Isaias
25 Kajval Jeova, voʼot li Diosot kuʼune.
Ta jtoybot akʼoplal, ta jkʼupil kʼopta li abie,
yuʼun toj labalik sba li kʼusitik apasoj+
ti jaʼ li kʼusitik la anop la apas* ta voʼne+
ta skoj ti tukʼote+ xchiʼuk ta skoj ti xuʼ jpat koʼontonkutik ta atojolale.
2 Yuʼun naka xa stanal lamal kom avuʼun li jun jteklume,
kʼajomal xa xchʼuchʼulil kom li jun jteklum ti oy lek smuroale.
Li steklumal jyanlume maʼuk xa jun jteklum kom;
muʼyuk xa bu chichʼ-o chaʼvaʼanel sbatel osil.
3 Jech oxal, tstoybot akʼoplal jun tsatsal jteklum;
4 Yuʼun kʼotemot ta stsatsal pojobbail li buchʼu abol sbae,
jun tsatsal pojobbail ta stojolal li buchʼu povre kʼalal chil svokole,+
jun nakʼobbail kʼalal oy tsatsal ikʼaloʼe,
Kʼalal chlik skʼakʼal yoʼonton li j-ilbajinvanejetik ti xkoʼolaj kʼuchaʼal tsatsal ikʼaloʼ ti makal chkʼot ta jun muroe,
5 ti xkoʼolaj kʼuchaʼal xkʼixnal kʼakʼal li ta takin lume,
jech chapajtsan ti kʼu yelan xvochlajetik* li yan krixchanoetike.
Jech kʼuchaʼal tspajes xkʼixnal kʼakʼal li yaxinal* toke,
jaʼ jech chichʼ pajesel li skʼejimol j-ilbajinvanejetike.
6 Li ta vits liʼe,+ li Jeova ti jaʼ bankilal yuʼun soltaroetike* ta xchapanbe skotol jteklumetik
epal lekil veʼlil,+
epal lekil vino,*
epal veʼlil ti naka lekil bekʼete*
xchiʼuk lekil vino ti chijbil leke.
7 Li ta vits liʼe, ta slokʼes* li pokʼ ti pixil-o skotol li jteklumetike
xchiʼuk li kʼusi te lichʼil ta stojolal* skotol li mukʼtik lumetike.
8 Li Diose ta slajesbe skʼoplal* ta sbatel osil li lajelale+
xchiʼuk ta skus lokʼel skotol yaʼlel satil+ li Ajvalil Jeova ti jaʼ Mukʼul Jpasmantale.
Ta slokʼes ta balumil skotol li chopol kʼoptaele,
yuʼun jech yaloj stuk li Jeovae.
9 Li vaʼ kʼakʼale, xi chalike:
«¡Kʼelavilik! ¡Liʼe jaʼ li Dios kuʼuntike!+
¡Liʼe jaʼ li Jeovae!
Jaʼ jpatoj koʼontontik ta stojolal.
Kuxetuk noʼox koʼontontik xchiʼuk muyubajkutik, yuʼun jaʼ tskoltautik».+
10 Yuʼun li skʼob Jeovae chchabi li vits liʼe+
xchiʼuk chichʼ pechʼilanel ta tekʼel te ta yavil li Moabe,+
jech kʼuchaʼal chichʼ pechʼilanel ta tekʼel li jobel ti bu busul ikʼobale.*
11 Ta syeʼ li skʼobe xchiʼuk ta smaj li Moabe,
jech kʼuchaʼal tsmaj voʼ ta skʼob kʼalal chnuxinaj li jun jnuxinajele
xchiʼuk ta slajesbe skʼoplal li stoyobbaile,+
lek xtojob ti kʼu yelan tsbakʼes skʼob kʼalal jech tspase.
12 Ta sjines yalel li jteklum ti oy lek smuroale,
ti toyolik lek smuroal sventa chchabi-o sbaike,
ta sjip yalel ta lum, ta sjip yalel ta pukuktik.*