Job

1 Li ta yosilal Use te naki jun vinik ti Job*+ sbie. Tukʼ yakʼoj sba+ xchiʼuk muʼyuk smul; xiʼtaoj* Dios xchiʼuk spʼajoj li kʼusi chopole.+ 2 Ayan vukvoʼ skeremtak xchiʼuk oxvoʼ stsebetak. 3 Oy vukmil xchijtak, oxmil skameyotak, jmil xvakaxtak* xchiʼuk oy voʼob sien svurotak,* jech xtok, ep tajek yajtuneltak, jech oxal jaʼ li buchʼu mas mukʼ skʼoplal kʼot ta Slokʼeb Kʼakʼale.

4 Ta jujuntal li xnichʼnabe chakʼik mukʼta veʼel ta snaik jaʼ ti kʼusi kʼakʼalil staojik yakʼele. Chikʼik ta veʼel xchiʼuk ta uchʼbolajel ek li oxvoʼ stsebalike. 5 Kʼalal mi tsuts xa ox ti jayib kʼakʼal xchʼakojik sventa chveʼike, li Jobe tstakan ta ikʼel xnichʼnabtak sventa xchʼultajesan. Vaʼun, sob tajek chlik xchiʼuk chakʼ chikʼbil matanal+ ta sventa li jujun xnichʼnabe. Yuʼun xi tsnop li Jobe: «Yikʼaluk saʼoj smulik li jnichʼnabe xchiʼuk xuʼ van la xchopol kʼoptaik Dios ta yoʼontonik». Jaʼ jech nopem xaʼi tspas-o li Jobe.+

6 Vaʼun, kʼot skʼakʼalil ti bat svaʼan sbaik ta yeloval Jeova+ li anjeletike,*+ te tijil och batel ek+ li Satanase.+

7 Laje, li Jeovae xi laj yalbe li Satanase: «¿Bu lalik tal leʼ une?». Xi la stakʼbe Jeova li Satanase: «Ay xanavkun tal ta balumil, xiyal ximuy noʼox ta skʼelel».+ 8 Li Jeovae xi laj yalbe li Satanase: «¿Mi yuʼun avakʼoj asat* ta stojolal li kajtunel Jobe? Stuk noʼox jech ta balumil maʼ li vinik leʼe. Tukʼ yakʼoj sba+ xchiʼuk muʼyuk smul; xiʼtaoj Dios xchiʼuk spʼajoj li kʼusi chopole». 9 Te une, li Satanase xi la stakʼbe li Jeovae: «¿Mi yuʼun ta jecheʼ noʼox xiʼtaoj Dios avaloj li Jobe?+ 10 ¿Mi mu ajoyojuk lek ta mok sventa xachabi+ xchiʼuk li yutsʼ yalale xchiʼuk skotol li kʼusi oy yuʼune? Avakʼojbe bendision li yabtel yok skʼobe,+ jech xtok, pʼolem tajek ta balumil li stsʼunbal chonbolomtake. 11 Pe akʼo akʼob avil ta stojolal* xchiʼuk pojbo avil skotol li kʼusi oy yuʼune, vaʼun te chavil ti chchopol kʼoptaot ta asate». 12 Vaʼun, li Jeovae xi laj yalbe li Satanase: «¡Kʼelavil! Chkakʼbot ta avok akʼob* skotol li kʼusi oy yuʼune. Jaʼ noʼoxe ¡mu me kʼusi xapasbe li stuk une!». Jech oxal, li Satanase lokʼ batel ti bu oy li Jeovae.+

13 Kʼalal jaʼo te yakal chveʼik xchiʼuk chuchʼik vino ta sna sbankilik li skeremtak xchiʼuk stsebetake,+ 14 te tal jun yajtunel li Jobe xchiʼuk xi laj yale: «Yakal toʼox ta abtel li vakaxetike, jech xtok, jaʼo te nopol chveʼik ta yaxaltik li vuroetike, 15 vaʼun te kʼot tsakvanikuk ta kʼop li jsebaetike xchiʼuk laj yikʼik batel li chonbolometike, jech xtok, la smilik ta espada li jtuneletike. Voʼon xa noʼox kuxul likom sventa tal kalbot».

16 Kʼalal yakal to jech ta yalele, te kʼot yan yajtunel li Jobe xchiʼuk xi laj yale: «¡Laj yakʼ yalel tal kʼokʼ* ta vinajel li Diose, te lik tsanuk yoʼ bu oy li chijetike xchiʼuk li jchabichijetike, vaʼun kʼakʼik! Voʼon xa noʼox kuxul likom sventa tal kalbot».

17 Kʼalal yakal to jech ta yalel eke, te kʼot yan yajtunel li Jobe xchiʼuk xi laj yale: «Li jkaldeaetike+ la xchʼak sbaik ta oxvokʼ sventa chelkʼanik xchiʼuk chikʼik batel li kameyoetike xchiʼuk la smilik ta espada li jtuneletike. Voʼon xa noʼox kuxul likom sventa tal kalbot».

18 Kʼalal yakal to jech ta yalel eke, te kʼot to yan yajtunel li Jobe xchiʼuk xi laj yale: «Te yakal chveʼik xchiʼuk chuchʼik vino ta sna sbankilik li akeremtake xchiʼuk li atsebetake. 19 Pe ta anil noʼox lik tal tsatsal ikʼ ta takixokol balumil, vaʼun la slilin ta jyalel li nae, jaʼ yuʼun lom yalel ta stojolal li anichʼnabtake, jech oxal cham skotolik. Voʼon xa noʼox kuxul likom sventa tal kalbot».

20 Laje, vaʼi li Jobe, la sliʼ ta jatel li skʼuʼ spokʼe, la slokʼ li stsotsil sjole; vaʼun la skejan sba xchiʼuk la snijan sba, 21 xi laj yale:

Jaʼ onoʼox yakʼojbun li Jeovae,+ jaʼ onoʼox laj yichʼ sutel xtok li Jeovae.

Akʼo yichʼ-o kʼupil kʼoptabel li sbi Jeovae».

22 Akʼo mi ep kʼusi kʼot ta stojolal li Jobe, muʼyuk la saʼ smul xchiʼuk muʼyuk laj yakʼbe smulin li Diose.