Isaias
51 »Voʼoxuk ti chasaʼik li kʼusi tukʼe, chikintabeikun,
voʼoxuk ti yakal chasaʼik li Jeovae.
Kʼelavilik li mukʼta ton ti bu lalokʼik tale
xchiʼuk li chʼen ti bu laj avichʼik jokʼel lokʼel tale.
3 Yuʼun li Jeovae tspatbe yoʼonton li Sione.+
Chakʼbe spatobil yoʼonton skotol li sjinemaltake+
xchiʼuk tspas kʼuchaʼal Eden li takixokol balumil tee+
xchiʼuk tspas kʼuchaʼal nichimaltik yuʼun Jeova li stenlejaltik ti takin tajeke.+
Ch-ayan xkuxetel oʼontonal xchiʼuk muyubajel te,
tstojik ta vokol xchiʼuk tstijik sonetik.+
4 Jteklumal, tsʼet chikintabeikun
xchiʼuk chikintabeikun, mukʼta lum kuʼun.+
Yuʼun chkakʼ tal jun mantal+
xchiʼuk chkakʼ kʼotuk kʼuchaʼal sakil osil ta stojolal jteklumetik li jtukʼilale.+
5 Poʼot xa xvul li tukʼilal kuʼune.+
Tspat yoʼontonik ta jtojolal li lumetik ti joyol ta nabe+
xchiʼuk jaʼ tspat-o yoʼontonik li ta jkʼobe.*
6 Toyo muyel asatik li ta vinajele
xchiʼuk kʼelik yalel li balumile.
Yuʼun li vinajele ta spuk sba batel kʼuchaʼal chʼail;*
li balumile ta xlaj batel kʼuchaʼal kʼuʼil pokʼil
xchiʼuk li jnaklejetik tee chchamik jech kʼuchaʼal usetik.
Mu xaxiʼik yuʼun ti tsaʼvanik ta kʼop li krixchanoetik ti snaʼ xchamike
xchiʼuk mu xchʼay achʼulelik ta xiʼel ta skoj ti chchopol kʼoptavanike.
8 Yuʼun chkʼuxatik yuʼun bikʼtal chon jech kʼuchaʼal chlaj ta kʼuxel li jlik kʼuʼil pokʼile;+
chkʼuxatik yuʼun xchanul* kʼuʼil pokʼil jech kʼuchaʼal chlaj ta kʼuxel li tsotse.*
Pe li tukʼilal kuʼune te oy-o ta sbatel osil
xchiʼuk li kolebal kuʼune te oy-o ta skotol li jaykʼol kuxlejale».+
9 ¡Oyuk kʼusi spas li skʼob Jeovae!
Jech, ¡oyuk kʼusi spas li skʼobe xchiʼuk akʼo yakʼ ta ilel li yipe!+
Oyuk kʼusi spas jech kʼuchaʼal la spas ta voʼnee, jech kʼuchaʼal la spas ta stojolal li jaykʼol kuxlejal echʼ ta voʼnee.
¿Mi mu voʼotuk ti la alilin li Raabe,*+
mi mu voʼotuk ti oy kʼusi la apajbe ochel li mukʼta chanul nabe?+
10 ¿Mi mu voʼotuk ti la atakijes li nabe, li voʼ ti jun to snatil xyale?+
¿Mi mu voʼotuk ti la ajam jun be li ta natil nab sventa te x-echʼ xtuchʼik li buchʼutik laj yichʼik chaʼmanele?+
11 Li buchʼutik ta xpojatik yuʼun Jeovae ta sutik tal.+
Naka xa kuxetel oʼontonal xchiʼuk muyubajel ta xaʼiik,
li at-oʼonton xchiʼuk jikʼ oʼontone ta xchʼay batel.+
12 «Voʼon ta jpat avoʼontonik.+
¿Kʼu yuʼun ti chaxiʼik yuʼun li krixchano ti snaʼ xchame+
xchiʼuk li xnichʼon krixchano ti chtakij kʼuchaʼal yaxal tsʼiʼlele?
13 ¿Kʼu yuʼun ti chachʼay ta ajol li Jeova ti jaʼ Jpasvanej avuʼune,+
ti jaʼ la xlichʼan batel li vinajele+ xchiʼuk ti laj yakʼbe snakleb li balumile?
Ta skoj taje, skotol kʼakʼal laxiʼ yuʼun li skapemal sjol j-ilbajinvaneje,*
ti xkoʼolaj chapal xa sventa slajes akʼoplale.
Avi une, ¿bu oy li skapemal sjol j-ilbajinvaneje?
14 Li buchʼu nijil ta skoj ti chukul ta kadenae poʼot xa xichʼ koltael lokʼel;+
muʼyuk ta xcham xchiʼuk muʼyuk chbat ta chʼen
xchiʼuk oy noʼox span.
15 Pe voʼon Jeovaun, voʼon li Adiosune,
voʼon ta jyukʼilan li nabe xchiʼuk xvoʼoʼet kuʼun kʼalal xyukʼlajete,+
16 Ta xkakʼ ta ave li kʼusi chkale
xchiʼuk ta jpixot ta snakʼobal jkʼob+
sventa xkakʼ ta yavil li vinajele xchiʼuk sventa xkakʼbe snakleb li balumile+
xchiʼuk sventa xi xkalbe li Sione: ‹Voʼot jteklumalot›.+
17 ¡Julavan! ¡Julavan! Totsan, Jerusalen,+
voʼot ti laj xa avuchʼbe skopail skʼakʼal yoʼonton li Jeova ti te stsakoje.
Laj xa avuchʼ li vino te oy ta kopae;
xokol xa kom avuʼun li kopa ti xatamlajet yuʼune.+
18 Ta skotol li yalab ayane, mi junuk te oy sventa sbeiltasat
xchiʼuk ta skotol li yalab la stsʼitese, mi junuk te oy sventa xnitbat skʼob.
19 Oy kʼusi chaʼtos chvul ta atojolal.
¡Chavichʼ lajesel xchiʼuk chavichʼ ulesel, chavil viʼnal xchiʼuk chalaj ta espada!+
¿Buchʼu van chakʼuxubaj ta yoʼonton?
¿Buchʼu van ta spat avoʼonton?+
20 Yalik xa ta lum li akeremtake.+
Telajtik ta jujun s-eskinail kayeetik,
xkoʼolajik kʼuchaʼal kolemal chij ti tikʼil ta petsʼe.
Vulem ta stojolalik li skʼakʼal yoʼonton Jeovae, tsots albatik mantal yuʼun li Adiose».
21 Jaʼ yuʼun, avokoluk, chikintao liʼe,
ants ti oy avokole xchiʼuk ti chayakub akʼo mi maʼuk ta skoj vinoe.
22 Xi chal li Jeova ti jaʼ Avajvale, li Adios ti tspakbe skʼoplal li steklumale:
«¡Kʼelavil! Ta jpojbot lokʼel ta akʼob li kopa ti xatamlajet yuʼune,+
li vino te oy ta kopae, li skopail skʼakʼal koʼontone;
muʼyuk xa bu chavuchʼ-o.+
23 Jaʼ xa chkakʼbe ta skʼob li buchʼutik chakʼ avokole,+
li buchʼutik xi laj yalboxuke: ‹¡Patano aba sventa xixanavkutik ta aba!›.
Jaʼ yuʼun, kʼot avuʼun kʼuchaʼal balumil li apate,
kʼot kʼuchaʼal kaye sventa te xanavik».