Jeremias
23 Xi chal li Jeovae: «¡Abol sba li jchabichijetik ti tslajesbeik skʼoplal xchiʼuk ti tanpuk chbat yuʼunik li chijetik ti te oy ta kosile!».+
2 Jaʼ yuʼun, li Jeova ti jaʼ Dios yuʼun Israele xi chalbe li jchabichijetik ti yakal chchabibeik li steklumale: «Li voʼoxuke tanpuk bat avuʼunik li jchijtake; la asibtasik batel xchiʼuk muʼyuk la achabiik lek».
Xi chal li Jeovae: «Jaʼ yuʼun, chkakʼ talel jsat ta atojolalik ta skoj li kʼusitik chopol chapasike».+
3 «Vaʼun, ta jtsob sutel tal li skomenal* jchijtak ti tanpuk batemik kuʼun ta skotol jteklumetike,+ ta jtsob sutel tal li ta yosilalike,+ ta x-epajik xchiʼuk ta xpʼolik.+ 4 Ta jvaʼan jchabichijetik yuʼunik sventa xchabiatik ta melel.+ Muʼyuk xa ta xiʼik, muʼyuk xa ta xnikik ta xiʼel xchiʼuk mi jkotuk ta xchʼay», xi li Jeovae.
5 Xi chal li Jeovae: «¡Kʼelavilik!, chkʼot skʼakʼalil ti chkakʼ lokʼuk tal ta stojolal David jun skʼelom* ti lek tukʼe.+ Li ta jteklume* chlik ventainvanuk jun ajvalil+ ti chakʼ ta ilel spʼijile, ti tspas li kʼusi tukʼe xchiʼuk ti tspas li kʼusi chal mantale.+ 6 Li vaʼ kʼakʼale, chichʼ pojel li Judae+ xchiʼuk jun noʼox yoʼonton chnaki li Israele.+ Xchiʼuk xi chichʼ biiltasele: Jaʼ Tukʼilal Kuʼuntik li Jeovae».+
7 Xi chal li Jeovae: «Pe chkʼot skʼakʼalil ti muʼyuk xa xi chalike: ‹¡Jamal chkal ta skoj kuxul Jeova ti jaʼ li buchʼu la slokʼes tal ta yosilal Ejipto li jteklum Israele!›,+ 8 yuʼun xi xa chalike: ‹¡Jamal chkal ta skoj kuxul Jeova ti jaʼ li buchʼu la slokʼes tal xchiʼuk laj yikʼ tal li snitilulal Israel li ta yosilal nortee xchiʼuk ta skotol li jteklumetik ti bu toʼox spukoj batele!›, xchiʼuk te chnaki ta yosilal stukik».+
9 Xi chkalbe li j-alkʼopetike:
solel lilijem li koʼontone.
Solel chnik skotol li jbakiltake.
Xikoʼolaj kʼuchaʼal jun vinik ti chyakube,
kʼuchaʼal jun vinik ti chʼayem xa sjol ta vinoe,
jaʼ ta skoj li Jeovae xchiʼuk jaʼ ta skoj li xchʼul kʼope.
10 Yuʼun noj ta jmukulsativanejetik li jteklume,+
li jteklume solel chat yoʼonton ta skoj ti chopol kʼoptabile+
Chopol li kʼusitik tspasike xchiʼuk muʼyuk lek tstunes li sjuʼelike.
11 Xi chal li Jeovae: «Li j-alkʼope xchiʼuk li palee yikʼubtasoj xa sbaik.*+
Yuʼun kʼalal to ta jna te spasojik li kʼusi toj chopole».+
12 Xi chal li Jeovae: «Jaʼ yuʼun, chʼulul xchiʼuk ikʼpulan chkom li sbeike;+
ta xichʼik takoltael,* vaʼun chyalik ta lum.
Yuʼun chkakʼ talel vokolil ta stojolalik
li ta sjabilal kʼalal chichʼik akʼbel kastigoe.
13 Kiloj ti oy kʼusi toj chopol tspasik li j-alkʼopetik ta Samariae.+
Chalik albil kʼopetik ta sbi Baal
xchiʼuk tskʼejpʼunik* lokʼel ta be li jteklumal Israele.
