Jeremias
40 Li Jeremiase kʼoponat tal yuʼun Jeova kʼalal lokʼesat te ta jteklum Rama+ yuʼun li Nebusaradan+ ti jaʼ li bankilal yuʼun jchabivanejetike. Yuʼun chukbil toʼox batel ta kadena skʼob kʼalal ikʼat batele, te xchiʼuk batel skotol li buchʼutik chukbilik lokʼel ta Jerusalen xchiʼuk ta Juda ti yakal chichʼik ikʼel batel ta Babiloniae. 2 Vaʼun, li bankilal yuʼun jchabivanejetike yan-o bu laj yikʼ batel li Jeremiase xchiʼuk xi laj yalbee: «Li Jeova ti jaʼ Adiose kak xa onoʼox yaloj ti chvul svokol li jteklum liʼe 3 xchiʼuk kʼot xa ta pasel yuʼun li kʼusi yaloj Jeovae, yuʼun la asaʼ amulik ta stojolal Jeova xchiʼuk muʼyuk la achʼunbeik li kʼusi chale. Jaʼ yuʼun, jech kʼot ta atojolalik.+ 4 Avi une, ta jlokʼes li kadena ti chukul ta akʼobe. Mi lek chavaʼi ti xbat achiʼinun ta Babiloniae, batik, voʼon ta jchabiot. Pe mi mu xakʼan xbat achiʼinun ta Babiloniae, mu xabat. ¡Kʼelavil! Oy ta avok ta akʼob skotol li osil liʼe. Batan ti bu chakʼan chabate».+
5 Kʼalal muʼyuk to snopoj mi tsut batel li Jeremiase, xi laj yal li Nebusaradane: «Sutan batel ta stojolal li Guedalias+ ti jaʼ xnichʼon Aikame+ xchiʼuk ti jaʼ smom Safane,+ ti jaʼ vaʼanbil yuʼun ajvalil ta Babilonia sventa tskʼel li jteklumetik ta Judae. Vaʼun, te xkom achiʼin li ta jteklume o batan ti bu chakʼan chabate».
Laj une, li bankilal yuʼun jchabivanejetike laj yakʼbe juteb sveʼel xchiʼuk jun smoton, vaʼun laj yakʼ batuk. 6 Jaʼ yuʼun, li Jeremiase bat ta stojolal li Guedalias ti jaʼ xnichʼon Aikam ti te oy ta Mispae,+ te kom xchiʼin, jech xtok, te kom xchiʼin li buchʼutik te to komik ta jteklume.
7 Ta mas tsʼakal une, skotol li bankilaletik yuʼun soltaroetik xchiʼuk li sviniktakik ti te oyik ta jamal osiltike laj yaʼiik ti akʼbat yabtel yuʼun ajvalil ta Babilonia li Guedalias ti jaʼ xnichʼon Aikame. Yuʼun vaʼanat sventa tskʼel li jteklume, li viniketike, li antsetike xchiʼuk li ololetik ti povreik te ta jteklum ti muʼyuk laj yichʼik ikʼel batel li ta Babiloniae.+ 8 Jaʼ yuʼun, tal skʼelik li Guedalias ta Mispae.+ Taje jaʼik li Ismael+ ti jaʼ xnichʼon Netaniase, li Joanan+ xchiʼuk Jonatan ti jaʼ xnichʼnab Kareae, li Seraya ti jaʼ xnichʼon Tanumete, li xnichʼnab Efai ti jaʼ jnetofa vinike xchiʼuk li Jesanias+ ti jaʼ xnichʼon jmaakat vinike, talik xchiʼuk li sviniktakike. 9 Li Guedalias ti jaʼ xnichʼon Aikam xchiʼuk ti jaʼ smom Safane oy kʼusi jamal laj yalbe yaʼiik xchiʼuk li sviniktakike, xi laj yalbe yaʼiike: «Mu xaxiʼik ti chatunik ta stojolal li jkaldeaetike. Naklanik li ta jteklume xchiʼuk tunanik ta stojolal li ajvalil ta Babiloniae, vaʼun lek kʼusi chkʼot ta atojolalik.+ 10 Li voʼone liʼ chikom ta Mispa sventa xikʼopoj ta atojolalik* mi tal li jkaldeaetike. Yan li voʼoxuke bat tsobik li vinoe, li sat teʼetike xchiʼuk li aseitee, vaʼun te xatikʼik li ta skʼejobiltake* xchiʼuk te xanakiik li ta jteklumetik ti bu laj xa avuʼuninike».+
11 Jech xtok, skotol li judaetik ti te oyik ta Moab, ta Ammon, ta Edom xchiʼuk li buchʼutik te oyik li ta yantik mukʼta lumetike laj yaʼiik ti oy buchʼutik te laj yikta ta Juda li ajvalil ta Babiloniae xchiʼuk ti la svaʼan sventa xkʼelatik yuʼun li Guedalias ti jaʼ xnichʼon Aikame xchiʼuk ti jaʼ smom Safane. 12 Jech oxal, skotol li judaetike sutik tal ti bu toʼox yichʼojik pukel batele, vaʼun talik ta yosilal Juda, talik ta stojolal Guedalias ti te oy ta Mispae. Laje, lik stsobik epal vino xchiʼuk epal sat teʼetik.
13 Li Joanan ti jaʼ xnichʼon Kareae xchiʼuk skotol li bankilaletik yuʼun soltaroetik ti te oyik li ta jamal osiltike tal skʼelik li Guedalias ta Mispae. 14 Xi laj yalbeike: «¿Mi yuʼun mu xanaʼ ti takbil tal yuʼun Baalis ajvalil ta Ammon+ li Ismael ti jaʼ xnichʼon Netanias sventa xtal smilote?».+ Pe li Guedalias ti jaʼ xnichʼon Aikame muʼyuk la xchʼun.
15 Vaʼun, li Joanan ti jaʼ xnichʼon Kareae xi laj yalbe ta mukul li Guedalias te ta Mispae: «Chibat kaʼi xchiʼuk chbat jmil li Ismael ti jaʼ xnichʼon Netaniase, vaʼun muʼyuk buchʼu tsnaʼ. ¿Kʼu yuʼun ti chtal smilote? ¿Kʼu yuʼun ti tspuk sbaik batel skotol li krixchanoetik ta Juda ti liʼ tsobolik ta atojolale xchiʼuk ti xlaj-o skʼoplal li skomenal* judaetike?». 16 Pe li Guedalias+ ti jaʼ xnichʼon Aikame xi laj yalbe li Joanan ti jaʼ xnichʼon Kareae: «Mu jechuk xapas, yuʼun mu meleluk li kʼusi yakal chaval ta stojolal Ismaele».