Deuteronomio

19 »Mi laj xa ox slajes lumetik li Jeova Dios avuʼun xchiʼuk mi laj xa ox yakʼbot Jeova Dios avuʼun li yosilike, mi laj xa ox apojbe li kʼusitik oy yuʼunike, mi te xa ox oyot ta slumalik xchiʼuk ta snaike,+ 2 chʼako komel oxib jteklum li ta osil ti chakʼ avuʼunin li Jeova Dios avuʼune.+ 3 Ta oxvokʼ xapas li osil chakʼ avuʼunin li Jeova Dios avuʼune, meltsanbo sbelel sventa te xjatav batel ta junuk jteklum li buchʼu milvane.

4 »Liʼe jaʼ li kʼusi chichʼ pasel mi te jatav batel li jmilvanej sventa mu xichʼ milele: kʼalal mu yolbajuk la smil xchiʼil xchiʼuk ti muʼyuk onoʼox xtiʼet sjol ta stojolale,+ 5 ti jaʼo kʼot ta pasel kʼalal chbat xchiʼin ta stsobel siʼ ta teʼtike, mi botsʼ lokʼel ta steʼel li yekʼel kʼalal jaʼo tstoy skʼob sventa chtuchʼ li teʼe xchiʼuk ti jaʼ la sta ta makiel li xchiʼil ti cham-o yuʼune, li jmilvaneje skʼan te xjatav batel ta junuk li jteklum taje sventa mu xichʼ milel.+ 6 Yuʼun mi mu xjatav batele, xuʼ ta skʼakʼal yoʼonton tsnutsvan batel yutsʼ yalal li buchʼu cham ti jaʼ xa chmilvane,*+ vaʼun xuʼ smil mi la sta ta bee, yuʼun toj nom to xkom li jteklume. Pe mu sta-o xcham ta skoj ti muʼyuk onoʼox xtiʼet sjol ta stojolal li xchiʼile.+ 7 Jaʼ yuʼun, xi ta xkalbot mantale: ‹Chʼako komel oxib jteklum›.

8 »Mi laj xa ox yepajesbot avosil li Jeova Dios avuʼun jech kʼuchaʼal laj yakʼ ye ta stojolal li amoltotake+ xchiʼuk mi laj xa ox yakʼbot skotol li osil ti laj yalbe ta jamal chakʼbe li amoltotake+ 9 —jaʼ noʼox venta mi chachʼun skotol li mantal yakal chkalbot avie, ti xakʼan li Jeova Dios avuʼune xchiʼuk ti jech-o xaxanav li ta sbee—,+ skʼan me xachʼak komel oxib jteklum xtok, jaʼ parte li yan oxib jteklum oy avuʼune.+ 10 Mi jech la apase, li ta balumil ti chakʼbot ta arexto* li Jeova Dios avuʼune, muʼyuk te chichʼ malbel xchʼichʼel junuk krixchano ti chʼabal smule+ xchiʼuk muʼyuk chata amul ta skoj chʼichʼ.+

11 »Pe mi oy jun vinik ti spʼajoj li jun xchiʼile,+ ti smalaoj xa onoʼox sventa stsak ta kʼop xchiʼuk ti la syayijes ti cham-o yuʼune, vaʼun mi te jatav batel ta junuk li jteklum taje, 12 li moletik ti bu toʼox nakale skʼan xbat yikʼik tal sventa xakʼbeik ta yok skʼob yutsʼ yalal li buchʼu chame,* jech akʼo yichʼ milel.+ 13 Mu me aboluk sba xavil.* Skʼan xalokʼes ta stojolal Israel li mulil kʼot ta pasel ta skoj ti laj yichʼ malbel xchʼichʼel li buchʼu chʼabal smule+ sventa lek chbat akuxlejal.

14 »Mi kʼot xa ox ta arexto* li balumil ti jaʼ chakʼ avuʼunin li Jeova Dios avuʼune, mu me xanetʼbe batel stsʼak yosil junuk achiʼil,+ jechuk-o xkom ti kʼu yelan laj yiktaik li amoltotake.

15 »Mu xuʼ xichʼ tsakel ta venta mi jun noʼox buchʼu tsvaʼan sba ta testigo* ti chal oy spaltail* o ti spasoj jtosuk smul li jun xchiʼile.+ Jaʼ to lek chapanbil chkʼot skotol kʼusiuk noʼox mi laj yal chaʼvoʼ o oxvoʼ testigoe.+ 16 Mi oy buchʼu ta xchopolil yoʼonton tsvaʼan sba ta testigo ta skontrainel junuk vinik ti tsjutbe* jtosuk smule,+ 17 xchaʼvoʼalik li buchʼu oy skʼopike akʼo svaʼan sbaik ta stojolal Jeova, ta stojolal paleetik xchiʼuk ta stojolal jchapanvanejetik ti stsakoj yabtelik li vaʼ orae.+ 18 Li jchapanvanejetike akʼo sabeik* lek skʼoplal,+ mi vinaj ti jecheʼ noʼox kʼusi laj yal li buchʼu la svaʼan sba ta testigoe, ti jecheʼ noʼox la sjutbe* smul li yermanoe, 19 skʼan jech xapasbeik li kʼusi tspasbe ox yaʼi li yermanoe.+ Skʼan xalokʼes ta atojolal li kʼusi chopole.+ 20 Li buchʼutik kuxulik toe chkʼot ta xchikinik, vaʼun ta xiʼik. Jech muʼyuk xa buchʼu jech tspas ta atojolalik li kʼusi chopol taje.+ 21 Mu me aboluk sba xavil:*+ mi oy buchʼu milvane, skʼan me xichʼ milel ek, mi la stʼus bekʼ satile, chichʼ tʼusbel sbekʼ sat ek, mi la skʼas tanal eile, chichʼ kʼasbel stanal ye ek, mi la skʼas kʼobile, chichʼ kʼasbel skʼob ek, mi la skʼas akanile, chichʼ kʼasbel yakan ek.+