Deuteronomio

6 »Liʼe jaʼ li mantaletik xchiʼuk li kʼusitik chapanbil ti yaloj Jeova Dios avuʼunik ti skʼan xachanik sventa xachʼunik kʼalal mi och avuʼuninik li osile, 2 sventa xaxiʼta* li Jeova Dios avuʼune xchiʼuk sventa xavakʼ ta avoʼonton skotol li tojobtaseletik xchiʼuk li smantaltak ti kʼu sjalil kuxulot ti yakal chkalbote —voʼot, anichʼnab xchiʼuk amamobtak—+ sventa jal xakuxi li ta balumile.+ 3 Israel, skʼan xachikinta xtok xchiʼuk kʼelo lek ti xavakʼ ta akuxlejale sventa junuk avoʼonton xa-echʼ xchiʼuk xa-epajik tajek li ta balumil ti bu oy lek leche xchiʼuk pome jech kʼuchaʼal yalojbot ta jamal li Jeova ti jaʼ Sdios amoltotake.

4 »Aʼio avaʼi, Israel, li Jeova Dios kuʼuntike jaʼ noʼox stuk Jeova.+ 5 Skʼan xakʼan ta sjunul avoʼonton li Jeova Dios avuʼune, ta sjunul akuxlejal*+ xchiʼuk ta sjunul avipal.*+ 6 Skʼan me te oyuk ta avoʼonton li kʼusi yakal chkalbot avie, 7 skʼan xavakʼbe xchan* li anichʼnabe,+ loʼiltabo kʼalal chachoti ta anae, kʼalal chaxanav ta bee, kʼalal chavaye xchiʼuk kʼalal chalike.+ 8 Chuko ta akʼob sventa snaʼobil avuʼun, kʼotuk kʼuchaʼal xpix atiba.*+ 9 Tsʼibao ta smarkoal stiʼ ana ta xokontak xchiʼuk tsʼibao ta stiʼ ateklumal.

10 »Mi laj xa ox yakʼ ochan Jeova Dios avuʼun li ta osil ti yaloj chakʼbot+ ti jech jamal laj yalbe li amoltotak ti jaʼ li Abraan, Isaak xchiʼuk Jakobe —jaʼ li mukʼtik jteklumetik xchiʼuk ti lekik ti mu voʼotuk la avaʼane,+ 11 naetik ti noj ta kʼusitik lekik ti mu voʼotuk la asaʼ ta abtele, posoetik ti mu voʼotuk la ajokʼe, tsʼunbil uva xchiʼuk tsʼunbil oliva ti mu voʼotuk la atsʼune— xchiʼuk mi laj xa ox veʼan, mi noj xa ox lek achʼute,+ 12 kʼelo me aba ti mu xchʼay ta ajol li Jeova+ ti jaʼ la slokʼesot talel ta yosilal Ejipto ti bu toʼox mosoinbilote. 13 Jaʼ noʼox skʼan xaxiʼta li Jeova Dios avuʼune,+ jaʼ noʼox skʼan xatun ta stojolal+ xchiʼuk jaʼ noʼox ta sbi xavakʼ ave.+ 14 Mu me xatsʼakliik yan diosetik mi jaʼuk sdios li jteklumetik ti liʼ joyol ta apat axokonike,+ 15 yuʼun li Jeova Dios avuʼun ti te oy ta atojolale jaʼ jun Dios ti stuk noʼox tskʼan ichʼel ta mukʼe.+ Mi chatsʼakli yan diosetike, tstsan skʼakʼal yoʼonton ta atojolal li Jeova Dios avuʼune+ xchiʼuk chchʼaybot akʼoplal ta sba balumil.+

16 »Mu stakʼ xavakʼik ta preva li Jeova Dios avuʼunik+ jech kʼuchaʼal laj avakʼik ta preva li ta Masae.+ 17 Skʼan ta sjunul avoʼonton xavakʼ ta akuxlejalik li smantaltak Jeova Dios avuʼunike xchiʼuk li snaʼobil yuʼun ti jech laj yalboxuk ti skʼan xapasike. 18 Skʼan xapas li kʼusi tukʼ xchiʼuk li kʼusi lek ta sat Jeovae sventa xuʼ junuk noʼox avoʼonton xchiʼuk xavuʼunin li lekil osil ti jech laj yakʼ ye Jeova ta stojolal amoltotake.+ 19 Chanuts lokʼel avajkontratak jech kʼuchaʼal yaloj ta jamal li Jeovae.+

20 »Kʼalal xi tsjakʼbot ta mas jelavel li anichʼone: ‹¿Kʼusi smelolal li snaʼobile, li mantaletik xchiʼuk li kʼusitik chapanbil ti yalojboxuk li Jeova Dios kuʼuntike?›, 21 xi xavalbe li anichʼone: ‹Likʼotkutik toʼox ta smoso faraon li ta Ejiptoe, pe li Jeovae la slokʼesunkutik ta Ejipto ta yipal skʼob. 22 Te jkʼeloj ta jsatkutik laj yakʼ ta ilel senyailtak xchiʼuk skʼelobiltak juʼelal ta Ejipto+ li Jeovae, mukʼtik tajek xchiʼuk tsots laj yakʼ vokolil, jaʼ kʼot ta stojolal faraon xchiʼuk skotol li buchʼutik te oy ta snae.+ 23 Laj yikʼunkutik lokʼel sventa xikʼunkutik tal liʼ ta balumil ti jech laj yakʼ ye ta stojolal li jmoltotkutike.+ 24 Vaʼun, li Jeovae laj yalbunkutik ti skʼan jchʼunkutik li mantaletike xchiʼuk skʼan jxiʼtakutik li Jeova Dios kuʼuntike sventa lek xibatkutik sbatel osil+ xchiʼuk sventa jechuk kuxulutik-o+ jech kʼuchaʼal kuxulutik avie. 25 Tukʼ kʼusi chkʼot ta jtojolaltik mi ta xkakʼ lek ta jkuxlejaltik skotol li mantal+ yaloj Jeova Dios kuʼuntik ti skʼan jchʼuntike›.