Jeremias

36 Vaʼun, kʼalal xchanibal xa ox jabil yochel ta ajvalil ta Juda li Jeoiakim+ ti jaʼ xnichʼon Josiase, kʼoponat tal yuʼun Jeova li Jeremiase, xi albate: 2 «Tsako jlikuk balbalvun xchiʼuk te xatsʼiba skotol li kʼusi kalojbot ta stojolal Israel, Juda+ xchiʼuk skotol li mukʼtik lumetike,+ jech xkechet xlik atsʼiba li kʼusi laj kalbot ta baʼyel velta li ta skʼakʼalil Josias kʼalal to avie.+ 3 Yikʼaluk van xikta xchopol beik li jteklum Juda mi laj yaʼiik li vokolil jnopoj chkakʼ talel ta stojolalike, vaʼun xuʼ jech jchʼaybeik li spaltailike* xchiʼuk li smulike».+

4 Vaʼun, li Jeremiase la stak ta ikʼel li Baruk+ ti jaʼ xnichʼon Neriase,+ li Jeremias une lik yalbe skotol li kʼusi albil yuʼun Jeovae, li Baruke la stsʼiba li ta balbalvune. 5 Laje, xi laj yalbe mantal Baruk li Jeremiase: «Mu xakʼik ochkun li ta sna Jeovae, jaʼ yuʼun mu xuʼ xi-och. 6 Jech oxal, voʼot skʼan xabat sventa xbat avapta li kʼusitik laj kalbot ti la atsʼiba ta balbalvun ti jaʼ li kʼusi laj yal Jeovae. Te xavapta ta sna Jeova sventa xaʼiik li jteklume, jaʼo xapas kʼalal yorail tspasik ayunoe;* jaʼ xavaptabe li buchʼutik liʼ onoʼox likemike xchiʼuk skotol li jnaklejetik ti likemik talel ta jteklumetik ta Judae. 7 Yikʼaluk van staik ta kʼoponel Jeova sventa xkʼuxubinatike, vaʼun xuʼ jech chiktaik li xchopol beike, yuʼun kʼalal laj yal Jeova li kʼusi chkʼot ta stojolal li jteklum liʼe, toj echʼ xa noʼox skʼakʼal yoʼonton xchiʼuk ilinem tajek».

8 Jaʼ yuʼun, li Baruk ti jaʼ xnichʼon Neriase jech la spas skotol jech kʼuchaʼal albat yuʼun li j-alkʼop Jeremiase, te tsots laj yapta ta sna Jeova li kʼusitik tsʼibabil ta balbalvun* ti jaʼ yaloj Jeovae.+

9 Vaʼun, li ta svoʼobal jabil yochel ta ajvalil ta Juda li Jeoiakim+ ti jaʼ xnichʼon Josiase, li ta sbalunebal ue, laj yichʼik albel mantal ti akʼo spasik ayuno ta sventa Jeova skotol li krixchanoetik ta Jerusalene xchiʼuk skotol li krixchanoetik ti talik ta Jerusalen ti likemik talel ta jteklumetik ta Judae.+ 10 Laje, li Baruke lik yaptabe sjunul jteklum li kʼusi yaloj Jeremias ti tsʼibabil ta balbalvune,* te laj yapta ta sna Jeova, te ta skuarto* Guemarias+ ti jaʼ xnichʼon li jtsʼibajom* Safane,+ li ta amakʼ* ti ta akʼol oye, li ta yochebal li achʼ tiʼ na yuʼun Jeovae.+

11 Li Mikaya ti jaʼ xnichʼon Guemarias xchiʼuk ti jaʼ smom Safane, laj yaʼi skotol li kʼusi chal Jeova ti te tsʼibabil ta balbalvune,* 12 vaʼun yal batel ta sna* ajvalil, ta skuarto li sekretarioe. Te chotolik skotol li bankilaletike:* li Elisama+ ti jaʼ sekretarioe, li Delaya ti jaʼ xnichʼon Semayae, li Elnatan+ ti jaʼ xnichʼon Akbore,+ li Guemarias ti jaʼ xnichʼon Safane, li Sedekias ti jaʼ xnichʼon Ananiase xchiʼuk skotol li yan bankilaletike. 13 Li Mikayae laj yalbe yaʼiik skotol li kʼusi laj yaʼi ta balbalvun* ti laj yapta ta stojolal sjunul jteklum li Baruke.

14 Vaʼun, skotol li bankilaletike jaʼ la stakik batel ta stojolal Baruk li Jeudi ti jaʼ xnichʼon Netaniase, ti jaʼ smom li Selemiase xchiʼuk ti jaʼ snamtal mom li Kusie, sventa xi xalbee: «Laʼ xchiʼuk ichʼo tal li balbalvun ti la akʼelbe li jteklume». La stsak batel balbalvun li Baruk ti jaʼ xnichʼon Neriase xchiʼuk bat ti bu oyike. 15 Laje, xi laj yalbeike: «Avokoluk, chotlan, tsots aptao tal sventa xkaʼikutik». Jaʼ yuʼun, li Baruke laj yaptabe yaʼiik.

