Deuteronomio

20 »Kʼalal chbat atsak ta kʼop avajkontratake, mi laj avil ti jaʼ mas ep skaʼik, skaretaik xchiʼuk mas ep li soltaroetik yuʼunike, mu xaxiʼ yuʼun, yuʼun te xchiʼukot li Jeova Dios avuʼun ti jaʼ la slokʼesot ta yosilal Ejiptoe.+ 2 Kʼalal jutuk xa skʼan xalikik ta paskʼope, skʼan xnopaj batel li palee sventa xchiʼin ta loʼil li jteklume.+ 3 Xi skʼan xalanbee: ‹Chikintao avaʼi, Israel: jutuk xa skʼan xatsakik ta kʼop li avajkontraike, jaʼ yuʼun mu me xatsikʼes avoʼontonik, mu xaxiʼik xchiʼuk mu xnik avoʼontonik yuʼun, 4 yuʼun te xchiʼukoxuk ta xanbal li Jeova Dios avuʼunike, jaʼ tstsak ta kʼop avajkontraik sventa spak akʼoplalik xchiʼuk sventa skoltaoxuk›.+

5 »Li j-abteletik eke xi skʼan xalbeik li jteklume: ‹¿Mi oy buchʼu jaʼ to svaʼanoj jpʼejuk sna ti muʼyuk to snaklebinoje? Akʼo sutuk batel li ta snae. Yuʼun mi moʼoje, xuʼ xcham li ta paskʼope, vaʼun yan xa-o buchʼu chtal skʼupinbe li yachʼ nae. 6 ¿Mi oy buchʼu stsʼunoj s-uva ti muʼyuk to stulojbe sate? Akʼo sutuk batel ta sna. Yuʼun mi moʼoje, xuʼ xcham li ta paskʼope, vaʼun yan xa-o buchʼu chtal stulbe sat li s-uvae. 7 ¿Mi oy buchʼu smakoj junuk tseb ti muʼyuk to yikʼoje? Akʼo sutuk batel ta sna. Yuʼun mi moʼoje, xuʼ xcham li ta paskʼope, vaʼun yan xa-o buchʼu chikʼ li tsebe›.+ 8 Li j-abteletike xi skʼan sjakʼbeik xtok li jteklume: ‹¿Buchʼu chiʼ xchiʼuk chnik yoʼonton ta xiʼel?+ Akʼo sutuk batel ta sna sventa mu xchibajesbe yoʼonton li yermanotak eke›.*+ 9 Mi laj xa ox xchiʼinik ta loʼil jteklum li j-abteletike, akʼo svaʼanik bankilal soltaroetik sventa sbeiltasik li jteklume.

10 »Kʼalal mi lanopaj batel ta junuk jteklum sventa xatsak ta kʼope, baʼyel albo mi tskʼan ch-ochik ta akuerdo sventa mu xlik kʼop.+ 11 Mi lek la stakʼbote xchiʼuk mi laj yakʼ ochan ta steklumale, ch-och ta akʼob sventa spasik tsatsal abtel skotol li buchʼutik te nakalike xchiʼuk chtunik ta atojolal.+ 12 Pe mi mu skʼan x-ochik ta akuerdo sventa mu xlik kʼope, ti jaʼ noʼox tskʼan tstsakot ta kʼope, skʼan xajoyobta li jteklume, 13 vaʼun chakʼbot ta akʼob li Jeova Dios avuʼune, skʼan xamil ta espada skotol li viniketik tee. 14 Pe li antsetike, li ololetike, li chonbolometike xchiʼuk skotol li kʼusitik oy ta jteklume, skotol li kʼusitik x-ayan yuʼunike, xuʼ xavichʼ komel,+ xuʼ xatun xalajes li kʼusitik la apojbe avajkontratak ti laj yakʼ ta akʼob li Jeova Dios avuʼune.+

15 »Taje jaʼ jech skʼan xapasbe skotol li jteklumetik ti nom xavil ti maʼuk te oyik li ta yosilal lumetik bu chanakiike. 16 Pe li ta jteklumetik te oy li ta lumetik ti chakʼbot ta arexto* li Jeova Dios avuʼune mu me kuxuluk xavikta junuk krixchano.*+ 17 Li kʼusi skʼan xapase jaʼ ti xalajesbe skʼoplal ta j-echʼele, jaʼ xkaltik, li j-etetike, li j-amorreoetike, li jkanaanetike, li jperisitaetike, li j-eveoetike xchiʼuk li jebusetike+ jech kʼuchaʼal laj yalbot mantal li Jeova Dios avuʼune. 18 Taje jaʼ sventa mu xchanubtasoxuk ta spasel li kʼusitik ibal sba* tspasik sventa sdiosike ti jaʼ xa te chata-o amulik ta stojolal li Jeova Dios avuʼunike.+

19 »Mi la ajoyobta junuk jteklum sventa x˗och ta akʼobe xchiʼuk mi ep xa ox kʼakʼal laj yichʼ avuʼun stsakel ta kʼope, mu me xatsʼet ta ekʼel li teʼetik te chʼiemike. Xuʼ xalobe sat, pe mu xuʼ xatsʼet.+ Yuʼun ¿mi persa skʼan xajoyobta jpets teʼ jech kʼuchaʼal chajoyobta jun vinike? 20 Jaʼ noʼox xuʼ xatsʼet li teʼetik ti anaʼoj lek ti mu stakʼ lobel sate. Xuʼ xatsʼet sventa xajoyobta-o li jteklum ti yakal tstsakot ta kʼope, te xajoyobta-o jaʼ to mi och ta akʼobe.