Jeremias
49 Xi chal Jeova ta sventa li j-ammonetike:+
«¿Mi yuʼun chʼabal xnichʼnab li Israele?
¿Mi yuʼun chʼabal buchʼu xichʼ komel li kʼusitik oy yuʼune?
¿Kʼu yuʼun jaʼ laj yuʼunin Malkam+ li yosilal Gade?+
¿Kʼu yuʼun te nakalik ta jteklumetik yuʼun Israel li steklumal Malkame?».
2 «Xi chal li Jeovae: ‹Jaʼ yuʼun, chkʼot skʼakʼalil
ti chkakʼ bakʼuk li senyail ti chichʼ xa tsakel ta kʼop* li Raba+ ti jaʼ j-ammonetike.+
Stuk xa slilijemal chkom
xchiʼuk li bikʼtal lumetik yuʼun ti te noʼox nopol oye* ta xichʼ tsanbel skʼakʼal›.
‹Li Israele chichʼ sutel li yosilik ti pojbatik toʼoxe›,+ xi li Jeovae.
3 ‹Esbon, ¡avetan ta okʼel, yuʼun laj xa yichʼ lajesel li Aie!
Bikʼtal lumetik yuʼun Raba ti te noʼox nopol oyoxuke, avetanik.
Lapik chʼixal kʼuʼil.*
Okʼanik xchiʼuk joyetanik li ta koraletike,*
yuʼun li Malkame chichʼ chukel batel,
jmoj chichʼ chukel batel xchiʼuk li paleetik yuʼune xchiʼuk li bankilaletik yuʼune.+
4 Jmulavil tseb, ¿kʼu yuʼun xatoyet chavaʼi aba ta sventa li stenlejale,
ta sventa li stenlejal ti oy kʼusi lek xchʼi tee,
ti chapat avoʼonton li ta akʼulejale
xchiʼuk ti xi chavale: «¿Buchʼu van xuʼ xtal stsakun ta kʼop?»?›».
5 «Xi chal li Ajvalil ti jaʼ Mukʼul Jpasmantale, li Jeova ti jaʼ bankilal yuʼun soltaroetike:* ‹Ta jtak talel kʼusi xibal sba ta atojolal,
te chlik talel ta stojolal li buchʼutik oy ta apat axokone.
Ta buyuk noʼox chavichʼik pukel batel
xchiʼuk muʼyuk buchʼu tstsob sutel tal li buchʼutik chjatavike›».
6 «‹Pe ta tsʼakale, ta jtsob sutel tal li j-ammonetik ti chukbilik batele›, xi li Jeovae».
7 Li Jeova ti jaʼ bankilal yuʼun soltaroetike xi chal ta sventa li Edome:
«¿Mi yuʼun chʼabal xa pʼijilal li ta Temane?+
¿Mi yuʼun laj xa skʼoplal li lekil tojobtasel chakʼik li buchʼutik xaʼibeik smelolale?
¿Mi yuʼun sok xa li spʼijilike?
8 Jnaklejetik ta Dedan,+ ¡jatavanik, sutanik batel!
¡Yalanik batel xchiʼuk te xanakiik li ta yut chʼen ti nat jomajtike!
Yuʼun chkakʼ talel vokolil ta stojolal li Esau
kʼalal mi kʼot yorail chkakʼ talel jsat ta stojolale.
9 Mi tal ta atojolal li buchʼutik tstsobik uvae,
¿mi mu tauk to xiktaik jlomuk sventa xichʼ kʼuxkʼultael?*
Mi och j-elekʼetik ta akʼobaltike,
ta xelkʼanik batel ti kʼu yepal xal yoʼontonike.+
10 Pe ta jtʼanan li Esaue.
Chkakʼ ta naʼel ti butik tsnakʼ* sbae,
vaʼun mu xa bu snakʼ sba.
11 Iktabun li ololetik ti chʼabal stotike,
vaʼun voʼon ta jchabi sventa mu xchamik.
Li antsetik ti chamem smalalike tspat yoʼontonik ta jtojolal».
12 Yuʼun xi chal li Jeovae: «¡Kʼelavil! Mi chuchʼik sbel kopa li buchʼutik mu persauk xuchʼike, ¿mi jaʼ xa van muʼyuk chavichʼ akʼbel kastigo li voʼote? Persa chavichʼ kastigo, persa chavuchʼ li sbel kopae».+
13 «Yuʼun jamal laj kal ti chakʼ xiʼel ti kʼu yelan chkom li Bosrae, chichʼ chopol kʼoptael,+ chichʼ lajesel xchiʼuk chichʼ labanel. Jech xtok, skotol li jteklumetik yuʼune jinem chkom sbatel osil»,+ xi li Jeovae.
