Jeremias
9 ¡Ati xkʼotuk ta yavil voʼ li jole,
ati xkʼotuk ta snioʼal yaʼlel jsat li sbekʼ jsate!+
Vaʼun bi, chi-okʼ ta kʼakʼal akʼobal
ta skoj li buchʼutik laj yichʼik milel ta jteklumale.
2 ¡Ati oyuk xkuxobil koʼonton ta takixokol balumile!
Vaʼun bi, chkikta li jteklumale xchiʼuk ta jchʼak jba lokʼel ta stojolalik,
yuʼun skotolik chmukul sativanik,+
jaʼik jtsop krixchanoetik ti chloʼlavanike.
3 Chapal xa yokʼik ta jut kʼop* jech kʼuchaʼal jun arko ti lek xa chapal ta sjip batel flechae;
noj ta loʼlavanej li jteklume, muʼyuk tukʼilal.+
Xi chal li Jeovae: «Mu noʼox xkechanik ta spasel li kʼusi chopole
xchiʼuk muʼyuk tstsʼet chikintaik li kʼusi chkale».+
4 «Kʼelo me aba akotolik ta stojolal li achiʼiltakike
xchiʼuk mi jaʼuk xapat avoʼontonik ta stojolal li avutsʼ avalalike.
5 Ta jujuntal ta sloʼla xchiʼilik
xchiʼuk mi junuk buchʼu melel xkʼopoj.
Xchanubtasojik ta yalel jutbil kʼop* li yokʼike.+
Solel lubem chkomik ta spasel li kʼusi chopole.
6 Te oyot ta oʼlol ti bu oy loʼlavaneje.
Ta skoj ti chloʼlavanike, mu skʼan xojtikinikun», xi li Jeovae.
7 Jaʼ yuʼun, xi chal li Jeova ti jaʼ bankilal yuʼun soltaroetike:*
«Ta xkunijesik kʼuchaʼal takʼin sventa xlokʼ li xchopolilike,+
yuʼun ¿kʼusi to xuʼ jpas ta stojolal li stseb jteklumale?
8 Li yokʼik ti chloʼlavane xkoʼolaj ta flecha ti chmilvane.
Ta ye li jun krixchanoe chalbe skʼoplal jun oʼontonal li xchiʼile,
pe li ta yoʼontone yakal tsnop kʼusi chopol tspasbe».
9 Xi chal li Jeovae: «¿Mi mu skʼanuk xkakʼbeik kastigo ta skoj taje?
¿Mi mu skʼanuk jpakbe sutel li mukʼta lum taje?+
10 Ta xi-okʼ xchiʼuk chkat koʼonton ta skoj li vitsetike
xchiʼuk ta jkʼejinta son sventa at-oʼonton ta skoj li yaxaltik ta takixokol balumile,
yuʼun laj xa xchikʼik, jaʼ yuʼun mi junuk xa krixchano stakʼ xjelav te
xchiʼuk mu xa xichʼ aʼiel te ti xmujet* li vakaxe.
Jatavik xa batel li mutetike xchiʼuk li chonbolometike; chʼabal xa te oyik.+
11 Tokol slilijemal chkom kuʼun li Jerusalene,+ chkʼot ta sna teʼtikal tsʼiʼetik+
xchiʼuk solel xokol chkom li jteklumetik ta Judae, mi junuk jnaklej chkom.+
12 ¿Buchʼu oy lek spʼijil sventa xaʼibe smelolal taje?
¿Buchʼu van kʼoponat yuʼun Jeova sventa xalbe skʼoplale?
¿Kʼu yuʼun laj li jteklume?
¿Kʼu yuʼun kʼakʼ ti xkoʼolaj xa kʼuchaʼal takixokol balumil
ti muʼyuk xa buchʼu xuʼ xjelav tee?».
