Deuteronomio

12 »Liʼe jaʼ li mantaletik xchiʼuk kʼusitik chapanbil ti skʼan xakʼelik lek ti xavakʼ ta akuxlejalik ti jayib kʼakʼal kuxuloxuk li ta balumil ti chakʼ avuʼuninik li Jeova ti jaʼ Sdios amoltotakike. 2 Skʼan xajinesik skotol li butik chichʼik ta mukʼ sdiosik li lumetik ti chapojbeik li kʼusitik oy yuʼunike,+ mi ta mukʼta vitsetik, mi ta bikʼtal vitsetik o ta yolon teʼetik ti lek pimik yanale. 3 Skʼan me xajinesbeik li skajleb matanaletik yuʼunike, skʼan xalilinik li vaʼanbil chʼul ton yuʼunike,+ skʼan xachikʼik ta kʼokʼ li chʼul posteetik* yuʼunike xchiʼuk skʼan xakʼasik li slokʼol sdios spasojike,+ jech chʼaybeik-o skʼoplal sbiik ti bu toʼox oyike.+

4 »Mu jechuk skʼan xavichʼik ta mukʼ li Jeova Dios avuʼunik kʼuchaʼal taje.+ 5 Jaʼ lek te xbat asaʼik ti bu tstʼuj sventa xichʼ muyubtabel sbi li Jeova Dios avuʼune+ xchiʼuk te xbat asaʼik ti bu tskʼan chnaki ta stojolal li anitilulalike. 6 Te to skʼan xavichʼik batel li chikʼbil matanal chavakʼike,+ li milbil matanaletike, li adiesmoike,*+ li kʼusitik chavichʼik tale,+ li matanaletik kʼalal chavakʼ aveike, li chikʼbil matanal chlokʼ ta avoʼontonike+ xchiʼuk kʼalal chavakʼik li sba yol avakaxik o achijike.+ 7 Te skʼan xaveʼ xchiʼuk avutsʼ avalalik ta yeloval Jeova Dios avuʼunik+ xchiʼuk skʼan xamuyubajik ta skotol li kʼusitik chapasike,+ yuʼun laj yakʼbot bendision li Jeova Dios avuʼune.

8 »Mu jechuk xapasik kʼuchaʼal ta jpastik avi ti kolemutik ta spasel ti kʼusi lek chil jsatike,* 9 yuʼun muʼyuk to ochemoxuk ti bu xuʼ chakux avoʼontonike+ xchiʼuk ti bu chakʼ arextoik* li Jeova Dios avuʼunike. 10 Kʼalal mi la atuchʼik jelavel li Jordane+ xchiʼuk mi te xa ox nakaloxuk li ta balumil ti chakʼboxuk li Jeova Dios avuʼunike, chakʼ akuxik, yuʼun muʼyuk chtal stsaloxuk li avajkontraik oy ta ajoylejalike xchiʼuk jun noʼox avoʼonton chanakiik.+ 11 Ti bu tstʼuj sventa xichʼ muyubtabel sbi li Jeova Dios avuʼunike+ te chavichʼik batel skotol li kʼusitik yakal chkalboxuk avie, li chikʼbil matanal chavakʼike, li milbil matanaletike, li adiesmoike,+ li kʼusitik chavichʼik tale xchiʼuk li matanaletik kʼalal chavakʼ aveik ta stojolal li Jeovae. 12 Chamuyubajik li ta yeloval Jeova Dios avuʼunike,+ chmuyubaj li akeremike, li atsebike, li amosoike, li akiaraike xchiʼuk li jlevi krixchano ti te nakal ta ateklumale, yuʼun li jlevie muʼyuk kʼusi chichʼ xchiʼuk muʼyuk xrexto* jech kʼuchaʼal voʼoxuke.+ 13 Kʼelo me aba sventa mu buyuk noʼox xavichʼ batel li chikʼbil matanal avuʼune.+ 14 Li chikʼbil matanal avuʼune jaʼ noʼox skʼan te xavichʼ batel ti bu stʼujoj Jeova li ta yosil anitilulalike xchiʼuk te skʼan xapas skotol li kʼusi yakal chkalbote.+

