Baʼyel Kronikas

11 Ta tsʼakale, skotol li j-israeletike tal skʼelik li David te ta Ebrone,+ xi laj yalbeike: «¡Kʼelavil! Jun jchʼichʼeltik.*+ 2 Kʼalal jaʼ toʼox ajvalil li Saule, voʼot onoʼox chabeiltas ta paskʼop li Israele.*+ Xi laj yalbot li Jeova Dios avuʼune: ‹Voʼot chachabi jteklumal Israel jech kʼuchaʼal jun jchabichij xchiʼuk voʼot chakʼot ta jnitvanej yuʼun li jteklumal Israele›».+ 3 Jaʼ yuʼun, skotol li moletik ta Israele tal skʼelik li ajvalil te ta Ebrone. Vaʼun, li Davide te ta Ebron la spas trato xchiʼuk li moletik ta yeloval Jeovae. Li moletike la svaʼanik ta ajvalil ta Israel li David+ jech kʼuchaʼal yaloj xa onoʼox Jeova ta stojolal li Samuele.+

4 Ta tsʼakal li David xchiʼuk skotol li Israele batik ta Jerusalen, jaʼ xkaltik, ta Jebus+ ti jaʼ te nakalik li jebusetike.+ 5 Li jnaklejetik ta Jebuse xi la slabanik li Davide: «¡Mi jutebuk cha-och tal liʼe!».+ Pe li Davide och ta skʼob li jteklum Sion ti joyol ta muroe.+ Steklumal David sbi li avie.+ 6 Jaʼ yuʼun, xi laj yal li Davide: «Li buchʼu baʼyel chbat stsak ta kʼop li jebusetike jaʼ chkʼot ta bankilal soltaro».* Li Joab+ ti jaʼ yol Seruyae jaʼ baʼyel muy batel, jaʼ yuʼun jaʼ kʼot ta bankilal. 7 Li Davide te lik nakiuk li ta jteklum ti joyol ta muroe, jaʼ yuʼun Steklumal David la sbiin yuʼunik. 8 Li Davide lik svaʼan muroetik xchiʼuk yan kʼusitik ti te chlik ti bu Tsopajtik tone* xchiʼuk ta jujujot xokon li jteklume. Yan li Joabe jaʼ la xchaʼvaʼan li butik to skʼane. 9 Jech la stsak batel mas yip li Davide,+ jech xtok, te chiʼinbil yuʼun li Jeova ti jaʼ bankilal yuʼun soltaroetike.*

10 Liʼe jaʼ skʼoplal li joliletik yuʼun yajsoltarotak David ti lek xuʼ yuʼunik paskʼope. Jaʼ la skoltaik li David sventa stsak lek yabtel ta ajvalile, la stsob sbaik xchiʼuk skotol li Israel sventa stikʼik ta ajvalil li Davide, yaloj xa onoʼox Jeova ti jaʼ chkʼot ta ajvalil ta Israele.+ 11 Liʼe jaʼik li sviniktak David ti lek xuʼ yuʼunik paskʼop ti tsakal sbiik ta listae: Jasobeam+ ti jaʼ xnichʼon jun j-akmoni vinike, li Jasobeame jaʼ bankilal yuʼunik li ta yoxvoʼalike.+ Jkoje ta jun noʼox velta la smil ta slansa oxib sien viniketik.+ 12 Li yane jaʼ Eleasar+ xnichʼon Dodo, li j-aoita vinike.+ Li Eleasare jaʼ jun li ta yoxvoʼal ti mas lek xuʼ yuʼunik paskʼope. 13 Jaʼo te xchiʼuk David ta Pas-Damim+ ti bu stsoboj sbaik li jfilisteaetik sventa spasik kʼope. Ti bu oyike oy jsep osil ti te tsʼunbil epal sevadae, li jteklume jatavik batel ta skoj li jfilisteaetike. 14 Pe li Eleasare te kom sventa spoj li osile, ep jfilisteaetik la smil, jaʼ jech koltavan Jeova li vaʼ kʼakʼale.+

15 Oy oxvoʼ li ta 30 ta voʼ bankilaletike yal skʼelik li David ti te oy ta chʼen Adulame.+ Jaʼo te spasoj skarpanaik jtsop soltaroetik yuʼun jfilisteaetik li ta stenlejaltik Refaime.+ 16 Li Davide te snakʼoj* sba li ta chʼene, pe li jtsop jfilisteaetike te spasoj skarpanaik ta Belen. 17 Vaʼun, li Davide xi laj yal li kʼusi oy ta yoʼontone: «¡Ti oyuk kʼuxi xuʼ xkuchʼbe yaʼlel li poso te oy ta stsʼel Belene!».+ 18 Kʼalal laj yaʼi li oxvoʼ sviniktake, ochik batel ta persa ti bu spasoj skarpanaik li jfilisteaetike, la slupik lokʼel voʼ li ta poso te oy ta stsʼel Belene, vaʼun laj yichʼbeik talel li Davide. Pe li Davide muʼyuk skʼan laj yuchʼ, kʼajomal la smalbe li Jeovae. 19 Xi laj yale: «¡Ta sat li Jdiose, mu jpas jech ti chkuchʼ li voʼe! ¿Mi yuʼun chkuchʼbe xchʼichʼel li viniketik ti ay yakʼ ta vokol xkuxlejalike?*+ Yuʼun laj yakʼ ta vokol xkuxlejalik* ti ay yichʼik tal voʼe». Jaʼ yuʼun, muʼyuk laj yuchʼ. Taje jaʼ jech la spas li oxvoʼ sviniktak ti mas lek xuʼ yuʼunik paskʼope.