14 Laj kaʼi ti oy kʼusi laj yal li Jeovae,
jun j-almantal ti laj yichʼ takel batel ta stojolal li mukʼtik lumetike, xi laj yale:
«Tsobo abaik xchiʼuk bat kontrainik li Edome;
chapano abaik sventa li paskʼope».+
15 «Yuʼun kʼelavil, bikʼit kom akʼoplal kuʼun ta stojolal li mukʼtik lumetike,
pʼajbil lakʼot ta stojolal li krixchanoetike.+
16 Voʼot ti nakalot ta tayal jomajtik chʼene,
ti nakalot li ta vits ti mas toyole,
jaʼ la sloʼlaot li stoyobbail avoʼontone
xchiʼuk ti chavakʼ xiʼele.
Akʼo mi ta toyol tajek chapas atas kʼuchaʼal jkot aguila,
ta jipot yalel tal», xi li Jeovae.
17 «Xibal sba chkom li Edome.+ Skotol li buchʼutik te ch-echʼike chchʼay xchʼulelik ta xiʼel kʼalal chilike xchiʼuk tslabanik* ta skoj li svokoltake. 18 Jech kʼuchaʼal laj yichʼ lajesel Sodoma, Gomorra xchiʼuk li jteklumetik ti te noʼox nopolike,+ jaʼ jech chkʼot ta stojolal ek, muʼyuk buchʼu te chnaki xchiʼuk mi junuk krixchano te tspas sna»,+ xi li Jeovae.
19 «¡Kʼelavilik! Oy buchʼu chlokʼ talel kʼuchaʼal jkot leon+ te ta pimil chʼixtikaltik ta xokon Jordan sventa te chbat ti butik jun yoʼonton chaʼi sbaik li chijetike, pe ta anil noʼox ta jnutsik* lokʼel li ta yosilalike. Te ta jvaʼan li buchʼu tʼujbile. Yuʼun ¿buchʼu xikoʼolaj xchiʼuk? ¿Buchʼu xuʼ yuʼun stsalun? ¿Mi oy junuk jchabichij ti xuʼ vaʼal xkom ta kelovale?+ 20 Jaʼ yuʼun, viniketik, chikintaik li kʼusi snopoj tspas* Jeova ta stojolal li Edome xchiʼuk li kʼusi snopoj tspas ta stojolal li jnaklejetik ta Temane:+
jpʼel skʼoplal chichʼik jochel batel li chʼiom chijetike.
Xokol chkom yuʼun ti bu toʼox nakalike, jech chkʼot ta pasel ta skoj smul stukik.+
21 Kʼalal mi yalik ta lume, oy kʼusi solel tsots chbakʼ ti chnik yuʼun sjunul li balumile.
¡X-avetik ta jyalel!
Ti kʼu yelan x-avetike chichʼ aʼiel kʼalal to ta Tsajal nab.+
22 ¡Kʼelavil! Li jkontrainvaneje xkoʼolaj kʼuchaʼal jkot aguila ti chvil muyel xchiʼuk ti xjipet yalele,+
jech chlichʼ batel xikʼ ta stojolal li Bosrae.+
Li vaʼ kʼakʼale, mu xa x-aʼibaj kʼusi tspasik li yajsoltarotak Edome,
jech kʼuchaʼal jun ants ti mu xa x-aʼibaj kʼusi tspas kʼalal chvokʼ yole».
23 Jun aʼyej ta sventa li Damaskoe:+
«Laj xa yichʼ akʼel ta kʼexlal li Amat+ xchiʼuk Arpade,
yuʼun laj yaʼiik jun chopol aʼyej.
Lik nikikuk ta xiʼel.
Li krixchanoetike xkoʼolajik kʼuchaʼal nab ti mu stakʼ pajtsanele.
24 Chʼabal xa stsatsal yoʼonton li Damaskoe.
Jatav xa batel, ta xnik ta xiʼel.
Mu xa snaʼ kʼusi tspas xchiʼuk toj kʼux chaʼi,
xkoʼolaj kʼuchaʼal jun ants kʼalal chvokʼ yole.
