Baʼyel Kronikas

28 Li Davide la stsob ta Jerusalen skotol li bankilaletik ta Israele: jaʼ li bankilaletik ta jujuchop nitilulale, li bankilaletik ti jaʼ oy ta sbaik li jujuvokʼ+ ti chtunik ta stojolal li ajvalile, li bankilaletik ti sbainojik jmil ta voʼe, li bankilaletik ti sbainojik sien ta voʼe,+ li bankilaletik ti sventainojik li kʼusitik oy yuʼun xchiʼuk xnichʼnab li ajvalile xchiʼuk li xvakaxtak ajvalil+ xchiʼuk xvakaxtak xnichʼnabe.+ La stsob xtok li j-abteletik ta spasob mantale xchiʼuk skotol li viniketik ti lek xuʼ yuʼunik xchiʼuk ti lek xtojobike.+ 2 Vaʼi li ajvalil Davide, xi laj yale:

«Kermanotak xchiʼuk jteklumal, chikintabeikun li kʼusi chkale. Oy tajek ta koʼonton svaʼanel jpʼej na ti bu xuʼ xichʼ akʼel li xkaxail strato Jeovae xchiʼuk ti bu xuʼ skajan yakan li Jdiostike,+ laj xa jchapan li kʼusitik chtune.+ 3 Pe xi laj yalbun stuk li melel Diose: ‹Mu voʼotuk chavaʼan li na sventa jbie,+ yuʼun toj ep apasoj kʼop xchiʼuk toj ep amaloj chʼichʼ›.+ 4 Akʼo mi jech, ta skotol li yutsʼ yalal jtote, voʼon la stʼujun li Jeova ti jaʼ Dios yuʼun Israele yoʼ xikʼot ta ajvalil ta Israel sbatel osil,+ yuʼun jaʼ la stʼuj ta jnitvanej li Judae,+ vaʼun li ta snitilulal Judae jaʼ la stʼujbe li yutsʼ yalal jtote,+ ta skotol li xnichʼnabtak jtot une, voʼon lek laj yilun sventa stikʼun ta ajvalil ta sjunul li Israele.+ 5 Ta skotol li jnichʼnabe —yuʼun li Jeovae yakʼojbun ep jnichʼnab—,+ jaʼ la stʼuj li jnichʼon Salomon+ sventa xchoti li ta chotlebal ti bu tspas mantal Jeovae yoʼ sventain li Israele.+

6 »Xi laj yalbune: ‹Li anichʼon Salomone jaʼ tsvaʼanbun li jnae xchiʼuk jaʼ tspasbun li kamakʼtake,* yuʼun voʼon la jtʼuj sventa xkʼot ta jnichʼon xchiʼuk voʼon chikʼot ta stot.+ 7 Mi jpʼel-o ta yoʼonton chchʼun li jmantaltake xchiʼuk mi jech-o tstsak ta venta li kʼusitik chapanbil kuʼun+ jech kʼuchaʼal yakal tspase, te oy-o sbatel osil kuʼun li ajvalilal* tspase›.+ 8 Jaʼ yuʼun, xi jamal chkal ta sat skotol li Israele, li stsobobbail Jeovae xchiʼuk xi jamal chkal ta xchikin li Jdiostike: chʼunbeik me li smantaltake xchiʼuk akʼo ta avoʼontonik skotol li smantaltak Jeova Dios avuʼunike sventa xavichʼik-o li osile+ xchiʼuk sventa xavakʼbeik komel ta xrexto* sbatel osil li anichʼnabike.

9 »Li voʼot ek une, kuni nichʼon Salomon, ojtikinbo li Sdios atote, ta sjunuluk avoʼonton+ xchiʼuk kuxetuk avoʼonton xatun ta stojolal, yuʼun li Jeovae jaʼ chchaj ta kʼelel li koʼontontike+ xchiʼuk xil xojtikin li kʼusi ta jnoptike.+ Mi chasaʼe, chakʼ sba ta saʼel;+ pe mi chaviktae, tspʼajot-o sbatel osil.+ 10 Yuʼun voʼot la stʼujot Jeova sventa xavaʼanbe jpʼej sna ti chkʼot ta chʼulnae. Tsotsuk avoʼonton xchiʼuk abtejan me».

