa skʼan xkakʼ talel vokolil li ta jteklume xchiʼuk buchʼuuk noʼox ti chkʼot ta xchikin taje solel chʼayal to chkʼot yoʼontonik. 4 Jaʼ ta skoj ti laj yiktaikune,+ ti mu xa stakʼ ojtikinel kom yuʼunik liʼe+ xchiʼuk ti liʼ yakal chakʼbeik milbil matanal yan diosetik ti mu xojtikinike, ti mu jaʼuk xojtikinik li smoltotakike xchiʼuk li ajvaliletik ta Judae, jech xtok, liʼ smalojbeik xchʼichʼel li buchʼutik muʼyuk smulike.+ 5 La svaʼanik tayal kʼopojebaletik* sventa Baal yoʼ te xchikʼ xnichʼnabik kʼuchaʼal skotlej chikʼbil matanal sventa Baal,+ taje muʼyuk jech kaloj mantal ti jech akʼo spasike xchiʼuk muʼyuk jech lokʼem ta koʼonton»›.*+
6 »‹Xi chal li Jeovae: «Jaʼ yuʼun, chkʼot skʼakʼalil ti maʼuk xa Tofet chichʼ albel skʼoplal liʼe o ti stenlejaltik Inone, yuʼun jaʼ xa stenlejaltik sventa Milbail chichʼ albel skʼoplal.+ 7 Voʼon ta jsokesbe li kʼusi snopoj liʼ tspas li Juda xchiʼuk Jerusalene, chkakʼ ti xlajik ta espada ta yeloval li yajkontraike xchiʼuk ti x-ochik ta skʼob li buchʼutik tskʼan chmilatike. Jech xtok, li sbekʼtalike chkakʼ ta sveʼel mutetik xchiʼuk ta sveʼel chonbolometik ta balumil.+ 8 Chkakʼ ti xibaluk sba xkom li jteklum liʼe xchiʼuk ti xichʼ labanele.* Skotol li buchʼutik te ch-echʼike chchʼay xchʼulelik ta xiʼel kʼalal chilike xchiʼuk tslabanik ta skoj li svokoltake.+ 9 Chkakʼ ti stiʼik li skerem stsebike xchiʼuk ti stiʼ xchiʼiltakik ta jujuntale, ta skoj ti chichʼik joyobtaele xchiʼuk ti mu xa snaʼ kʼusi tspasik kʼalal mi laj yichʼik setuel yuʼun li yajkontraike xchiʼuk li buchʼutik tskʼan chmilatike»›.+
10 »Vaʼun, vokʼo li lumal pʼin ta yeloval sat li viniketik ti te xchiʼukot batele 11 xchiʼuk xi xavalbe yaʼiike: ‹Xi chal li Jeovae: «Jech kʼuchaʼal mi oy buchʼu la slilin ta vokʼel jpʼejuk lumal pʼin ti mu xa stakʼ meltsanele, jaʼ jech ta jlilin li jteklum xchiʼuk li lum liʼe; te ta smukik li animaetik ta Tofete, jaʼ to mi muʼyuk xa bu xokol kom jutebuke»›.+
12 »Xi chal li Jeovae: ‹Taje jaʼ jech ta jpasbe li jteklume xchiʼuk li jnaklejetik yuʼun sventa jechuk xkom kʼuchaʼal li Tofete. 13 Li naetik ta Jerusalene xchiʼuk li snaik ajvaliletik ta Judae ibal sba* chkom jech kʼuchaʼal li Tofete,+ yuʼun jaʼ te laj yakʼik ta jol naetik li milbil matanal sventa skotol li soltaroetik ta vinajele+ xchiʼuk te la smalbeik matanal vino li yan diosetike›».+
14 Kʼalal lokʼ talel ta Tofet li Jeremias ti bu takat batel yuʼun Jeova sventa xal li kʼusi chkʼot ta pasele, te vaʼi ta yamakʼil* sna Jeova xchiʼuk xi laj yalbe sjunul li jteklume: 15 «Xi chal li Jeova ti jaʼ bankilal yuʼun soltaroetike, li Dios yuʼun Israele: ‹Kʼelavil, li ta lum liʼe xchiʼuk ta skotol li jteklumetik yuʼune chkakʼ talel skotol li vokolil ti kaloj xa onoʼox chkakʼbee, yuʼun ta skoj ti pimik ta mantale,* muʼyuk la xchʼunik li kʼusi chkale›».+