20 Li Abisai+ ti jaʼ xchiʼil ta vokʼel Joabe+ jaʼ kʼot ta jolil yuʼunik yan oxvoʼ viniketik; jun velta li Abisaie la smil oxib sien viniketik ta lansa xchiʼuk jaʼ jech lek ojtikinbil jech kʼuchaʼal li oxvoʼe.+ 21 Manchuk mi jaʼ bankilal yuʼunik li yan oxvoʼ viniketike xchiʼuk akʼo mi jaʼ mas ichʼbil ta mukʼ, muʼyuk onoʼox la sta ta be li oxvoʼ viniketik ta baʼyele.

22 Li Benayae+ jaʼ xnichʼon Jeoiada xchiʼuk lek tsots yoʼonton,* yuʼun ep kʼusitik labal sba la spas ta Kabseel.+ La smilbe li chaʼvoʼ xnichʼnab Ariel ta Moabe, jun kʼakʼal xtoke och ta yut poso kʼalal jaʼo chyal taive xchiʼuk te la smil jkot leon.+ 23 Jun velta xtoke la smil jun j-ejipto vinik ti nat tajeke —voʼob xukʼubil snatil—.*+ Li j-ejipto vinike yichʼoj jun slansa ti xkoʼolaj kʼuchaʼal balbalteʼ sventa jolobil* li steʼele,+ pe li Benayae ta jtel noʼox teʼ bat stsak ta kʼop xchiʼuk la spojbe li slansae, vaʼun jaʼ la smil-o.+ 24 Taje jaʼ jech la spas li Benaya xnichʼon Jeoiadae xchiʼuk jaʼ jech lek ojtikinbil jech kʼuchaʼal li oxvoʼ viniketik ti mas lek xuʼ yuʼunik paskʼope. 25 Manchuk mi mas to lek ichʼbil ta mukʼ ti jaʼ mu sta li 30 ta voʼe, muʼyuk onoʼox la sta ta be li oxvoʼ viniketik ta baʼyele.+ Akʼo mi jech, li Davide jaʼ la stikʼ ta bankilal yuʼunik li buchʼutik chchabiate.

26 Li soltaroetik ti lek xuʼ yuʼunik paskʼope jaʼik Asael+ xchiʼil ta vokʼel Joab, Elanan xnichʼon Dodo ta Belen,+ 27 Samot ti jaʼ j-aror vinike, Eles ti jaʼ jpelonita vinike, 28 Ira+ ti jaʼ xnichʼon Ikes ti jaʼ jtekoa vinike, Abi-Eser+ ti jaʼ j-anatot vinike, 29 Sibekai+ ti jaʼ j-usa vinike, Ilai ti jaʼ j-aoita vinike, 30 Maarai+ ti jaʼ jnetofa vinike, Eled+ ti jaʼ xnichʼon Baana ti jaʼ jnetofa vinike, 31 Ittai ti jaʼ xnichʼon Ribai ta Guibea yuʼun jbenjaminetike,+ Benaya ti jaʼ jpiraton vinike, 32 Urai ti likem ta beoʼtik ta stenlejaltik* Gaase,+ Abiel ti likem ta Bet-Arabae, 33 Asmavet ti jaʼ jbaurim vinike, Eliaba ti jaʼ jsaalbim vinike, 34 xnichʼnabtak Asem ti jaʼ jguimso vinike, Jonatan ti jaʼ xnichʼon Sague ti jaʼ j-ararita vinike, 35 Aiam ti jaʼ xnichʼon Sakar ti jaʼ j-ararita vinike, Elifal ti jaʼ xnichʼon Ure, 36 Efer ti jaʼ jmekeratita vinike, Aiya ti jaʼ jpelonita vinike, 37 Esro ti jaʼ jkarmelo vinike, Naarai ti jaʼ xnichʼon Esbaie, 38 Joel ti jaʼ xchiʼil ta vokʼel Natane, Mibar ti jaʼ xnichʼon Agrie, 39 Selek li j-ammon vinike, Naarai li jberotita vinik ti jaʼ jkuch-abtejebal yuʼun li Joab ti jaʼ yol Seruyae; 40 Ira ti jaʼ j-itrita vinike, Gareb ti jaʼ j-itrita vinike, 41 Urias+ ti jaʼ j-et vinike, Sabad ti jaʼ xnichʼon Alaie, 42 Adina ti jaʼ xnichʼon Sisa li jruben vinike, li Adinae jaʼ jolil yuʼunik li jrubenetike, te xchiʼuk 30 ta voʼ viniketik; 43 Anan ti jaʼ xnichʼon Maakae, Josafat ti jaʼ jmitnita vinike, 44 Usia ti jaʼ j-astarot vinike, Sama xchiʼuk Jeiel ti jaʼ xnichʼnab Otam li j-aroer vinike; 45 Jediael ti jaʼ xnichʼon Simrie xchiʼuk li xchiʼil ta vokʼel ti jaʼ li Joa ti jaʼ jtisita vinike; 46 Eliel ti jaʼ jmaavita vinike, Jeribai xchiʼuk Josavias ti jaʼ xnichʼnab Elnaame xchiʼuk Itma ti jaʼ jmoab vinike; 47 Eliel, Obed xchiʼuk Jaasiel ti jaʼ jsoba vinike.