25 ¿Kʼu yuʼun muʼyuk yichʼoj iktael li jteklum ti xmuyubaj noʼoxe,
ti xkuxet noʼox yoʼontone?
26 Yuʼun li vaʼ kʼakʼale, te lamal chkomik ta skayealtak* li keremetik yuʼune
xchiʼuk chlaj skotol li soltaroetike», xi li Jeova ti jaʼ bankilal yuʼun soltaroetike.
27 «Ta jtsanbe skʼakʼal li smuroal Damaskoe
xchiʼuk chkʼakʼ li tsatsal tayal kʼelob osiletik yuʼun Ben-Adade».+
28 Xi chal Jeova ta sventa li Kedar+ xchiʼuk li jteklumetik ta Asor ti tsalatik yuʼun Nabukodonosor* ti jaʼ ajvalil ta Babiloniae:
«Likanik, muyanik batel ta Kedar
xchiʼuk lajesbeik skʼoplal li buchʼutik te nakalik ta Slokʼeb Kʼakʼale.
29 Chichʼik pojbel batel li skarpanaik xchiʼuk li xchijike,
chichʼik pojbel batel li spokʼal skarpanaik xchiʼuk skotol li kʼusitik oy yuʼunike.
Jech xtok, chichʼik ikʼbel batel li skameyoike
xchiʼuk xi ch-aptaatike: ‹¡Naka xiʼel oy ta buyuk noʼox!›».
30 Xi chal li Jeovae: «Jnaklejetik ta Asor, ¡jatavanik, nom xajatavik batel!
¡Yalanik batel xchiʼuk te xanakiik li ta yut chʼen ti nat jomajtike!
Yuʼun li Nabukodonosor* ti jaʼ ajvalil ta Babiloniae oy xa kʼusi chopol snopoj tspas ta atojolalik
xchiʼuk snopoj xa chakʼ avokolik».
31 Xi chal li Jeovae: «¡Likanik xchiʼuk muyanik batel ta skontrainel li jteklum ti jun yoʼontone,
ti muʼyuk kʼusi chiʼoe!
Muʼyuk smakobil li ochebaletik yuʼune mi jaʼuk stakʼinaltak; stuk bu nakalik.
32 Chichʼik ikʼbel batel li skameyoike
xchiʼuk chichʼik pojbel batel li stsʼunbal chonbolomik ti mu albajuk yepale.
Ta buyuk noʼox tanpuk chbatik kuʼun
li buchʼutik komkom setoj sjolik ta xokontak xchikinike+
xchiʼuk ta buyuk noʼox chlik talel kuʼun li svokolike», xi li Jeovae.
33 «Li Asore chkʼot ta sna teʼtikal tsʼiʼetik,
xokol chkom ta sbatel osil.
Muʼyuk buchʼu te chnaki
xchiʼuk mi junuk krixchano te tspas sna».
34 Li j-alkʼop Jeremiase oy kʼusi albat yuʼun Jeova sventa li Elame,+ jaʼo kʼalal jaʼ toʼox yochel ta ajvalil ta Juda li Sedekiase,+ xi albate: 35 «Xi chal li Jeova ti jaʼ bankilal yuʼun soltaroetike: ‹Ta jkʼasbe li s-arko Elam+ ti jaʼ te staoj* yipale. 36 Chkakʼ tal ta stojolal Elam li ikʼ ti chlik tal ta xchanjotal stiʼiltak vinajele xchiʼuk tanpuk chbatik kuʼun li ta xchanjotal stiʼiltak vinajele. Muʼyuk xa junuk mukʼta lum ti muʼyuk te chkʼotik li j-elametik ti tanpuk chbatike›».
37 Xi chal li Jeovae: «Chkakʼ nikuk ta xiʼel j-elametik ta yeloval li yajkontraike xchiʼuk li buchʼutik tskʼan chmilatike; chkakʼ talel vokolil ta stojolalik, chkakʼ talel li skʼakʼal koʼonton ti xtiltune. Jech xtok, ta jtak batel espada ta stojolalik jaʼ to mi la jtupʼbe skʼoplalik ta j-echʼele».
38 Xi chal li Jeovae: «Te chkakʼ jchotleb sventa ajvalil li ta Elame+ xchiʼuk ta jlajesbe skʼoplal li ajvalil xchiʼuk li bankilaletike».
39 «Pe li ta slajebaltik batel kʼakʼale, voʼon ta jtsob sutel tal li j-elametik ti chukbilik batele», xi li Jeovae.