Deuteronomio
11 »Skʼan xakʼan li Jeova Dios avuʼune,+ jechuk-o xapas li kʼusi yakʼoj abain spasele, li kʼusitik yaloje, li kʼusitik chapanbil yuʼune xchiʼuk chʼunbo li smantaltake. 2 Li avie, voʼoxuk yakal ta jkʼoponoxuk, maʼuk li anichʼnabik ti muʼyuk to yojtikinojik xchiʼuk ti muʼyuk to yilojik kʼu yelan chtukʼibtasvan li Jeova Dios avuʼunike,+ ti muʼyuk to yilojik li smukʼulale,+ li yipal skʼobe+ xchiʼuk li sjuʼele. 3 Muʼyuk laj yilik li senyailtak la spas xchiʼuk li kʼusitik labalik sba la spasbe li ajvalil faraon ta Ejipto xchiʼuk ta stojolal li slumale.+ 4 Muʼyuk laj yilik li kʼusi la spasbe li soltaroetik ta Ejiptoe, li skaʼtak faraone xchiʼuk li skaretatak sventa paskʼope, ti te mutʼijik* ta voʼ li ta Tsajal nab kʼalal jaʼo la snutsoxuke xchiʼuk ti jpʼel-o skʼoplal lajesatik yuʼun li Jeovae.+ 5 Muʼyuk xilik li kʼusi lek la spas ta atojolalik li ta takixokol balumil kʼalal to ti kʼuxi lavulik liʼe. 6 Jech xtok, muʼyuk xilik kʼusi la spasbe li Datan xchiʼuk Abiram ti jaʼik xnichʼnab Eliab xnichʼon Rubene, ti kʼalal jav li balumile, bikʼatik yalel xchiʼuk snaik xchiʼuk skarpanaik xchiʼuk skotol li kʼusitik kuxajtik ti tsʼakliatike, jech kʼot ta pasel ta sat skotol li Israele.+ 7 Lek laj avil ta asat atukik li kʼusitik mukʼtik ti labalik sba la spas Jeovae.
8 »Skʼan xavakʼ ta akuxlejalik skotol li mantaletik ti yakal chkalboxuk avie sventa xuʼ xatsatsubik xchiʼuk xbat avuʼuninik li balumile, 9 sventa jal xakuxiik+ li ta balumil ti laj yal ta jamal Jeova chakʼbe li amoltotakik xchiʼuk li snitilulalike,+ ti jaʼ jun balumil ti bu oy lek leche xchiʼuk pome.+
10 »Li balumil ti bu chabat sventa xavuʼunine mu xkoʼolaj kʼuchaʼal li yosilal Ejipto ti bu lalokʼik tale, yuʼun li ta Ejiptoe chatsʼun li sbekʼ atsʼunobe, chavatʼes* ta avakan* jech kʼuchaʼal chavatʼes tsʼunobaltike. 11 Yan li balumil ti poʼot xa x-och avuʼuninike, oy lek vitstikaltik xchiʼuk stenlejaltik.+ Chuchʼ yalel li voʼ chyal ta vinajele;+ 12 jaʼ jun balumil ti xchabioj stuk li Jeova Dios avuʼune. Sjunul jabil te yakʼoj-o sat li Jeova Dios avuʼune.
