Jeremias
22 Xi chal li Jeovae: «Yalan batel ta sna* li ajvalil ta Judae xchiʼuk bat albo li aʼyej liʼe. 2 Xi skʼan xavalbee: ‹Chikintao li kʼusi chal Jeovae, voʼot li ajvalilot ta Juda ti te chotolot li ta xchotleb ajvalil Davide, chikintao xchiʼuk avajtuneltak xchiʼuk ateklumal, skotol li buchʼutik ch-ochik li ta ochebaletik liʼe. 3 Xi chal li Jeovae: «Pasik li kʼusi chal mantale xchiʼuk pakbeik skʼoplal li kʼusi tukʼe. Pojik lokʼel ta skʼob jloʼlavanej li buchʼu lajem ta j-elekʼe. Mu xavilbajinik mi junuk jyanlum xchiʼuk mu kʼusi chopol xapasbeik mi junuk olol ti chamem stote* xchiʼuk mi jaʼuk li ants ti chamem smalale.+ Mu xamalbeik xchʼichʼel liʼ ta jteklum li buchʼu muʼyuk smule.+ 4 Yuʼun mi la achʼunik lek li kʼusi laj kalboxuke, li ajvaliletik ti chchotiik li ta xchotleb ajvalil Davide+ kajajtik ta kaʼ xchiʼuk ta kareta ch-ochik ta stiʼtak li na liʼe, koʼol ch-ochik xchiʼuk li yajtuneltake xchiʼuk li steklumale»›.+
5 »Xi chal li Jeovae: ‹Pe mi muʼyuk la achʼunik li kʼusi laj kalboxuke, jamal chkal ta jbi jtuk ti chichʼ lajesel li na liʼe›.+
6 »Yuʼun xi chal Jeova ta sventa li sna ajvalil ta Judae:
‹Xakoʼolaj chkil kʼuchaʼal Galaad,
xakoʼolaj kʼuchaʼal li sjol vits Libanoe.
Pe chakʼot kuʼun kʼuchaʼal takixokol balumil,
mi junuk xa jnaklejetik chkom li ta jteklumetik avuʼune.+
7 Ta jvaʼan jmilvanejetik sventa slajesik akʼoplal,
ta jujuntal chichʼ talel yabtejebik.+
Ta xtuchʼik li sedro teʼetik avuʼun ti mas kʼupilik sbae
xchiʼuk ta xchikʼik ta kʼokʼ.+
8 »›Yepal mukʼtik lumetik liʼ ch-echʼik ta xokon li jteklume xchiʼuk xi chalbe sbaik ta jujuntale: «¿Kʼu yuʼun jech la spasbe Jeova li mukʼta lum liʼe?».+ 9 Vaʼun, xi tstakʼbe sbaike: «Yuʼun laj yiktaik komel li trato la spasik xchiʼuk Jeova ti jaʼ Sdiosike, la snijan sbaik ta stojolal yan diosetik xchiʼuk tunik ta stojolal»›.+
10 Mu xa-okʼik ta stojolal li animae
xchiʼuk mu xkʼuxubaj ta avoʼontonik.
Jaʼ milo abaik ta okʼel ta stojolal li buchʼu chichʼ chukel batele,
yuʼun muʼyuk xa tsut-o tal sventa tskʼel li jteklum ti bu ayane.
11 »Yuʼun xi chal Jeova ta stojolal Salum*+ ti jaʼ xnichʼon Josiase+ xchiʼuk ti jaʼ ajvalil ta Juda ti jaʼ ochem ta xkʼexol li stote xchiʼuk ti chukbil xa batele: ‹Muʼyuk xa tsut-o talel. 12 Yuʼun te chcham ti bu chukbil batele, muʼyuk xa chil yan velta li jteklum liʼe›.+
13 ¡Abol sba li buchʼu chopol kʼusi tspas sventa tsvaʼan snae
xchiʼuk ti muʼyuk tukʼ kʼusitik tspas kʼalal tspasbe li skuartoaltak ta akʼole,
ti ta moton chakʼ abtejuk li xchiʼiltake,
ti mu skʼan stojbe li skʼakʼalike!+
14 Abol sba li buchʼu xi chale: ‹Ta jvaʼan jpʼejuk jna ti lek mukʼe
xchiʼuk lek mukʼtik ta jpasbe li skuartoaltak ta akʼole.
Oy sventanailtak ta jpas,
ta jpakʼbe lek sedro teʼ xchiʼuk ta jbon lek ta tsoj›.
