Baʼyel Kronikas
15 Li Davide laj to svaʼan jaypʼej sna li ta Steklumal Davide, jech xtok, la xchapan bu xuʼ xakʼ li Xkaxa melel Diose, la smeltsanbe jun skarpanail.+ 2 Vaʼun, xi laj yal li Davide: «Muʼyuk buchʼu yan xuʼ xichʼ batel li Xkaxa melel Diose, jaʼ noʼox li jlevietike, yuʼun jaʼ tʼujbilik yuʼun Jeova sventa xichʼik batel li Xkaxa Jeovae xchiʼuk jaʼ tʼujbilik sventa spasbeik yabtel sbatel osil».+ 3 Jaʼ yuʼun, li Davide la stsob ta Jerusalen skotol Israel sventa xichʼbe muyel li Xkaxa Jeova ti bu xchapanojbe yavile.+
4 Li Davide la stsob li snitilulal Aaron+ xchiʼuk li jlevietike:+ 5 li ta snitilulal Koate jaʼ li bankilal Uriel xchiʼuk li 120 ta voʼ xchiʼiltake; 6 li ta snitilulal Merarie jaʼ li bankilal Asaya+ xchiʼuk li 220 ta voʼ xchiʼiltake; 7 li ta snitilulal Guersome jaʼ li bankilal Joel+ xchiʼuk li 130 ta voʼ xchiʼiltake; 8 li ta snitilulal Elisafane+ jaʼ li bankilal Semaya xchiʼuk li chib sien xchiʼiltake; 9 li ta snitilulal Ebrone jaʼ li bankilal Eliel xchiʼuk li 80 ta voʼ xchiʼiltake; 10 li ta snitilulal Usiele+ jaʼ li bankilal Aminadab xchiʼuk li 112 ta voʼ xchiʼiltake. 11 Jech xtok, li Davide la stak ta ikʼel li pale Sadok+ xchiʼuk li pale Abiatare,+ la stak ta ikʼel li jlevietik ti jaʼik Uriel, Asaya, Joel, Semaya, Eliel xchiʼuk Aminadab, 12 xi laj yalanbee: «Voʼoxuk joliloxuk li ta jujuchop yutsʼ yalal jlevietike. Chʼultajeso abaik xchiʼuk akʼo xchʼultajes sbaik li avermanotakike, yuʼun voʼoxuk chavichʼik muyel li Xkaxa Jeova ti jaʼ Sdios Israel ti bu jchapanojbe yavile. 13 Li Jeovae tsan skʼakʼal yoʼonton ta jtojolaltik+ ta skoj ti mu voʼoxuk la akuchik ta sba veltae,+ yuʼun muʼyuk la jkʼelbetik skʼoplal ti kʼu onoʼox yelan skʼan pasele».+ 14 Jaʼ yuʼun, li paleetik xchiʼuk li jlevietike la xchʼultajes sbaik sventa xichʼik muyel li Xkaxa Jeova ti jaʼ Sdios Israele.
15 Vaʼun, li jlevietike la skajan batel ta snekebik li Xkaxa melel Diose, jaʼ la xkuchik-o batel li ta steʼeltak+ jech onoʼox kʼuchaʼal yaloj mantal Moises ti jech albil yuʼun Jeovae. 16 Li Davide laj yalbe bankilaletik yuʼun jlevietik ti akʼo stʼujik jkʼejimoletik sventa xkuxetuk noʼox yoʼontonik akʼo kʼejinikuk, akʼo stijik li stijobiltak son ti oy yakʼiltake, arpaetik+ xchiʼuk simbaloetik.*+
17 Jaʼ yuʼun, li jlevietike la stʼujik Eman+ ti jaʼ xnichʼon Joel xchiʼuk Asaf+ ti jaʼ xnichʼon Berekias, ti jaʼ snitilulalik li jlevietike, la stʼujik Etan+ ti jaʼ xnichʼon Kusaya li ta yutsʼ yalal Merarie. 18 Li ta xchaʼvokʼale te oy xtok li yutsʼ yalalike,+ jaʼik Sakarias, Ben, Jaasiel, Semiramot, Jeiel, Uni, Eliab, Benaya, Maaseya, Matitias, Elifeleu xchiʼuk Mikneya; te oy xtok li Obed-Edom xchiʼuk Jeiel ti jaʼ jchabitiʼnaetike. 19 Li Eman,+ Asaf+ xchiʼuk Etan ti jaʼ jkʼejimoletike jaʼ tstijik li simbaloetik*+ ta kovree; 20 li Sakarias, Asiel, Semiramot, Jeiel, Uni, Eliab, Maaseya xchiʼuk Benayae jaʼ tstijik li stijobiltak son ti oy yakʼiltak ti alamot*+ snukʼilale; 21 li Matitias,+ Elifeleu, Mikneya, Obed-Edom, Jeiel xchiʼuk Asasiase jaʼ tstijik li arpaetik ti seminit*+ snukʼilale, jaʼ tsbeiltasik li kʼejimole. 22 Li Kenanias+ ti jaʼ bankilal yuʼun jlevietike jaʼ sbainoj kʼalal chkuchik batel li Kaxae, yuʼun lek xtojob, 23 li Berekias xchiʼuk Elkanae jaʼ chchabiik li Kaxae. 24 Li paleetik ti jaʼik Sebanias, Josafat, Netanel, Amasai, Sakarias, Benaya xchiʼuk Eliesere tsots la sjupan yokʼesik ta yeloval li Xkaxa melel Diose.+ Li Obed-Edom xchiʼuk Jeiase jaʼ chchabiik li Kaxa eke.
25 Vaʼun, li Davide, li moletik ta Israel xchiʼuk li bankilaletik ti sbainojik jmil ta voʼe xkuxet yoʼonton+ yalik batel ta sna Obed-Edom+ sventa xbat yichʼik talel li xkaxail strato Jeovae. 26 Kʼalal koltaatik xa ox yuʼun melel Dios li jlevietik ti xkuchojik batel li xkaxail strato Jeovae, laj yakʼik ta milbil matanal vukot chʼiom tot vakaxetik xchiʼuk vukot tot chijetik.+ 27 Li Davide slapoj batel jlik natil kʼuʼil ti muʼyuk skʼob ti pasbil ta lekil pokʼe jech kʼuchaʼal slapojik batel li jlevietik ti xkuchojik batel li Kaxae, li jkʼejimoletike xchiʼuk li Kenanias ti jaʼ sbainoj kʼalal chkuchik batel li Kaxae xchiʼuk ti jaʼ sbainoj li jkʼejimoletike. Li Davide slapoj batel xtok jlik mokankʼuʼil ti pasbil ta linoe.+ 28 Skotol li j-israeletike x-avetik noʼox ta muyubajel+ kʼalal xkuchojik muyel li xkaxail strato Jeovae, te tsjupanik batel li xkachuike, li yokʼesike+ xchiʼuk li simbaloike,* solel tsots tstijik li stijobiltak son ti oy yakʼiltake xchiʼuk li arpaetike.+
29 Kʼalal och batel ta Steklumal David+ li xkaxail strato Jeovae, te nachʼal chkʼelvan ta ventana li stseb Saul ti jaʼ li Mikale,+ laj yil ti te xpʼitomaj tal li Davide xchiʼuk ti xmuyubaje, vaʼun lik spʼaj ta yoʼonton.+