Baʼyel Kronikas
13 Li Davide la sjakʼbe yaʼyej li bankilaletik ti sbainojik jmil ta voʼe, li bankilaletik ti sbainojik sien ta voʼe xchiʼuk li yan jnitvanejetike.+ 2 Vaʼun, li Davide xi laj yalbe sjunul li tsobobbail yuʼun Israele: «Mi lek chavilike xchiʼuk mi lek chil li Jeova Dios kuʼuntike, jtaktik ta ikʼel li kermanotaktik ti te nakalik ta sjunul yosilal Israele, jtaktik ta ikʼel ek li paleetik xchiʼuk li jlevietik ti te nakalik ta jteklumetik+ ti oy yaxaltik ta sjoylejale sventa xtal xchiʼinutik. 3 Skʼan xkichʼtik sutel li Xkaxa+ Jdiostike». Yuʼun muʼyuk stukʼulanojik kʼalal kuxul toʼox li Saule.+ 4 Li tsobobbail yuʼun Israele lek laj yaʼiik ti xichʼik sutele, yuʼun lek laj yaʼi li jteklume. 5 Jaʼ yuʼun, li Davide la stsob skotol li Israel ti te nakalik ta yukʼumal* Ejipto kʼalal to ta Lebo-Amate*+ sventa xichʼik lokʼel ta Kiryat-Jearim+ li Xkaxa melel Diose.
6 Vaʼun, li David xchiʼuk skotol li Israele muyik batel ta Baala,+ ta Kiryat-Jearim ti te xkom ta yosilal Judae, yuʼun chbat yichʼik tal li Xkaxa melel Diose, jaʼ li Jeova ti te chotol ta xchotleb ta sba* li keruvinetik+ ti jaʼ te tstabeik ta albel sbie. 7 Li Xkaxa melel Diose te la skajanik batel ta jkot achʼ kareta+ sventa slokʼesik batel li ta sna Abinadabe. Li karetae jaʼ yikʼojik batel li Usa xchiʼuk li Aioe.+ 8 Li David xchiʼuk skotol Israele solel xmuyubajik tstijik son ta yeloval li melel Diose, jaʼ tstijik li arpaetike, yan stijobiltak son ti oy yakʼiltake, panderetaetik,*+ simbaloetik*+ xchiʼuk okʼesetik.+ 9 Pe kʼalal kʼotik li ta yikʼaobil trigo ta Kidone, li Usae laj yik li Kaxae, yuʼun li vakaxetike jutuk xa mu balchʼuj yuʼunik. 10 Li Jeovae ilin tajek ta stojolal li Usae, jaʼ yuʼun la smil ta skoj ti laj yik li Kaxae,+ vaʼun te noʼox cham ta yeloval Dios.+ 11 Li Davide kap-o sjol* ta skoj ti tsan skʼakʼal yoʼonton Jeova ta stojolal li Usae; jech oxal Peres-Usa* la sbiin li lum taje, jech-o sbi kʼalal to avie.
12 Li vaʼ kʼakʼale, li Davide xiʼ tajek ta stojolal li melel Diose, xi laj yale: «¿Kʼuxi xa noʼox chkichʼbe batel Xkaxa melel Dios ti bu nakalune?».+ 13 Jaʼ yuʼun, li Davide muʼyuk xa xichʼ batel Kaxa ti bu nakale, li ta Steklumal Davide. Laj yal mantal ti xichʼik batel ta sna Obed-Edom ti likem ta Gate. 14 Li Xkaxa melel Diose te kom ti bu oy li yutsʼ yalal Obed-Edome, oxib u te kom, jaʼ yuʼun akʼbat bendision yuʼun Jeova li yutsʼ yalal Obed-Edome xchiʼuk skotol li kʼusitik oy ta snae.+