11 Li Davide laj yakʼbe Salomon li splanoal+ ochebale,+ li splanoal snailtake, li splanoal kuartoetik sventa skʼejobil* kʼusitike, li kuartoetik ta jol nae, li kuartoetik ta yute xchiʼuk li kuarto ti bu chakʼ perton Diose. 12 Laj yakʼbe li splanoal yamakʼil*+ sna Jeova jech kʼuchaʼal akʼbat yil ta s-espiritu Diose, li splanoal skotol li veʼebaletik ti oy ta sjoyobale, li snail kʼulejal ta sna melel Diose xchiʼuk li yavil kʼusitik chʼultajesbile;*+ 13 laj yalbe xtok ti kʼu yelan chichʼik chʼakel li paleetik+ xchiʼuk li jlevietike, ti kʼu yelan li abtelal chichʼ pasel ta sna Jeovae xchiʼuk skotol li kʼusitik chtun ta sna Jeovae; 14 laj yal xtok kʼu yalal li oro ti jaʼ chichʼ-o pasel skotol li kʼusitik chtun sventa li jeltos abtelale, ti kʼu yalal li plata sventa xichʼ pasel skotol li kʼusitik ta platae xchiʼuk li yan kʼusitik chichʼ tunesel sventa li jeltos abtelale; 15 laj yal xtok kʼu yalal li oro ti jaʼ chichʼ-o pasel li kandeleroetik+ xchiʼuk li skantilaltake, jaʼ ti kʼu yalal skʼan sventa li jujun kandelero xchiʼuk li skantilaltake; jech xtok, laj yal kʼu yalal li plata ti jaʼ chichʼ-o pasel li kandeleroetike, jaʼ ti kʼu yalal sventa li jujun kandelero xchiʼuk li skantilaltak chichʼ tunesele; 16 laj yal xtok kʼu yalal li oro ti jaʼ chichʼ-o pasel li mexaetik ti jaʼ te tslatsik li pane,*+ jaʼ ti kʼu yalal skʼan sventa li jujukot mexae, jech xtok, laj yal kʼu yalal li plata ti jaʼ chichʼ-o pasel li mexaetike, 17 laj yal kʼu yalal skʼan sventa xichʼ-o pasel li natil chavchav takʼinetike, li mukʼta bochetike, li jarraetik ta batsʼi oroe,+ ti kʼu yalal skʼan sventa xichʼ-o pasel li jujun bikʼtal bochetik ta oroe, ti kʼu yalal skʼan sventa li jujun bikʼtal bochetik ta platae. 18 Laj yal kʼu yalal li lekil oro sventa xichʼ-o pasel li skajleb xchikʼobil pome,+ li oro sventa xichʼ-o pasel li skareta Diose,+ jaʼ xkaltik, li keruvinetik+ ta oro ti xlichʼanoj xikʼik sventa xakʼbeik yaxinal* ta xikʼik li xkaxail strato Jeovae. 19 Xi laj yal li Davide: «Jaʼ la sbeiltasun li Jeovae xchiʼuk jaʼ laj yakʼbun jpʼijil sventa jpasbe lek+ splanoal skotol+ li kʼusitik chichʼ pasele».

20 Vaʼun, li Davide xi laj yalbe li Salomon ti jaʼ xnichʼone: «Tsotsuk me avoʼonton, mu xachibaj xchiʼuk abtejan me. Mu xaxiʼ xchiʼuk mu xnik avoʼonton, yuʼun liʼ xchiʼinojot li Jeova Diose, jaʼ li Jdiose.+ Muʼyuk chiktaot xchiʼuk muʼyuk tstenot komel,+ te chchiʼinot-o Jeova jaʼ to mi tsuts avuʼun svaʼanbel li snae. 21 Liʼ xa chapal ti kʼutik yelan chichʼ chʼakel li paleetik+ xchiʼuk li jlevietik+ sventa x-abtejik li ta sna melel Diose. Liʼ achiʼuk li j-abteletik ti ta sjunul yoʼonton ch-abtejike xchiʼuk lek xtojobik ta spasel kʼusiuk abtelal,+ liʼ achiʼuk li bankilaletike+ xchiʼuk sjunul li jteklum ti chchʼunik skotol li kʼusi chavale».