14 Kiloj ti oy kʼusi toj echʼ xa noʼox chopol tspasik li j-alkʼopetik ta Jerusalene.
Chmukul sativanik xchiʼuk chloʼlavanik;+
tstijbeik yoʼonton ta spasel kʼusi chopol li jpaschoplejaletike;+
mu xiktaik spasel li kʼusi toj chopole.
Skotolik xkoʼolajik chkil kʼuchaʼal li Sodomae+
xchiʼuk li jnaklejetik tee xkoʼolajik kʼuchaʼal li Gomorrae».+
15 Jaʼ yuʼun, li Jeova ti jaʼ bankilal yuʼun soltaroetike* xi chal ta stojolal li j-alkʼopetike:
«Chkakʼbe slajesik chʼail tsʼiʼlel
xchiʼuk chkakʼbe yuchʼik voʼ ti oy svenenoale.+
Yuʼun li j-alkʼopetik ta Jerusalene jaʼ la spukik batel ta sjunul jteklum li jecheʼ chanubtasele».
16 Xi chal li Jeova ti jaʼ bankilal yuʼun soltaroetike:
«Mu xachikintaik li kʼusi chal j-alkʼopetik ti chkʼot ta pasele.+
Yuʼun tsloʼlaoxuk.*
17 Ep ta velta xi chalbeik li buchʼutik mu xichʼikun ta mukʼe:
‹Xi yaloj li Jeovae: «Chakʼupinik jun oʼontonal»›.+
Xchiʼuk xi chalbeik li buchʼutik pimik ta mantal ti jaʼ noʼox tspasik li kʼusi tskʼan yoʼontonike:
‹Muʼyuk chvul ta atojolalik mi jtosuk vokolil›.+
18 Yuʼun ¿buchʼu te tsakal skʼoplal li ta slekil amigotak Jeova
sventa xil xchiʼuk xaʼibe li skʼope?
¿Buchʼu yaʼioj xchiʼuk stsʼet chikintaojbe li skʼope?
19 ¡Kʼelavilik! Li skapemal sjol Jeovae xkoʼolaj kʼuchaʼal tsatsal ikʼ ti xjumet chtale;
xkoʼolaj kʼuchaʼal tsatsal ikʼaloʼ ti sututet chvul ta sjol li buchʼutik toj chopolike.+
20 Li skʼakʼal yoʼonton Jeovae muʼyuk chpaj
jaʼ to mi la spas xchiʼuk mi kʼot ta pasel yuʼun li kʼusi oy ta yoʼontone.
Taje jaʼ to chavaʼibeik lek smelolal li ta slajebaltik batel kʼakʼale.
21 Akʼo mi muʼyuk la jtak batel li j-alkʼopetike, bat stukik ta anil.
Akʼo mi muʼyuk la jkʼoponik, lik yalik albil kʼopetik.+
22 Pe ti teuk ay vaʼiikuk ti bu oyik li kamigotake,
laj yakʼbe yaʼiik jechuk jkʼop li jteklumale,
laj yikʼik sutel tal jechuk li ta xchopol beike xchiʼuk la skoltaik jechuk sventa xiktaik spasel li kʼusi chopole».+
23 Xi chal li Jeovae: «¿Mi jaʼ noʼox van Diosun kʼalal nopol oyune, mi mu jaʼuk Diosun xtok kʼalal nom oyune?».
24 Xi chal li Jeovae: «¿Mi oy van bu xuʼ snakʼ* sba li jun krixchano ti bu mu jta ta ilele?».+
Xi chal li Jeovae: «¿Mi mu xkiluk skotol li kʼusi oy ta vinajel xchiʼuk ta balumile?+
25 »Kaʼioj ti chalik jecheʼ albil kʼopetik ta jbi li j-alkʼopetike, xi chalike: ‹¡Oy kʼusi la jvaychinta! ¡Oy kʼusi la jvaychinta!›.+ 26 ¿Bakʼin to van jech-o chalik jutbil kʼopetik* ta yoʼontonik li j-alkʼopetike? Jaʼik j-alkʼopetik ti chalik li loʼlavanej oy ta yoʼontonike.+ 27 Li kʼusi oy ta yoʼontonik li j-alkʼopetik ti chalbe sbaik ta jujuntal xvayichike jaʼ ti xchʼay ta sjolik jbi li jteklumale, jech kʼuchaʼal la xchʼay ta sjolik jbi ta skoj Baal li stotike.+ 28 Li j-alkʼop ti oy kʼusi la xvaychintae jaʼ akʼo yal li xvayiche, pe li buchʼu te oy ta stojolal li jkʼope jaʼ akʼo yal ta jamal li jkʼope».
