Jeremias
3 Xi tsjakʼ li krixchanoetike: «Mi oy jun vinik ti tsnuts batel yajnil xchiʼuk ti chmalij ta yan li yajnil kʼalal sutem xa ox yuʼune, ¿mi lek van ti xikʼ yan velta yajnil li vinike?».
¿Mi mu lajuk yichʼ sokesel ta j-echʼel li jteklume?+
«Li voʼote la achon aba ta stojolal li achiʼiltak ti toj epike,+
¿mi chanop ti xuʼ to xasut tal ta jtojolale?», xi li Jeovae.
2 «Toyo batel asat li ta tʼantʼan bikʼtal vitsetike xchiʼuk kʼelo lek avil.
¿Mi oy to van bu jotukal ti muʼyuk yikʼojot batel viniketik sventa xchiʼinot ta vayele?
Te lachoti ta xokon bebetik sventa chamala li amalaltake,
jech kʼuchaʼal jun j-echʼelbe* ta takixokol balumil.
Jech-o yakal chasokes li jteklum
ta skoj ti chachon abae xchiʼuk ta skoj li kʼusitik toj chopol chapase.+
Toj kʼexlal sba li kʼusitik chapase, jechot kʼuchaʼal jun ajnilal ti chchon sbae;
mu xanaʼ xakʼexav.+
4 Pe li avie, xi xavokolet ta jtojolale:
‹¡Kuni Tot, voʼot onoʼox jchiʼilot ta jtsebal!+
5 ¿Mi sbatel-o van osil cha-ilin?
¿Mi te van anakʼoj-o li skʼakʼal avoʼontone?›.
Kʼalal jech chaval taje,
jech-o chapas skotol li kʼusitik chopol ti bu kʼalal xuʼ avuʼune».+
6 Xi laj yalbun Jeova li ta skʼakʼalil ajvalil Josiase:+ «‹¿Mi aviloj kʼusi la spas li jmulavil Israele? Yuʼun ayem xchon sba ta tayal vitsetik xchiʼuk ta yolon mukʼtikil teʼetik.+ 7 Akʼo mi jech la spas skotol li kʼusitik taje, laj kalilanbe-o ti akʼo sutuk tal ta jtojolale,+ pe muʼyuk sut talel. Li Judae jaʼ la skʼel-o li kʼusitik la spas li xvix ti loʼlavane.+ 8 Kʼalal laj kil taje, la jnuts batel li Israel ti muʼyuk tukʼ laj yakʼ sbae, la jpasbe lek svunal sventa jsutes-o+ ta skoj ti la smukul satiune.+ Pe jaʼuk li Juda ti jaʼ mukile muʼyuk xiʼ jutebuk; yuʼun lokʼ batel ek, bat xchon sba.+ 9 Muʼyuk chopol laj yil ti la xchon sbae, jech-o la sokes li jteklume xchiʼuk mukul sativan kʼalal laj yichʼ ta mukʼ li tonetike xchiʼuk li teʼetike.+ 10 Akʼo mi jech, li Juda ti jaʼ li jloʼlavanej mukile muʼyuk ta sjunul yoʼonton sut tal ta jtojolal, jecheʼ noʼox la skuy sba›, xi li Jeovae».
11 Vaʼun, xi laj yalbun li Jeovae: «Li Israel ti muʼyuk tukʼ laj yakʼ sbae vinaj ti mas jutuk smule, ti jaʼ xjelav to smul li jloʼlavanej Judae.+ 12 Batan, xi xbat avalbe li nortee:+
»‹«Jtoyba Israel, sutan tal», xi li Jeovae›.+ ‹«Muʼyuk ta jpʼajot ta skapemal jol,+ yuʼun tukʼ kakʼoj jba», jech laj yal xtok li Jeovae›. ‹«Muʼyuk te jnakʼoj-o sbatel osil li skʼakʼal koʼontone. 13 Jaʼ noʼox tao ta ojtikinel li amule, yuʼun la atoy aba ta stojolal li Jeova ti jaʼ Adiose. Yuʼun jech-o lamulivaj ta yolon mukʼtikil teʼetik xchiʼuk li jyanlumetike,* li voʼoxuke muʼyuk la achʼunik li kʼusi laj kale», xi li Jeovae›».
