Jeremias
18 Liʼe jaʼ li kʼusi albat yuʼun Jeova li Jeremiase: 2 «Totsan xchiʼuk yalan batel ta sna li jpatpʼine,+ vaʼun te ta jkʼoponot».
3 Jaʼ yuʼun, liyal batel ta sna li jpatpʼine, te yakal tspat pʼin li ta spatobil ti xjoyoyete.* 4 Pe li pʼin ti yakal ta spat ta achʼele te sok ta skʼob. Jaʼ yuʼun, li jpatpʼine la xchaʼmeltsan ta yan pʼin, jaʼ ti kʼu yelan lek laj yil stuke.
5 Vaʼun, la skʼoponun tal li Jeovae, xi laj yalbune: 6 «Xi chal li Jeovae: ‹Jteklum Israel, ¿mi mu xuʼuk jech jpas ta atojolalik jech kʼuchaʼal la spas li jpatpʼine? ¡Kʼelavil, jteklum Israel!, li voʼoxuke jechoxuk ta jkʼob jech kʼuchaʼal li achʼel ti oy ta skʼob li jpatpʼine.+ 7 Mi laj kalbe skʼoplal ti chichʼ bulel lokʼel, chichʼ jinesel xchiʼuk chichʼ lajesel junuk mukʼta jteklum o junuk ajvalilale,*+ 8 pe mi laj yiktaik spasel li kʼusi chopol ti jaʼ ox ta stoj-o smulik li jteklum taje, ta jel* ti jnopoj ox chkakʼbe svokolike.+ 9 Pe mi laj kalbe skʼoplal ti ta jvaʼan xchiʼuk ta jnakan junuk mukʼta jteklum o junuk ajvalilale, 10 mi lik spas li kʼusi chopol chkile xchiʼuk mi muʼyuk chchʼun li kʼusi chkale, ta jel li kʼusi lek ox jnopoj ta jpas ta stojolalike›.*
11 »Avi une, avokoluk, xi xavalbe li viniketik ta Judae xchiʼuk li jnaklejetik ta Jerusalene: ‹Xi chal li Jeovae: «Yakalun ta xchapanel* jtos vokolil xchiʼuk oy kʼusi chopol jnopoj ta jpas ta atojolalik. Avokolikuk, sutanik tal, iktaik li achopol beike, tukʼibtaso li abeike xchiʼuk li kʼusitik chapasike»›».+
12 Pe xi laj yalike: «¡Mu xa kʼusi stakʼ pasel!+ Yuʼun jaʼ ta jpaskutik li kʼusi jnopojkutike xchiʼuk jaʼ ta jpaskutik ta jujuntal ti kʼusi chopol tskʼan li koʼontonkutik ti jtoybae».+
13 Jaʼ yuʼun, xi chal li Jeovae:
«Avokolikuk, jakʼbo atukik li mukʼta lumetike.
¿Buchʼu van yaʼioj ti oy jech kʼotem ta pasel taje?
Li stojol tseb Israele oy kʼusi toj echʼ xa noʼox chopol spasoj.+
14 ¿Mi ta van x-ul batel ta j-echʼel li taiv ta tayal tontikaltik ta Libanoe?
¿O mi ta van xtakij li sikil voʼ ti nom to tajek chlik tale?
15 Pe li jteklumale laj xa xchʼayun ta sjolik.+
Yuʼun chakʼbeik milbil matanal* li kʼusi muʼyuk sbalile+
xchiʼuk tskʼejpʼunik* lokʼel li viniketik ta sbeike, li ta voʼneal bee,+
sventa jaʼ stamik batel li bikʼtal beetik ti muʼyuk pasbil ta parejoe xchiʼuk ti muʼyuk polbil leke,*
16 ta skoj taje, xibal sba chkom yuʼunik li yosilalike+
Skotol li buchʼutik te ch-echʼike chchʼay xchʼulelik ta xiʼel kʼalal chilike xchiʼuk sjim xa sjolik.+
17 Jech kʼuchaʼal tspuk batel pukuk* li ikʼ chlik tal ta slokʼeb kʼakʼale, jaʼ jech ta jpukik batel ta stojolal li jkontrainvaneje.
Li ta skʼakʼalil svokolike ta jvalopatinik komel, muʼyuk chkakʼ batel jsat ta stojolalik».+
18 Xi laj yalike: «Laʼik, jnoptik kʼusi ta jpasbetik li Jeremiase,+ yuʼun jaʼ chchanubtasutik ta mantal li paleetik kuʼuntike, jaʼ tstojobtasutik li pʼijil viniketike xchiʼuk jaʼ chalbutik skʼop Dios li j-alkʼopetike. Laʼik, jchaptik kʼusi ta jpasbetik xchiʼuk mu jchikintabetik li kʼusi chale».
19 Kajval Jeova, avokoluk, tsʼet chikintao li kʼusi chkale
xchiʼuk chikintao li kʼusi yakal chalik li kajkontratake.
20 ¿Mi ta chopol chichʼ pakel sutel li kʼusi lek chichʼ pasele?
Yuʼun sjokʼojik xa jchʼenal.+
Vuleso ta ajol ti ay jvaʼan jba ta aveloval sventa lek kʼusi xkal ta stojolalike,
sventa xlaj skʼakʼal avoʼonton ta stojolalik.
21 Jaʼ yuʼun, akʼo chamuk ta tsatsal viʼnal li xnichʼnabike
xchiʼuk akʼo lajikuk ta espada.+
Akʼo chamuk yalab li yajnilike xchiʼuk akʼo komuk ta meʼonal antsetik.+
Li viniketik yuʼunike akʼo chamikuk ta tsatsal chamel,
li skeremtakike akʼo lajikuk ta espada li ta paskʼope.+
22 Akʼo vinajuk batel ti te x-avet ta snaik
kʼalal mi la atak talel ta anil jtsop j-elekʼetik ta stojolalike.
Yuʼun sjokʼojik xa jun chʼen sventa staikun ta tsakel
xchiʼuk xlichʼanojik petsʼetik sventa syakikun.+
23 Yan li voʼote, Kajval Jeova,
xavojtikin lek li kʼusitik snopoj tspasik sventa tsmilikune.+
Mu xamukbe li smulike
xchiʼuk mu xatupʼbe li spaltailike.*