Salmos
Kʼejimol kʼalal laj yichʼ akʼel ta skʼob Dios li nae. Skʼejimol David.
30 Ta jtoybot akʼoplal, Kajval Jeova, yuʼun atoyojun* likel;
muʼyuk laj avakʼ muyubajuk li kajkontratak ta skoj li jvokoltake.+
2 Kajval Jeova, Dios kuʼun, xi-avet la jkʼanbot akʼo xakoltaun, vaʼun la apoxtaun.+
3 Kajval Jeova, la atotsun muyel li ta Mukinale.*+
Kuxulun-o avuʼun, la akoltaun sventa mu xi-och yalel ta chʼen.*+
4 Kʼupil kʼoptaik ta kʼejimoletik* li Jeovae, voʼoxuk ti tukʼ avakʼoj abaik ta stojolale,+
kʼupil kʼoptabeik li xchʼul bie;+
5 yuʼun jlikel noʼox oy skʼakʼal yoʼonton ta jtojolaltik,+
pe li slekil yoʼontone te oy-o ti kʼu sjalil kuxulutike.+
Xuʼ van xlik okʼkutik li ta mal kʼakʼale, pe xij-avet noʼox ta muyubajel li ta sobe.+
6 Xi laj kal kʼalal muʼyuk toʼox kʼusi ta jvul-o koʼontone:
«Muʼyuk buchʼu xuʼ svuyilanun».*
7 Kajval Jeova, kʼalal lek toʼox chavilune,* tsots toʼox laj kaʼi jba avuʼun kʼuchaʼal vits.+
Pe lixiʼ ta jyalel kʼalal la anakʼ* asate.+
8 Te xi-avet-o ta atojolal, Kajval Jeova;+
xchiʼuk te xivokolet-o ta jkʼan akʼo xakoltaun, Jeova.
9 ¿Kʼusi sbalil mi lichame,* mi liyal batel ta chʼene?*+
¿Mi tskʼupil kʼoptaot li pukuke?*+ ¿Mi chalbe van skʼoplal ti tukʼ chavakʼ abae?+
10 Kajval Jeova, chikintao xchiʼuk akʼo ta ilel slekil avoʼonton ta jtojolal.+
Kʼotan ta jkoltavanej kuʼun,+ Kajval Jeova.
11 Laj xa akʼatajesbun ta akʼot li yatel koʼontone;
laj xa alokʼbun li chʼixal kʼuʼile,* vaʼun jaʼ xa laj avakʼbun jkʼuʼin li muyubajele
12 sventa xuʼ jkʼupil kʼoptaot ta kʼejimol xchiʼuk ti mu teuk tsʼijil xikome.
Kajval Jeova, Dios kuʼun, ta jkʼupil kʼoptaot sbatel osil.