13 »Mi ta sjunul avoʼonton chachʼunik li mantaletik yakal chkalboxuk avie, mi chakʼanik li Jeova Dios avuʼunike xchiʼuk mi ta sjunul avoʼonton xchiʼuk ta sjunul akuxlejal chatunik ta stojolale,+ 14 ta yorail noʼox chkakʼ taluk voʼ xtok li ta avosilike. Voʼ ta yorail otonyo* xchiʼuk voʼ ta yorail primavera,* chatsobbe sat li kʼusitik chatsʼune, li avinoe xchiʼuk li a-aseitee.+ 15 Jech xtok, chkakʼ chʼiuk yaxal* sventa slajes achonbolomtak li ta avosiltake, lek chaveʼ xchiʼuk lek chnoj achʼut.+ 16 Kʼelo abaik sventa mu xlaj ta loʼlael li avoʼontonike. Mu xakʼejpʼujik* batel sventa mu xavichʼik ta mukʼ yan diosetik xchiʼuk ti xakejan abaik ta stojolalike.+ 17 Mi lakʼejpʼujik* batele, ta me stsan ta atojolalik li skʼakʼal yoʼonton Jeovae, ta smak vinajel sventa mu xakʼ voʼ,+ muʼyuk chakʼ sat li kʼusitik chatsʼunik ta osile, li voʼoxuk une anil chachamik li ta lekil balumil chakʼboxuk li Jeovae.+
18 »Skʼan xatsʼiba ta avoʼontonik xchiʼuk ta anopbenik li kʼusitik chkale, chuko ta akʼobik sventa xkʼot ta snaʼobil avuʼunik. Kʼotuk avuʼunik kʼuchaʼal xpix atibaik.*+ 19 Skʼan xavakʼbeik xchan li anichʼnabike, loʼiltabo kʼalal chachoti ta anaike, kʼalal chaxanavik ta bee, kʼalal chavayike xchiʼuk kʼalal chalikike.+ 20 Tsʼibao ta smarkoal stiʼ ana ta xokontak xchiʼuk tsʼibao ta stiʼ ateklumal 21 sventa jal xakuxi+ xchiʼuk anichʼnabtak li ta balumil ti laj yal ta jamal Jeova chakʼbe li amoltotakike.+ Jech sjalil chakuxi ti kʼu sjalil oy ta sba balumil li vinajele.
22 »Mi jpʼel chachʼunik li mantal yakal chkakʼboxuke xchiʼuk mi chavakʼ ta akuxlejalike, jaʼ xkaltik, ti chakʼanik li Jeova Dios avuʼunike,+ ti chaxanavik ta skotol li beetik yuʼune xchiʼuk ti chanapʼan abaik ta stojolale,+ 23 li Jeovae tsnuts lokʼel ta atojolalik skotol li jteklumetik liʼe+ xchiʼuk chapojbeik kʼusitik oy yuʼunik li jteklumetik ti mas mukʼtik xchiʼuk ti mas epike.+ 24 Buyuk noʼox ti chatekʼan avakanike jaʼ avuʼunik chkʼot li osile.+ Chlik ta takixokol balumil kʼalal to ta Libano. Chlik ta Ukʼum, jaʼ li ukʼum Eufratese, kʼalal to ta nab ta stukʼil smaleb kʼakʼal,* jaʼ to te chpaj li atsʼakike.+ 25 Muʼyuk buchʼu chtal stsakoxuk ta kʼop.+ Jech kʼuchaʼal onoʼox yalojboxuk li Jeova Dios avuʼunike, jaʼ chakʼ akʼo xiʼuk ta atojolalik li krixchanoetik ti bu chaxanavike.+
26 »Aʼio avaʼiik, oy chaʼtos kʼusi chkakʼ atʼujik: jaʼ li bendisione o li chopol kʼoptaele.+ 27 Li bendisione chataik mi chachʼunik li smantaltak Jeova Dios avuʼunik ti yakal chkalboxuk avie,+ 28 li chopol kʼoptaele chataik mi muʼyuk chachʼunik li smantaltak Jeova Dios avuʼunike+ xchiʼuk mi chakʼejpʼujik* li ta be ti yakal chkalboxuk ti skʼan xatamik batele xchiʼuk mi chatsʼakliik yan diosetik ti mu xavojtikinike.
29 »Mi laj xa ox yakʼ ochan Jeova Dios avuʼun li ta osil ti chavuʼunine, skʼan te xavakʼbe bendision ta vits Guerisim li jteklume, li chopol kʼoptaele skʼan te xaval li ta vits Ebale.+ 30 ¿Mi mu teuk oy li vitsetik li ta jot xokon Jordan ta stukʼil smaleb kʼakʼal li ta yosil jkanaanetik ti te nakalik ta Araba ta yeloval Guilgal ta stsʼel li mukʼtik teʼetik ta Moree?+ 31 Yuʼun chajelavik batel li ta jot Jordan sventa x-och avuʼuninik li osil chakʼboxuk li Jeova Dios avuʼunike.+ Kʼalal mi och ta akʼobike xchiʼuk mi te xa ox nakaloxuke, 32 skʼan xakʼelik lek ti xavakʼ ta akuxlejalik skotol li mantaletik xchiʼuk li kʼusitik chapanbil ti yakal chkakʼ anaʼik avie.+