14 Xi chal li Jeovae: «Sutanik tal, jtoyba nichʼoniletik. Yuʼun voʼon avajvalikun* ta melel; ta xkikʼoxuk lokʼel jun ta jujun lum xchiʼuk chaʼvoʼ ta jujuchop utsʼ alalil, vaʼun chkikʼoxuk tal ta Sion.+ 15 Chkakʼboxuk jchabichijetik ti tspasik li kʼusi tskʼan koʼontone,+ oy lek spʼijilik xchiʼuk yojtikinobil yuʼunik kʼalal chchabioxuke. 16 Li vaʼ kʼakʼale, ta xa-epajik tajek xchiʼuk chapʼolik tajek li ta jteklume», xi li Jeovae.+ «Muʼyuk xa xi chalike: ‹¡Li xkaxail strato Jeovae!›, muʼyuk xa tsnopbeik skʼoplal, muʼyuk xa chvul ta sjolik, mi jaʼuk ta snaʼik xchiʼuk muʼyuk xa ta spasik yan. 17 Li vaʼ kʼakʼale, chalik ti jaʼ xchotleb Jeova sventa ajvalil li Jerusalene+ xchiʼuk skotol li mukʼtik lumetike chichʼik tsobel sventa skʼupil kʼoptabeik sbi Jeova li ta Jerusalene,+ vaʼun muʼyuk xa tstoy sbaik xchiʼuk muʼyuk xa tspasik li kʼusi toj chopol oy ta yoʼontonike».
18 «Li vaʼ kʼakʼale, jmoj chanavik li jteklum Juda xchiʼuk li jteklum Israele,+ jmoj chlikik tal ta yosilal norte sventa xtalik li ta balumil ti laj kakʼbe ta xrextoik* li amoltotakike.+ 19 Xi la jnope: ‹¡Kʼuxi xa noʼox ti te laj kakʼot ti bu oy jnichʼnabe xchiʼuk ti laj kakʼbot li kʼupil sba osile, ti jaʼ jun rextoil* ti mas kʼupil sba ta stojolal li mukʼtik lumetike!›.+ Jech xtok, la jnop ti xi chavalbeikune: ‹¡Kuni Tot!› xchiʼuk kaloj mi chatsʼakliikun-o. 20 ‹Ta melel, jech kʼuchaʼal jun ajnilal ti tsloʼla smalal* xchiʼuk ti chikta komele, jaʼ jech la aloʼlaun ek, jteklum Israel›,+ xi li Jeovae».
21 Li ta tʼantʼan bikʼtal vitsetike oy kʼusi te chichʼ aʼiel,
jaʼ li jteklum Israel ti x-avetik ta okʼel xchiʼuk ti xvokoletike,
yuʼun laj xa sokes li sbeike;
laj xa xchʼay ta sjolik li Jeova ti jaʼ Sdiosike.+
22 «Sutanik tal, jtoyba nichʼoniletik.
Voʼon ta jpoxta li avoʼontonik ti jtoybae».+
«¡Liʼ xa oyunkutike! Litalkutik xa ta atojolal,
yuʼun voʼot Jdiosotkutik, Kajval Jeova.+
23 Ta melel, jecheʼ noʼox la jloʼla jba jtukutik ti te xi-avetkutik ta bikʼtal vitsetike xchiʼuk li ta sba vitsetike.+
Ta melel, jaʼ noʼox xuʼ te sta skolebal Israel ta atojolal, Jeova ti voʼot Jdiosotkutike.+
24 Kʼalal bikʼitunkutik toʼoxe, li kʼusi kʼexlal sbae* jaʼ laj yuʼunin skotol li kʼusitik tsots laj yabtelanik li jmoltotakutike,+
li xchijtakike xchiʼuk li xvakaxtakike,
li skeremtakike xchiʼuk li stsebetakike.
25 Ta kʼexlaluk xbat vaykunkutik
xchiʼuk jaʼ akʼo xpixunkutik li kʼexlaltasele,
yuʼun la jsaʼ jmulkutik ta atojolal, Jeova ti voʼot Jdiosotkutike+
xchiʼuk muʼyuk la jchʼunkutik li kʼusi laj avale, Jeova ti voʼot Jdiosotkutike,
jech-o la jpaskutik talel xchiʼuk jmoltotakutik kʼalal bikʼitunkutik toʼoxe».+