15 »Xuʼ xamil jkotuk chonbolom atiʼ ti kʼusi ora xal avoʼontone,+ jaʼ ti kʼu yepal bendision yakʼojbot li Jeova Dios avuʼun ta jujun ateklumale. Xuʼ stiʼ ek li buchʼutik ibal sbaike* xchiʼuk li buchʼutik lekike. Xuʼ xatiʼ jech kʼuchaʼal chatiʼ jkotuk gasela o jkotuk teʼtikalchije. 16 Pe mu me xatibeik li xchʼichʼele,+ skʼan xamal batel ta balumil jech kʼuchaʼal chamal voʼe.+ 17 Mu stakʼ xalajes ta yut ateklumal li jun ta lajlajuneb kʼusitik chlokʼ ta avosile, li achʼ vinoe, li aseitee, li sba yol avakax xchiʼuk achije+ xchiʼuk mu stakʼ xalajes li matanaletik kʼalal chavakʼ aveike, li chikʼbil matanaletik chavakʼe xchiʼuk li kʼusitik chavichʼ tale. 18 Skʼan te xalajes ta yeloval Jeova Dios avuʼun ti bu stʼujoj li Jeova Dios avuʼune,+ te xalajes xchiʼuk li akereme, li atsebe, li amosoe, li akiarae xchiʼuk li jlevi krixchano ti te nakal ta ateklumale, jech chamuyubaj ta yeloval Jeova Dios avuʼun ta skotol li kʼusitik chapase. 19 Ichʼo me apʼijil sventa mu xchʼay ta ajol li jlevi vinik+ ti kʼu sjalil kuxulot ta avosile.

20 »Mi laj xa ox yepajes avosil li Jeova Dios avuʼun+ jech kʼuchaʼal yalojbot ta jamale+ xchiʼuk ti xi chavale: ‹Ta jkʼan ta jtiʼ bekʼet› ta skoj ti chakʼan chatiʼ bekʼete, xuʼ xatiʼ ti kʼusi ora tskʼan avoʼontone.+ 21 Mi toj nom to ti bu tstʼuj sventa xichʼ muyubtabel sbi li Jeova Dios avuʼun+ jech kʼuchaʼal laj kalbot mantale, xuʼ xamil jkotuk avakax o jkotuk achij ti yakʼojbot Jeovae. Skʼan te xatiʼ ta yut ateklumal ti kʼusi ora xal avoʼontone. 22 Xuʼ xatiʼ jech kʼuchaʼal chatiʼ jkotuk gasela o jkotuk teʼtikalchije,+ xuʼ stiʼik ek li buchʼutik ibal sbaike xchiʼuk li buchʼutik lekike. 23 Jaʼ noʼox jpʼel skʼoplal jech chkom-o ti mu xuʼ xatiʼ li chʼichʼe,+ yuʼun jaʼ kuxlejal li chʼichʼe,+ jech oxal mu stakʼ xatiʼ li kuxlejal* xchiʼuk sbekʼtale. 24 Mu me xatiʼ li chʼichʼe, skʼan xamal batel ta balumil jech kʼuchaʼal chamal voʼe.+ 25 Mu stakʼ xatiʼ sventa lek xabat xchiʼuk sventa lek xbat li avalab anichʼnab chtal avuʼun ta tsʼakale, yuʼun yakal chapas li kʼusi tukʼ chil ta sat Jeovae. 26 Jaʼ noʼox skʼan xavichʼ batel li kʼusitik chʼul ti jaʼ avuʼune xchiʼuk li matanaletik kʼalal chavakʼ avee, ichʼo batel kʼalal chabat ti bu stʼujoj li Jeovae. 27 Te chavakʼ li chikʼbil matanal avuʼune, li sbekʼtale xchiʼuk li xchʼichʼele,+ te chavakʼ ta skajleb smoton Jeova Dios avuʼun. Jech xtok, li xchʼichʼel milbil matanal chavakʼe skʼan te xichʼ malel ta snakleb skajleb smoton+ li Jeova Dios avuʼune, yan li sbekʼtale xuʼ xatibe.

28 »Skʼan xakʼel lek ti xachʼun skotol li kʼusitik yakal chkalbote sventa jechuk-o lek xbat akuxlejal xchiʼuk lek xbat xkuxlejal li anichʼnabtak chtal avuʼun ta tsʼakale, yuʼun yakal chapas li kʼusi lek xchiʼuk li kʼusi tukʼ ta sat li Jeova Dios avuʼune.

29 »Mi laj xa ox slajes Jeova Dios avuʼun li lumetik sventa chapojbe li kʼusitik oy yuʼune+ xchiʼuk mi te xa ox nakalot ta yosile, 30 pʼijan me yoʼ mu yakbiluk xakom ta petsʼ kʼalal yichʼojik xa ox lajesel ta asat li lumetike. Mu xiuk xajakʼ ta sventa li sdiosike: ‹¿Kʼu toʼox yelan nopem xaʼi chtunik ta stojolal sdiosik li jteklumetike? Yuʼun jech ta jkʼan ta jpas ek›.+ 31 Mu jechuk xapasbe li Jeova Dios avuʼune, yuʼun spʼajoj tajek Jeova skotol li kʼusitik tspasik sventa li sdiosike, yuʼun chchikʼik ta kʼokʼ xtok li skerem stsebik sventa li sdiosike.+ 32 Skotol li kʼusi yakal chkalboxuk avie jaʼ li kʼusi skʼan xakʼelik lek sventa xavakʼ ta akuxlejalike.+ Mu me xavakʼbeik xchiʼil xchiʼuk mu me xachʼayik jutebuk.+