16 Vaʼun, kʼalal laj yaʼiik skotol li kʼusi laj yale, xiʼemik xa la skʼelbe sba satik ta jujuntal xchiʼuk xi laj yalbeik li Baruke: «Li kʼusi laj avale skʼan xbat kalbekutik skotol li ajvalile». 17 Xi la sjakʼbeik li Baruke: «Avokoluk, albunkutik kʼuxi la atsʼiba skotol li kʼusi laj avale. ¿Mi jaʼ laj yalbot Jeremias li kʼusi la atsʼibae?». 18 Xi la stakʼ li Baruke: «Jaʼ laj yalbun skotol li kʼusi la jtsʼibae xchiʼuk ta tinta la jtsʼiba li balbalvun* liʼe». 19 Li bankilaletike xi laj yalbeik li Baruke: «Batanik, bat nakʼo* abaik xchiʼuk li Jeremiase, mu me buchʼu xavalbeik ti bu chanakʼ abaike».+

20 Vaʼun, li balbalvune te laj yakʼik ta skuarto li Elisama ti jaʼ sekretarioe xchiʼuk bat skʼelik ta amakʼ* li ajvalile xchiʼuk laj yalbeik skotol li kʼusi laj yaʼiike.

21 Jaʼ yuʼun, li ajvalile la stak batel Jeudi+ sventa xbat yichʼ tal li balbalvune, li Jeudie bat yichʼ tal ta skuarto li Elisama ti jaʼ sekretarioe. Vaʼun, lik yaptabe li ajvalile xchiʼuk skotol li bankilaletik ti koʼol te vaʼalik xchiʼuk li ajvalile. 22 Li ajvalile jaʼo te chotol li ta sna ti te ch-echʼ yuʼun yorail siktike, jaʼ li ta sbalunebal ue,* te xtiltun* skʼokʼ ta yav akʼal sventa chkʼatin. 23 Kʼalal chlaj xa ox skʼel oxvokʼ o chanvokʼuk li Jeudie, li ajvalile ta setilan lokʼel ta xkuchilu sekretario li jujuvokʼ taje xchiʼuk tsjip ochel li ta yav akʼal ti xtiltun* skʼakʼale, jaʼ to ti och ta kʼokʼ yuʼun sliklej li balbalvune. 24 Muʼyuk xiʼik jutebuk; mi jaʼuk la sliʼ ta jatel skʼuʼ spokʼik li ajvalile xchiʼuk li yajtuneltak ti laj yaʼiik li kʼusi tsʼibabile. 25 Li Elnatan,+ Delaya+ xchiʼuk Guemariase+ xvokoletik laj yalbeik ajvalil ti mu xchikʼ li balbalvune, pe muʼyuk la xchikinta. 26 Jech xtok, li ajvalile laj yalbe mantal Jerameel ti jaʼ xnichʼon ajvalile,* li Seraya ti jaʼ xnichʼon Asriele xchiʼuk li Selemias ti jaʼ xnichʼon Abdeel sventa xbat stsakik tal li Baruk ti jaʼ sekretarioe xchiʼuk li j-alkʼop Jeremiase, pe nakʼatik* yuʼun li Jeovae.+

27 Vaʼun, kʼoponat tal yan velta yuʼun Jeova li Jeremias kʼalal laj xa ox xchikʼ ajvalil li balbalvun ti te stsʼibaoj Baruk li kʼusi albat yuʼun Jeremiase, xi albate:+ 28 «Saʼo yan balbalvun xchiʼuk te xatsʼiba li kʼusi te toʼox tsʼibabil li ta baʼyel balbalvun ti la xchikʼ li Jeoiakim ti jaʼ ajvalil ta Judae.+ 29 Xi skʼan xavalbe li Jeoiakim ti jaʼ ajvalil ta Judae: ‹Xi chal li Jeovae: «Voʼot ti la achikʼ li balbalvune xchiʼuk ti xi chavale: ‹¿Kʼu yuʼun xi la atsʼibae: «Jpʼel skʼoplal chtal li ajvalil ta Babiloniae, tslajes ta j-echʼel li jteklum liʼe, mi junuk krixchano xchiʼuk mi jkotuk chonbolom chkom»?›.+ 30 Jaʼ yuʼun, xi chal Jeova ta stojolal li Jeoiakim ti jaʼ ajvalil ta Judae: ‹Mi junuk snitilulal chkom sventa te xchoti li ta xchotleb ajvalil Davide,+ li sbekʼtale te telel chkom ta yeloval kʼakʼal xchiʼuk te chlaj ta taiv li ta akʼobaltike.+ 31 Chkakʼbe kastigo li ajvalile, li snitilulale xchiʼuk li yajtuneltak ta skoj li spaltailike.* Jech xtok, chkakʼ tal ta stojolalik xchiʼuk ta stojolal jnaklejetik ta Jerusalen xchiʼuk viniketik ta Juda li vokolil ti kalojbeik xa onoʼox chkakʼ tale,+ pe muʼyuk la xchikintaik›»›».+

32 Vaʼun, li Jeremiase la saʼ yan balbalvun xchiʼuk laj yakʼbe li Baruk ti jaʼ xnichʼon Nerias ti jaʼ sekretarioe+ xchiʼuk te la stsʼiba li kʼusi albat yuʼun Jeremiase, skotol li kʼusi te tsʼibabil li ta balbalvun* ti la xchikʼ li Jeoiakim ti jaʼ ajvalil ta Judae.+ Jech xtok, ep to ta pʼel kʼopetik te laj yichʼ tsʼibael ti xkoʼolajtik kʼuchaʼal li ta baʼyele.