Jeremias
26 Kʼalal jaʼo lik ajvalilajuk ta Juda li Jeoiakim+ ti jaʼ xnichʼon Josiase, xi kʼoponat tal yuʼun Jeova li Jeremiase: 2 «Xi chal li Jeovae: ‹Te xbat avaʼan aba li ta yamakʼil* sna Jeovae, kʼopono skotol li krixchanoetik ta jteklumetik ta Juda ti ch-ochik ta sna Jeova sventa chichʼik ta mukʼe.* Albo yaʼiik skotol li kʼusi chkalbote, mu me kʼusi xamuk komel. 3 Yikʼaluk van xchikintaik xchiʼuk ti xiktaik ta jujuntal li xchopol beike, vaʼun ta jel* ti jnopoj ox chkakʼbe svokolik ta skoj li kʼusitik chopol tspasike.+ 4 Xi xavalbe yaʼiike: «Xi chal li Jeovae: ‹Mi muʼyuk la achikintaik xchiʼuk mi muʼyuk la achʼunik li mantal* laj kakʼboxuke, 5 mi muʼyuk la achikintabeik kʼusi chal li j-alkʼopetik ti jaʼ kajtuneltake, ti ep ta velta la jtak tal ta atojolalike* xchiʼuk ti mu onoʼox xachikintabeike,+ 6 vaʼun jaʼ jech chkom kuʼun kʼuchaʼal Silo+ li na liʼe xchiʼuk li jteklum liʼe, chkakʼ ti xchopol kʼoptaat yuʼun skotol li mukʼtik lumetik ta balumile›»›».+
7 Li paleetike, li j-alkʼopetike xchiʼuk sjunul li jteklume laj yaʼiik li kʼusi laj yal Jeremias te ta sna Jeovae.+ 8 Kʼalal laj xa ox yal Jeremias skotol li kʼusi albat yuʼun Jeova ti akʼo xalbe sjunul jteklume, li paleetike, li j-alkʼopetike xchiʼuk sjunul li jteklume la stsakik xchiʼuk xi laj yalbeike: «Jpʼel skʼoplal chacham. 9 ¿Kʼu yuʼun xi laj aval ta sbi Jeova: ‹Jaʼ jech chkom kʼuchaʼal Silo li na liʼe, chichʼ lajesel xchiʼuk mi junuk jnaklej chkom li ta jteklum liʼe›?». Vaʼun, sjunul li jteklume lik stsob sbaik, te setelik ta stojolal Jeremias ti te oy ta sna Jeovae.
10 Kʼalal laj yaʼi bankilaletik ta Juda li kʼusi laj yichʼ alele, lokʼik tal ta sna* ajvalil sventa xbatik ta sna Jeova, vaʼun te chotiik ta yochebal li achʼ tiʼ na yuʼun Jeovae.+ 11 Li paleetike xchiʼuk li j-alkʼopetike xi laj yalbeik li bankilaletike xchiʼuk sjunul li jteklume: «Li vinik liʼe sta-o xichʼ milel,+ yuʼun laj avaʼi ta achikin atukik ti laj yal ti chvul vokolil li ta jteklum liʼe».+
12 Vaʼun, li Jeremiase xi laj yalbe skotol li bankilaletike xchiʼuk sjunul li jteklume: «Skotol li kʼusi laj kal avaʼiike, jaʼ la stakun tal Jeova sventa xkal li kʼusi chkʼot ta stojolal li na liʼe xchiʼuk li jteklum liʼe.+ 13 Jaʼ yuʼun, jelo li atalelalike* xchiʼuk li kʼusitik chapasike xchiʼuk chʼunik kʼusi chal li Jeova ti jaʼ Adiosike, vaʼun li Jeovae ta sjel* ti snopoj ox chakʼ avokolike.+ 14 Pe li voʼone liʼ xa oyun ta akʼobike. Pasbeikun ti kʼusi lek xchiʼuk ti kʼusi tukʼ chavilike. 15 Jaʼ noʼoxe teuk me ta ajolik ti mi la amilikune, ta me xata amulik ti chamalbeik xchʼichʼel jun vinik ti chʼabal smule, ta sta smul li jteklum liʼe xchiʼuk li jnaklejetike, yuʼun ta melel jaʼ la stakun tal Jeova sventa xkal avaʼiik li kʼusi laj xa kalboxuke».
16 Vaʼun, li bankilaletike xchiʼuk sjunul li jteklume xi laj yalbeik li paleetik xchiʼuk li j-alkʼopetike: «Li vinik liʼe mu sta-o xichʼ milel, yuʼun li kʼusi laj yalbutike jaʼ ta sbi li Jeova ti jaʼ Jdiostike».
17 Jech xtok, oy junantik moletik ta jteklum ti vaʼiike xchiʼuk xi laj yalbeik sjunul li jteklum ti te stsoboj sbaike: 18 «Li Mikeas+ ti likem ta Moresete jaʼo laj yal albil kʼopetik li ta skʼakʼalil Esekias+ ti jaʼ ajvalil ta Judae xchiʼuk xi laj yalbe sjunul li jteklum ta Judae: ‹Xi chal li Jeova ti jaʼ bankilal yuʼun soltaroetike:*
«Chichʼ lokel kʼuchaʼal osil li Sione
xchiʼuk tokol chkom slilijemal li Jerusalene,+
19 »Li ajvalil Esekias ta Juda xchiʼuk li jteklum Judae, ¿mi yuʼun la smilik li Mikease? ¿Mi mu lajuk xiʼta* Jeova li ajvalile xchiʼuk mi mu lajuk skʼanbe vokol Jeova sventa xkʼuxubinatik, vaʼun ti la sjel* Jeova ti snopoj ox ch-akʼbat svokolike?+ Mi la jmiltik li Jeremiase, ta jsaʼ talel jvokol jtuktik.
20 »Oy yan vinik xtok ti laj yal albil kʼopetik ta sbi Jeovae, jaʼ li Uriya ti jaʼ xnichʼon Semaya ti likem ta Kiryat-Jearime,+ ti laj yal li kʼusi chopol chkʼot ta stojolal li jteklum liʼe xchiʼuk li mukʼta lum liʼe, jech laj yal kʼuchaʼal laj yal li Jeremiase. 21 Li ajvalil Jeoiakim+ xchiʼuk skotol li sviniktak ti lek tsotsike xchiʼuk skotol li bankilaletike laj yaʼiik li kʼusi laj yal Uriyae, vaʼun li ajvalile tskʼan ox tsmil.+ Kʼalal kʼot ta xchikin li Uriya taje, lik xiʼuk xchiʼuk jatav batel ta Ejipto. 22 Vaʼun, li ajvalil Jeoiakime la stak batel ta Ejipto li Elnatan+ ti jaʼ xnichʼon Akbore xchiʼuk yan viniketik. 23 Ay yikʼik sutel tal ta Ejipto li Uriyae, vaʼun laj yikʼik batel ta stojolal ajvalil Jeoiakim, laje la smil ta espada+ xchiʼuk te la sjipbe batel sbekʼtal ta smukinal li buchʼutik abol sbaike».
24 Pe li Aikam+ ti jaʼ xnichʼon Safane+ la skolta li Jeremiase, vaʼun jech muʼyuk xichʼ akʼel ta skʼob jteklum sventa smilike.+