13 Xi la stakʼ li Jeovae: «Jaʼ ta skoj ti la spʼajik li jmantal* laj kakʼbeike xchiʼuk jaʼ ta skoj ti muʼyuk la xchʼunike xchiʼuk ti muʼyuk la spasik li kʼusi laj kalbeike. 14 Yuʼun ta skoj ti pimik ta mantale, jaʼ noʼox la spasik li kʼusi tskʼan yoʼonton stukike+ xchiʼuk jaʼ la stsʼakliik batel li slokʼoltak Baale, jech kʼuchaʼal chanubtasatik ta spasel yuʼun li stotike.+ 15 Jaʼ yuʼun, xi chal li Jeova ti jaʼ bankilal yuʼun soltaroetike, li Dios yuʼun Israele: ‹Chkakʼbe slajes chʼail tsʼiʼlel li jteklum liʼe xchiʼuk chkakʼbe yuchʼ voʼ ti oy svenenoale.+ 16 Tanpuk chbatik kuʼun ta mukʼtik lumetik ti mu xojtikinike xchiʼuk ti muʼyuk yojtikinojik li stotike+ xchiʼuk chkakʼik ta milel ta espada jaʼ to mi tupʼ skʼoplalik kuʼune›.+
17 Xi chal li Jeova ti jaʼ bankilal yuʼun soltaroetike:
‹Nopbo skʼoplal li kʼusi chkʼot ta pasele.
Ikʼik tal li antsetik ti tskʼejintaik li son sventa at-oʼontone+
xchiʼuk albeik akʼo talikuk li antsetik ti xtojobik leke,
18 sventa xtalik ta anil xchiʼuk ti xlik skʼejintabutik li son sventa at-oʼontone,
sventa xlokʼ yaʼlel jsatik yuʼunik
xchiʼuk ti xmalmunuk yaʼlel jsatik yuʼunike.+
19 Yuʼun te to ta Sion chichʼ aʼiel ti x-okʼoletik ta at-oʼontone:+
«¡Ti kʼu xa noʼox yelan laj kichʼtik lajesele!
¡Mu xa noʼox albajuk ti kʼexlal chkaʼitike!
Yuʼun laj xa jiptik komel li jteklume xchiʼuk laj xa slilinik li jnatike».+
20 Antsetik, chikintaik li kʼusi chal Jeovae.
Ochuk ta achikinik li kʼusi chlokʼ ta yee.
Chanubtaso atsebetakik sventa x-okʼik ta at-oʼonton
xchiʼuk chanubtaso abaik ta jujuntal ta skʼejintael li son sventa at-oʼontone.+
21 Yuʼun muy xa tal ta jventanatik li lajelale;
och xa tal li ta tsatsal tayal kʼelob osiletik kuʼuntik
sventa xikʼ batel li ololetik ta kayeetike
22 Xi xavale: ‹Xi chal li Jeovae:
«Li sbekʼtal krixchanoetik ti chamemike te telajtik chkom kʼuchaʼal ikʼobal* ti lamal ta sba osiltike,
xkoʼolajik kʼuchaʼal tsʼunobil ti lamal chkom kʼalal ch-echʼ li jtuchʼtsʼunobile,
ti muʼyuk buchʼu ta stsobe»›».+
23 Xi chal li Jeovae:
«Mu me mukʼuk skʼoplal xaʼi sba ta skoj spʼijil li buchʼu pʼije;+
mu me mukʼuk skʼoplal xaʼi sba ta skoj stsatsal li buchʼu oy stsatsale;
xchiʼuk mu me mukʼuk skʼoplal xaʼi sba ta skoj skʼulejal li buchʼu jkʼuleje».+
24 «Pe li buchʼu mukʼ skʼoplal chaʼi sbae jaʼuk ta skoj liʼe:
ti oyuk spʼijile xchiʼuk ti xojtikinun+
ti voʼon Jeovaune, ti voʼon chkakʼ ta ilel tukʼil kʼanelale xchiʼuk ti tukʼ kʼusi ta jpas ta balumile,+
yuʼun jaʼ kʼupil sba chkil li kʼusitik taje», xi li Jeovae.+
25 Xi chal li Jeovae: «¡Kʼelavilik! Chkʼot skʼakʼalil ti chkakʼbe kastigo skotol li buchʼutik ta sbekʼtal noʼox yichʼojik sirkunsisione,*+ 26 li Ejiptoe,+ li Judae,+ li Edome,+ li j-ammonetike,+ li Moab+ xchiʼuk skotol li buchʼutik komkom setoj sjolik ta xokontak xchikinik ti te nakalik ta takixokol balumile;+ yuʼun skotol li mukʼtik lumetike muʼyuk yichʼojik sirkunsision xchiʼuk sjunul li jteklum Israele muʼyuk yichʼoj sirkunsision ta yoʼontonik».+