Job
27 Xi to laj yal sloʼil li Jobe:
2 «Jamal chkal ta skoj ti kuxul li Diose, ti spojojbun li jderecho sventa xkichʼ lek chapanele,+
jamal chkal ta skoj ti kuxul li Buchʼu skotol xuʼ yuʼune, ti yakʼojbun jvokole,+
3 yoʼ to chkichʼ ikʼe
xchiʼuk yoʼ to liʼ oy ta jtojolal li yikʼal ye Diose,+
4 muʼyuk chlokʼ ta ke li kʼusitik muʼyuk tukʼe;
¡mi jaʼuk jtiʼoj xa stanal ke chiloʼlavan xchiʼuk li kokʼe!
5 ¡Mi jsetʼuk* jnopoj chkal ti tukʼ akʼoplalike!
¡Muʼyuk ta jkomtsan-o* ti tukʼ koʼontone, jaʼ to mi lichame!+
6 Jpʼel-o koʼonton ti tukʼune xchiʼuk muʼyuk chkikta-o jba ta spasel;+
ti kʼu sjalil kuxulune* muʼyuk jmul chkaʼi jba yuʼun li koʼontone.
7 Jechuk xichʼ kastigo li kajkontra kʼuchaʼal li buchʼu toj chopole
xchiʼuk jechuk xkʼot ta stojolal li buchʼu tsaʼun ta kʼop kʼuchaʼal li buchʼu muʼyuk stukʼile.
8 Yuʼun ¿kʼusi spatobil yoʼonton oy li chopol krixchano* kʼalal chichʼ lajesele+
xchiʼuk kʼalal chmilat yuʼun li Diose?
9 ¿Mi ch-aʼibat yuʼun Dios ti xvokolet
kʼalal chtal ta stojolal li vokolile?+
10 ¿O mi xkuxet van yoʼonton ta stojolal li Buchʼu skotol xuʼ yuʼune?
¿Mi tsta van ta kʼoponel skotol ora li Diose?
11 Voʼon ta jchanubtasoxuk ta sventa li sjuʼel* Diose;
muʼyuk kʼusi ta jmuk ta stojolal li Buchʼu skotol xuʼ yuʼune.
12 ¡Kʼelavilik! Mi jech ti oy kʼusi akʼbil avilike,
¿kʼu yuʼun ti mu kʼusi xtun-o ta j-echʼel li kʼusi chavalike?
13 Liʼe jaʼ li kʼusi ch-akʼbat yuʼun Dios li buchʼu toj chopole,+
jaʼ xrexto* ch-akʼbatik yuʼun li Buchʼu skotol xuʼ yuʼun li j-ilbajinvanejetike.
14 Mi epaj li xnichʼnabe, chlajik ta milel ta espada+
xchiʼuk muʼyuk lek sveʼelik li snitilulaltake.
15 Li buchʼutik kuxul to komem yuʼunike chbatik ta chʼen ta skoj tsatsal chamel
xchiʼuk muʼyuk ch-okʼitaatik yuʼun li yajnilik ti meʼon antsetik xae.
16 Akʼo mi jun to stoklej* stsoboj li splata kʼuchaʼal pukuke*
xchiʼuk akʼo mi ep stsoboj lekil kʼuʼil pokʼil kʼuchaʼal li achʼele,
17 akʼo mi stsob yuʼun,
jaʼ tslap li tukʼil vinike+
xchiʼuk li buchʼu chʼabal smulike ta xchʼakbe sbaik skotol li splatae.
18 Li sna tsvaʼane solel toj kʼun kʼuchaʼal sna bikʼtal chon,
jech kʼuchaʼal yaxib+ spasoj jun jchabivanej.
19 Jkʼulej chbat xpuchʼan sba ta stem,* pe muʼyuk te chkom-o li skʼulejale;*
mi la svikʼ li sate, chʼabal xa kʼusi te oy.
20 Xkoʼolaj kʼuchaʼal jun nojelal ta voʼ tstsalat yuʼun li xiʼele;
chkuchat batel ta akʼobaltik yuʼun li tsatsal ikʼaloʼe.+
21 Chkuchat batel ta ikʼ ti chlik tal ta slokʼeb kʼakʼale, vaʼun chchʼay-o batel skʼoplal;
tsmesat lokʼel ti bu toʼox oye.+