15 ¿Mi jaʼ jal cha-ajvalilaj-o ta skoj ti voʼot mas ep la atunes li sedro teʼ ti jaʼ mu sta li yantike?
Li atot eke veʼ xchiʼuk uchʼbolaj,
pe li stuke jaʼ la spas li kʼusi chal mantale xchiʼuk la spakbe skʼoplal li kʼusi tukʼe,+
vaʼun lek kʼusi kʼot ta stojolal.
16 La spakbe skʼoplal kʼalal chichʼ chapanel li buchʼu ilbajinbile xchiʼuk li buchʼu abol sbae,
sventa lekuk kʼusi xkʼot ta pasel.
‹¿Mi mu jaʼuk jech la spas ta skoj ti xojtikinune?›, xi li Jeovae.
17 ‹Yan li voʼote jaʼ noʼox te batem asat xchiʼuk avoʼonton ta loʼlavanej sventa xapas kanal takʼin,
ti chamalbe xchʼichʼel li buchʼu chʼabal smule,
ti cha-elkʼaj xchiʼuk ti chopol kʼu yelan chapas kanal takʼine›.
18 »Jaʼ yuʼun, xi chal Jeova ta stojolal li Jeoiakim+ ti jaʼ xnichʼon Josiase xchiʼuk ti jaʼ ajvalil ta Judae:
‹Muʼyuk xi ch-okʼik ta stojolale:
«¡Ay, kuni chiʼil ta vokʼel! ¡Ay, kuni chiʼil ta vokʼel!».
Muʼyuk xi ch-okʼik ta stojolale:
«¡Ay, kajval! ¡Ay, ajvalil kuʼun!».
19 Jaʼ jech chichʼ mukel jech kʼuchaʼal jkot vuro,+
li sbekʼtale chichʼ jochel batel xchiʼuk chichʼ jipel batel
ta spat li smuroal Jerusalene›.+
20 Muyan batel li ta Libanoe xchiʼuk avanan,
tsots xa-avan li ta Basane.
Te to xa-avan talel ta Abarim,+
yuʼun skotol li buchʼutik skʼanojikot tajeke laj xa yichʼ lajesel.+
21 La jkʼoponot kʼalal jun toʼox avoʼonton chavaʼi abae.
Pe xi laj avale: ‹Muʼyuk ta jchʼun›.+
Ta akeremal onoʼox jech nopem xavaʼi spasel tal,
yuʼun muʼyuk xachʼun li kʼusi laj kalbote.+
22 Chbekʼatik* batel ta ikʼ li jchabichijetik avuʼune+
xchiʼuk chichʼik chukel batel li buchʼutik skʼanojikot tajeke.
Vaʼun, chavichʼ kʼexlaltasel xchiʼuk labanel ta skoj li avokoltake.
23 Voʼot ti te nakalot ta Libanoe+
xchiʼuk ti te apasoj atas ta sedro teʼetike,+
¡solel xa-ijet* ta jyalel kʼalal mi vul ta atojolal li kʼusi kʼuxe,
ti xkoʼolaj kʼuchaʼal svokol* jun ants kʼalal yakal chvokʼ yole!».+
24 «Xi chal li Jeovae: ‹¡Konias*+ ti xnichʼonot Jeoiakime+ xchiʼuk ti ajvalilot ta Judae, jamal chkal ta skoj ti kuxulun ti akʼo mi jaʼukot jun aniyo ti oy seyoal ti xojolot ta jbatsʼikʼobe, ta onoʼox jipot lokʼel! 25 Chkakʼot ta skʼob li buchʼutik tskʼan tsmilikote, li buchʼutik chaxiʼ yuʼune, chkakʼot ta skʼob li Nabukodonosor* ti jaʼ ajvalil ta Babiloniae xchiʼuk ta stojolal li jkaldeaetike.+ 26 Li voʼot xchiʼuk ameʼe ta jipoxuk batel ta yan lum ti bu maʼuk te la-ayanike xchiʼuk te chachamik. 27 Muʼyuk xa chasutik-o talel li ta jteklum ti oy tajek ta avoʼontonike.+
28 Li Koniase, ¿mi xkoʼolaj kʼuchaʼal jpʼej vokʼem pʼin ti pʼajbile,
kʼuchaʼal mukʼta pʼin ti muʼyuk buchʼu skʼane?
¿Kʼu yuʼun laj yichʼik jipel yalel xchiʼuk snitilulal
xchiʼuk ti laj yichʼik jipel batel ta jun lum ti bu mu xojtikinike?›.+
29 Balumil,* balumil, balumil, chikintao li kʼusi chal Jeovae.
30 Xi chal li Jeovae: