Deuteronomio

8 »Skʼan xachʼunik lek li jujun mantaletik yakal chkalboxuk avie sventa xakuxiik-o,+ xa-epajik xchiʼuk xavuʼuninik li osil ti laj yakʼ ye Jeova chakʼbe li amoltotakike.+ 2 Vuleso ta ajol ti 40 jabil laj yakʼ axan li natil be ta takixokol balumil+ li Jeova Dios avuʼune sventa bikʼit xavakʼ aba xchiʼuk sventa xakʼot ta preva+ yoʼ xvinaj li kʼusi oy ta avoʼontone,+ mi chavakʼ ta akuxlejal li smantaltake o mi muʼyuk. 3 Jaʼ yuʼun, la sbikʼtajes akʼoplal xchiʼuk laj yakʼ avil viʼnal,+ pe la smakʼlintasot ta mana+ ti mu toʼox xavojtikin xchiʼuk ti mu toʼox xojtikin li amoltotake. Taje jaʼ sventa chakʼ anaʼ ti maʼuk noʼox ta pan kuxul li krixchanoe, jaʼ kuxul-o skotol li kʼusitik chlokʼ ta ye Jeovae.+ 4 Muʼyuk xlaj li akʼuʼ apokʼ alapoje xchiʼuk muʼyuk situb avakan ti 40 jabil xatal xabate.+ 5 Anaʼoj lek ta avoʼonton ti jech-o la stukʼibtasot+ li Jeova Dios avuʼun jech kʼuchaʼal tstukʼibtas xnichʼon li jun vinike.

6 »Jaʼ yuʼun, skʼan xavakʼ ta akuxlejal li smantaltak Jeova Dios avuʼune, xanavan li ta be yuʼune xchiʼuk jechuk-o xaxiʼta.* 7 Yuʼun li Jeova Dios avuʼune chikʼot batel ta jun lekil balumil,+ jun balumil ti bu oy ukʼume,* ti bu oy nioʼe xchiʼuk ti bu oy sat voʼ* ti chbein ta stenlejaltik xchiʼuk ta vitstikaltike, 8 jun balumil ti bu chchʼi trigo, sevada, uva, igo, granada*+ xchiʼuk ti bu chlokʼ s-aseiteal oliva xchiʼuk pome.+ 9 Jaʼ jun balumil ti bu mu vokoluk ta tael veʼlile xchiʼuk mu kʼusi palta avuʼun te. Te noʼox chataik tsatsal takʼinetik ta tonetik xchiʼuk te noʼox chalokʼesik kovre ta vitsetik.

10 »Mi laveʼ xa oxe, mi noj xa ox lek achʼute, skʼan xakʼupil kʼopta li Jeova Dios avuʼun ta skoj ti laj yakʼbot li lekil osile.+ 11 Kʼelo me aba ti mu xchʼay ta ajol li Jeova Dios avuʼun ta skoj ti muʼyuk chachʼunbe li smantaltake, li kʼusitik chapanbil yuʼune xchiʼuk li kʼusitik yaloj ti yakal chkalbot avie. 12 Mi laveʼ xa ox, mi noj xa ox lek achʼut, mi nakalot xa ox ta lekil naetik ti voʼot la avaʼane,+ 13 mi epaj xa ox avakax, achij, aplata, a-oro xchiʼuk mi ep xa ox tajek kʼusitik oy avuʼune, 14 mu me xatoy aba+ ti jaʼ xa chchʼay-o ta ajol li Jeova Dios avuʼun ti jaʼ la slokʼesot talel ta yosilal Ejipto ti bu toʼox tikʼilot ta mosoile,+ 15 ti laj yakʼ xanavan ta mukʼta takixokol balumil ti chakʼ xiʼele,+ ti oy kiletel chonetik ti oy svenenoale, tseketik* xchiʼuk tʼajemik balumil ti muʼyuk yaʼlele. Te laj yakʼ lokʼuk voʼ ta tsatsal ton.+ 16 Jech xtok, li ta takixokol balumile te la smakʼlintasot ta mana+ ti mu toʼox xojtikin li amoltotake sventa sbikʼtajes akʼoplal+ xchiʼuk xakʼot ta preva yoʼ xatabe sbalil ta jelavel.+ 17 Mi xi chlik loʼilajuk avoʼontone: ‹Ta kipal jtuk xchiʼuk ta stsatsal jkʼob ti jtaoj ep jkʼulejale›,+ 18 teuk ta ajol ti jaʼ chakʼbot atsatsal li Jeova Dios avuʼun yoʼ xata akʼulejale+ sventa xkʼot ta pasel yuʼun li trato laj yalbe ta jamal amoltotak jech kʼuchaʼal yakal chkʼot ta pasel avie.+

19 »Mi oy jun kʼakʼal chchʼay ta ajol li Jeova Dios avuʼune ti jaʼ xa chatsʼakli li yan diosetike, ti chlik tunan ta stojolalike xchiʼuk ti chlik anijan aba ta stojolalike, jamal chkal ti jpʼel skʼoplal chavichʼik lajesele.+ 20 Ta skoj ti muʼyuk chachʼunbeik li kʼusi chal Jeova Dios avuʼunike,+ jech chavichʼik lajesel jech kʼuchaʼal chavilik ti yakal chichʼik lajesel yuʼun Jeova li jteklumetike.