«¿Kʼusi xkoʼolajik-o li jobel xchiʼuk li sat tsʼunobile?», xi li Jeovae.
29 Xi chal li Jeovae: «¿Mi mu xkoʼolajuk kʼuchaʼal kʼokʼ li jkʼope+ xchiʼuk mi mu xkoʼolajuk kʼuchaʼal martiyo ti tsvokʼ li mukʼta tone?».+
30 Xi chal li Jeovae: «Jaʼ yuʼun, ta jkontrain li j-alkʼopetik ti tspojbe sbaik ta jujuntal li jkʼope».+
31 Xi chal li Jeovae: «Ta jkontrain li j-alkʼopetik ti xi chal li kʼusi tsnop stukike: ‹¡Xi chal li Diose!›».+
32 Xi chal li Jeovae: «Ta jkontrain li j-alkʼopetik ti jecheʼ kʼusi chvaychintaike, ti chalbeik li jteklumale xchiʼuk ti tskʼejpʼunik* batel ta be ta skoj li kʼusitik jecheʼ chalike xchiʼuk ti xtoyet xa chkʼopojike».+
Xi to chal li Jeovae: «Pe muʼyuk la jtakik batel xchiʼuk muʼyuk laj kalbeik mantal. Jaʼ yuʼun, muʼyuk tstabeik sbalil li jteklum liʼe».+
33 «Mi oy junuk krixchano ta jteklum, mi oy junuk j-alkʼop o mi oy junuk pale ti xi tsjakʼbote: ‹¿Kʼusi jaʼ li yikats* Jeovae?›, xi skʼan xatakʼbee: ‹«¡Voʼoxuk li ikatsiloxuke! Xchiʼuk ta jipoxuk batel»,+ xi li Jeovae›. 34 Pe mi oy junuk j-alkʼop o mi oy junuk pale o mi oy junuk krixchano ta jteklum ti xi chale: ‹¡Liʼe jaʼ li yikats* Jeovae!›, chkakʼbe kastigo li krixchano taje xchiʼuk li yutsʼ yalale. 35 Ta jujuntal xi chajakʼbe li achiʼilik xchiʼuk li avutsʼ avalalike: ‹¿Kʼusi stakʼoj talel li Jeovae? ¿Kʼusi yaloj li Jeovae?›. 36 Pe mu xa xavalbeik skʼoplal li yikats* Jeovae, yuʼun jaʼ kʼotem ta ikatsil* li kʼusi chavalik ta jujuntale xchiʼuk laj xa ajelik li kʼusitik chal kuxul Diose, li Jeova ti jaʼ bankilal yuʼun soltaroetik ti jaʼ Jdiostike.
37 »Xi xajakʼbe li j-alkʼope: ‹¿Kʼusi stakʼojbot talel li Jeovae? ¿Kʼusi yalojbot li Jeovae? 38 Mi xi chavalilanik-oe: «¡Li yikats* Jeovae!» mi xachiike, xi chalboxuk li Jeovae: «Ta skoj ti xi chavalike: ‹Li smantal Jeovae jaʼ jun ikatsil›,* akʼo mi xi xa onoʼox kalojboxuke: ‹Mu xiuk xavalike: «¡Li yikats* Jeovae!»›, 39 jech oxal ta jtoyoxuk likel xchiʼuk nom ta jipoxuk lokʼel li ta kelovale, jech ta jpasboxuk xchiʼuk jech ta jpasbe li osil ti laj kakʼboxuk xchiʼuk ti laj kakʼbe li amoltotakike. 40 Chkakʼ ti xakʼexavik ta sbatel osile xchiʼuk ti xavichʼik labanel ta sbatel osile, ti mu jaʼuk xchʼay ta jolile»›».+